ଭୋକିଲା ଫିଲିସ୍ତିନୀଙ୍କ ଉପରେ ଇସ୍ରାଏଲର ଆକ୍ରମଣ, ପୁଣି ୩୯  ଜଣଙ୍କ ମୃତ୍ୟୁ

କନକ ବ୍ୟୁରୋ: ଗାଜାରେ ବଢୁଛି ଲୋକଙ୍କ ସଙ୍କଟ । ଇସ୍ରାଏଲର ଆକ୍ରମଣ ଥମିବାର ନାଁ ନେଉନାହିଁ  ।  ପୁଣି ଏକ ହୃଦୟ ବିଦାରକ ଘଟଣାରେ ସାମ୍ନାକୁ ଆସିଛି । ଫିଲିସ୍ତିନୀଙ୍କ ମୁହଁରୁ ଦାନା ଛଡାଉଛି ଇସ୍ରାଏଲ ସେନା । ଖାଦ୍ୟ  ପାଇଁ  ଧାଡିରେ ଅପେକ୍ଷା  କରିଥିବା ନିରୀହ ତଥା ଭୋକିଲା ଫିଲିସ୍ତିନୀଙ୍କ ଉପରେ ଇସ୍ରାଏଲ ସେନା ଆକ୍ରମଣ କରିଛି ।  ଯେଉଁଥିରେ ଅତି କମରେ ୩୯ ଜଣଙ୍କର ମୃତ୍ୟୁ ଘଟିଛି ଏବଂ ଶତାଧିକ ଲୋକ ଆହତ ହୋଇଛନ୍ତି ।  ଏହି ଘଟଣା ପରେ ଚାରିଆଡ଼େ ହାହାକାର ସୃଷ୍ଟି ହୋଇଛି ଏବଂ ପୀଡିତଙ୍କ ମଧ୍ୟରୁ ଜଣେ କୋହଭରା କଣ୍ଠରେ କହିଛନ୍ତି, "ଆମେ ଏଠାକୁ ରୁଟି ପାଇଁ ଆସିଥିଲୁ, କିନ୍ତୁ ଆମକୁ ଗୁଳି ମିଳିଲା" । ଆମ ଉପରେ ଫାଇରିଙ୍ଗ କରାଯାଉଛି । ମିଡିଆ ରିପୋର୍ଟ ଅନୁଯାୟୀ, ଗାଜାର ବିଭିନ୍ନ ସ୍ଥାନରେ  ଭୋକିଲା ଲୋକଙ୍କୁ ଖାଦ୍ୟ ବଣ୍ଟା ଯାଉଥିଲା । ଦୀର୍ଘ ଦିନ ଧରି ଖାଦ୍ୟ ଓ ପାଣି ପାଇଁ ସଂଘର୍ଷ କରୁଥିବା ଏହି ଲୋକମାନେ ଟିକିଏ ଖାଦ୍ୟ ପାଇବା ଆଶାରେ ଜୀବନକୁ ବାଜି ଲଗାଇ ଭିଡ଼ ଜମାଇଥିଲେ । ଠିକ୍ ଏହି ସମୟରେ ଇସ୍ରାଏଲୀ ସେନା ପକ୍ଷରୁ ସେମାନଙ୍କ ଉପରକୁ ଆକ୍ରମଣ କରାଯାଇଥିଲା । କେତେକ ରିପୋର୍ଟରେ କୁହାଯାଇଛି ଯେ ଇସ୍ରାଏଲୀ ଟ୍ୟାଙ୍କରୁ ଗୁଳି ଚଳାଯାଇଥିବା ବେଳେ, ଅନ୍ୟ କେତେକ ସ୍ଥାନରେ ବିମାନ ଆକ୍ରମଣ କରାଯାଇଥିଲା ।

