ପ୍ରକାଶ ପାଇଲା ‘ପରଖ-୨୦୨୪’ ରିପୋର୍ଟ, ଜାତୀୟ ହାରଠୁ ଊର୍ଦ୍ଧ୍ୱରେ ଓଡ଼ିଶାର ଛାତ୍ରଛାତ୍ରୀ

କନକ ବ୍ୟୁରୋ: ଏନସିଇଆରଟି ପକ୍ଷରୁ କରାଯାଇଥିବା ଦକ୍ଷତା ପରୀକ୍ଷାରେ ଓଡ଼ିଶାର ଛାତ୍ରଛାତ୍ରୀ ଆଗରେ । ‘ପରଫରମାନ୍ସ ଆସେସମେଣ୍ଟ ରିଭ୍ୟୁ ଆଣ୍ଡ୍ ଆନାଲିସିସ୍‌ ଅଫ୍‌ ନଲେଜ ଫର୍ ହୋଲିଷ୍ଟିକ୍ ଡେଭେଲପମେଣ୍ଟ’ ବା ‘ପରଖ-୨୦୨୪’ ରିପୋର୍ଟ ପ୍ରକାଶ ପାଇଛି । ସମସ୍ତ ରାଜ୍ୟର ତୃତୀୟ, ଷଷ୍ଠ ଏବଂ ନବମ ଶ୍ରେଣୀ ଛାତ୍ରଛାତ୍ରୀଙ୍କୁ ନେଇ କରାଯାଇଛି ଏହି ସର୍ଭେ । ଯେଉଁଥିରେ ଓଡ଼ିଶା ଜାତୀୟ ହାରଠାରୁ ଆଗରେ ରହିଛି ।
'ପରଖ ୨୦୨୪' ରିପୋର୍ଟ   
୩ ହଜାର ୩୪୨ ସ୍କୁଲର ୯୬ ହଜାର ୫୪ ବିଦ୍ୟାର୍ଥୀଙ୍କ ଦକ୍ଷତା ପରୀକ୍ଷା ହୋଇଥିଲା । ସରକାରୀ, ବେସରକାରୀ, ସରକାରୀ ଅନୁଦାନପ୍ରାପ୍ତ ଓ କେନ୍ଦ୍ରୀୟ ବିଦ୍ୟାଳୟ ପିଲା ଏଥିରେ ସାମିଲ ହୋଇଥିଲେ । ତୃତୀୟ ଶ୍ରେଣୀ ପିଲାଙ୍କ ଭାଷା ଓ ଗଣିତ ପରୀକ୍ଷା ହୋଇଥିଲା । ଷଷ୍ଠ ଶ୍ରେଣୀ ପିଲାଙ୍କ ଭାଷା, ଗଣିତ ଓ କରେଣ୍ଟ ଆଫେୟାର୍ସ ପରୀକ୍ଷା ହୋଇଥିଲା ।  ନବମ ଶ୍ରେଣୀ ଛାତ୍ରଛାତ୍ରୀଙ୍କ ଭାଷା, ଗଣିତ, ବିଜ୍ଞାନ ଓ ସାମାଜିକ ବିଜ୍ଞାନ ପରୀକ୍ଷା ହୋଇଥିଲା। NCERT ଏବଂ SCERT ସହାୟତାରେ ହୋଇଥିବା ଏହି ସର୍ଭେରେ ଓଡ଼ିଶା ମୋଟାମୋଟି ଭାବେ ଭଲ ପ୍ରଦର୍ଶନ କରିଛି । 
 
ରିପୋର୍ଟ ଅନୁସାରେ ସମଗ୍ର ରାଜ୍ୟରେ ଛାତ୍ରମାନେ ଛାତ୍ରୀଙ୍କଠାରୁ ସାମାନ୍ୟ ଆଗୁଆ ରହିଛନ୍ତି । କିନ୍ତୁ ସହରାଞ୍ଚଳ ପିଲାଙ୍କୁ ବହୁ ପଛରେ ପକାଇଛନ୍ତି ଗ୍ରାମାଞ୍ଚଳ ଛାତ୍ରଛାତ୍ରୀ । ସବୁଠୁ ଗୁରୁତ୍ୱପୂର୍ଣ୍ଣ କଥା ୨୪% ଛାତ୍ରଛାତ୍ରୀ ଅନୁସୂଚିତ ଜାତି ଏବଂ ଜନଜାତି ବର୍ଗର ରହିଛନ୍ତି । କଳାହାଣ୍ଡି ଓ ଅନୁଗୁଳ ଜିଲାରେ ସର୍ବାଧିକ ପିଲାଙ୍କ ପ୍ରଦର୍ଶନ ଉତ୍ତମ ରହିଛି । ସବୁଠୁ ତଳେ ରହିଛନ୍ତି ଗଜପତି ଏବଂ ମାଲକାନଗିରି ଜିଲ୍ଲା । ୧୭ ଜିଲ୍ଲାରେ ପୁଅଙ୍କଠାରୁ ଆଗୁଆ ଅଛନ୍ତି ଝିଅ। ଜାତୀୟ ଶିକ୍ଷାନୀତି ୨୦୨୦ ଲାଗୁ ପରେ ଗୁଣାତ୍ମକ ଶିକ୍ଷା କ୍ଷେତ୍ରରେ ବିକାଶ କରିବାକୁ ସରକାର ଅନେକ ପଦକ୍ଷେପ ନେଉଛନ୍ତି। ସରକାରୀ ସ୍କୁଲର ଛାତ୍ରଛାତ୍ରୀଙ୍କ ବୌଦ୍ଧିକ ବିକାଶରେ ଅଗ୍ରଗତି ହୋଇଥିବା ଏହି ରିପୋର୍ଟରୁ ଜଣାପଡୁଛି।