ପଞ୍ଚାୟତିରାଜ ଦିବସକୁ ନେଇ କେଁ; ଏପ୍ରିଲ ୨୪ରେ ଦିବସ ପାଳନ ନେଇ ସରକାରଙ୍କୁ ଘେରିଲେ ବିରୋଧୀ

କନକ ବ୍ୟୁରୋ : ପଞ୍ଚାୟତିରାଜ ଦିବସକୁ ନେଇ କେଁ । ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୟନ୍ତୀ ମାର୍ଚ୍ଚ ୫ ତାରିଖକୁ ପଞ୍ଚାୟତିରାଜ ଦିବସ ଭାବେ ଦୀର୍ଘ ବର୍ଷ ହେଲା ପାଳନ ହୋଇଆସୁଛି । ତେବେ ଚଳିତବର୍ଷ ରାଜ୍ୟ ସରକାର ମାର୍ଚ୍ଚ ୫ ବଦଳରେ ଏପ୍ରିଲ ୨୪ ତାରିଖରେ ପଞ୍ଚାୟତିରାଜ ଦିବସ ପାଳନ କରିବାକୁ ନିଷ୍ପତ୍ତି ନେଇଛନ୍ତି । ଯାହାକୁ ନେଇ ରାଜ୍ୟ ସରକାରଙ୍କୁ ଘେରିଛି ବିରୋଧୀ ଦଳ । ବିଜେଡି କହିଛି, ଏହା ସରକାରଙ୍କର ହୀନମନ୍ୟତାର ପରିଚୟ । ଜବାବରେ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ବିଜୁ ବାବୁ ଓଡ଼ିଶାର ବରପୁତ୍ର ଥିଲେ। କିନ୍ତୁ ସେ ବିଜେଡିର ସମ୍ପତ୍ତି ନଥିଲେ ।

ଦୀର୍ଘ ୨୪ ବର୍ଷ ଧରି ବିଜୁଙ୍କ ନାଁ ନେଇ ଶାସନ କରିଥିଲା ବିଜେଡି । ଯୋଜନା ହେଉ କି ନୀତି ନିଷ୍ପତିରେ ସବୁବେଳେ ବିଜୁ ପଟ୍ଟନାୟକଙ୍କ ନାଁକୁ ଆଗରେ ରଖୁଥିଲା । ହେଲେ ସତ୍ତା ବଦଳିବା ପରେ ସବୁ କିଛି ଚିତ୍ର ଧିରେ ଧିରେ ବଦଳିଯାଉଛି । ରାଜ୍ୟ ସରକାର ମାର୍ଚ୍ଚ ୫ ବଦଳରେ ଏପ୍ରିଲ ୨୪ ତାରିଖରେ ପଞ୍ଚାୟତିରାଜ ଦିବସ ପାଳନ କରିବାକୁ ନିଷ୍ପତ୍ତି ନେବା ପରେ ଚିହିଁଙ୍କି ଉଠିବା ସହିତ ରାଜ୍ୟ ସରକାରଙ୍କୁ ଘେରିଛି ବିରୋଧୀ ଦଳ ।