ଏହି ଆକ୍ରମଣରେ ଘଟଣାସ୍ଥଳରେ ହିଁ ରକ୍ତର ନଦୀ ବୋହିଥିଲା । ଗାଜାର ସ୍ୱାସ୍ଥ୍ୟ ମନ୍ତ୍ରଣାଳୟ ଏହି ଘଟଣାକୁ ଏକ "ନରସଂହାର" ବୋଲି  କହିଛି । ମନ୍ତ୍ରଣାଳୟର ସୂଚନା ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଆକ୍ରମଣରେ ୩୯ ଜଣଙ୍କର ମୃତ୍ୟୁ ହୋଇସାରିଛି ଏବଂ ୩୦୦ରୁ ଅଧିକ ଲୋକ ଆହତ ହୋଇଛନ୍ତି, ଯେଉଁମାନଙ୍କ ମଧ୍ୟରେ ଅନେକ ମହିଳା ଓ ଶିଶୁ ଅଛନ୍ତି  ।  ତେବେ  ଏହି ଘଟଣା ପ୍ରଥମ ଥର ନୁହେଁ । ଗତ କିଛି ମାସ ଧରି ଗାଜାରେ ଏଭଳି ଦୃଶ୍ୟ ବାରମ୍ବାର ଦେଖିବାକୁ ମିଳୁଛି । ଯେତେବେଳେ ବି କୌଣସି ସ୍ଥାନରେ ରିଲିଫ୍ ସାମଗ୍ରୀ ପହଞ୍ଚୁଛି, ଭୋକିଲା ଲୋକମାନେ ସେଠାରେ ଏକାଠି ହେଉଛନ୍ତି ଏବଂ ଇସ୍ରାଏଲ ସେନା ସେମାନଙ୍କୁ ଟାର୍ଗେଟ କରୁଛି ।  ଏହା ଫଳରେ ଯେଉଁମାନେ ଯୁଦ୍ଧରୁ ବଞ୍ଚିଯାଉଛନ୍ତି, ସେମାନେ ଭୋକରେ ମରୁଛନ୍ତି କିମ୍ବା ଖାଦ୍ୟ ଖୋଜିବାକୁ ଯାଇ ଗୁଳିର ଶିକାର ହେଉଛନ୍ତି ।

ଅନ୍ୟପଟେ, ଇସ୍ରାଏଲ ସେନା  ଏହି ଆକ୍ରମଣ ପାଇଁ ହମାସକୁ ଦାୟୀ କରିଛି । ସେନାର କହିବା ଅନୁଯାୟୀ, ସେମାନେ କେବଳ ହମାସ ଆତଙ୍କବାଦୀଙ୍କୁ ଟାର୍ଗେଟ କରୁଛନ୍ତି, ଯେଉଁମାନେ ଏହି ଭିଡ଼ର ଫାଇଦା ଉଠାଇ ସାଧାରଣ ନାଗରିକଙ୍କୁ ଢାଲ ଭାବରେ ବ୍ୟବହାର କରୁଛନ୍ତି । ତେବେ ପ୍ରତ୍ୟେକ ଥର ଭଳି ଏଥର ମଧ୍ୟ ନିରୀହ ନାଗରିକମାନେ ହିଁ ଏହାର ସବୁଠାରୁ ବଡ଼ ଶିକାର ହୋଇଛନ୍ତି । ଏହି ଘଟଣା ପରେ ବିଶ୍ୱ ସ୍ତରରେ ଇସ୍ରାଏଲର ଏଭଳି କାର୍ଯ୍ୟକୁ ତୀବ୍ର ନିନ୍ଦା କରାଯାଉଛି ଏବଂ ତୁରନ୍ତ ଯୁଦ୍ଧବିରାମ ପାଇଁ ଦାବି ଜୋର ଧରିଛି । କିନ୍ତୁ ଭୋକିଲା ଫିଲିସ୍ତିନୀଙ୍କ ପାଇଁ ଏବେ ବି ଆଶାର କିରଣ ଦେଖାଯାଉନାହିଁ, କାରଣ ସେମାନଙ୍କ ପାଇଁ ରୁଟିର ଅପେକ୍ଷା ମୃତ୍ୟୁର ଆଶଙ୍କା ଅଧିକ ହୋଇଯାଇଛି ।