କନକ ବ୍ୟୁରୋ: ଜାତିସଙ୍ଘରେ ପାକିସ୍ତାନକୁ ତୀବ୍ର ସାମଲୋଚନା କଲା ଭାରତ । ପାକ୍‌କୁ ସିଧା ଟାର୍ଗେଟ୍‌ କରି ଭାରତ କହିଛି , ପାକିସ୍ତାନ କଟ୍ଟରପନ୍ଥୀ ଓ ଆତଙ୍କବାଦରେ ବୁଡ଼ି ରହିଛି । କେବଳ ଆତଙ୍କବାଦ ପ୍ରସଙ୍ଗରେ ନୁହେଁ, ବରଂ ଅନ୍ତର୍ଜାତୀୟ ମୁଦ୍ରା ପାଣ୍ଠିରୁ ବାରମ୍ବାର ଋଣ ନେବା ପ୍ରସଙ୍ଗରେ ମଧ୍ୟ ଭାରତ ପାକିସ୍ତାନକୁ ଘେରିଛି । ଆତଙ୍କବାଦ ପ୍ରସଙ୍ଗରେ ଭାରତର ଦୃଢ଼ ଆଭିମୁଖ୍ୟ ଜାତିସଂଘ ସୁରକ୍ଷା ପରିଷଦର ଏକ ବୈଠକରେ ଭାରତର ସ୍ଥାୟୀ ପ୍ରତିନିଧି ରୁଚିରା କାମ୍ବୋଜ ପାକିସ୍ତାନକୁ କଡ଼ା ଜବାବ ଦେଇ କହିଥିଲେ ଯେ ଯେଉଁ ଦେଶ ନିଜେ କଟ୍ଟରପନ୍ଥୀ, ଆତଙ୍କବାଦ ଓ ଉଗ୍ରବାଦରେ ଗଭୀର ଭାବେ ବୁଡ଼ି ରହିଛି, ତା'ର ଅନ୍ୟ କୌଣସି ଦେଶ ଉପରକୁ ଆଙ୍ଗୁଠି ଉଠାଇବାର ନୈତିକ ଅଧିକାର ନାହିଁ । ପାକିସ୍ତାନ ଦ୍ୱାରା କାଶ୍ମୀର ପ୍ରସଙ୍ଗ ଉଠାଯିବା ପରେ ଭାରତ ଏହାର ଜବାବ ଦେଇଥିଲା ।

Advertisment

ସମ୍ପ୍ରତି ପହଲଗାମ ଆତଙ୍କବାଦୀ ଆକ୍ରମଣରେ ୨୬ ଜଣ ପର୍ଯ୍ୟଟକଙ୍କ ମୃତ୍ୟୁ ଘଟିଥିବା କଥା ଉଠାଇଛି ଭାରତ । ଭାରତ 'ଅପରେସନ୍ ସିନ୍ଦୂର' ଅଧୀନରେ ପାକ୍ ଅଧିକୃତ କାଶ୍ମୀରରେ ଆତଙ୍କବାଦୀ ଶିବିରଗୁଡ଼ିକ ବିରୁଦ୍ଧରେ ନିଆଯାଇଥିବା ସଠିକ୍ କାର୍ଯ୍ୟାନୁଷ୍ଠାନ ବିଷୟରେ ସୂଚନା ଦେଇଥିଲା । ପାକିସ୍ତାନକୁ ଉଚିତ ଜବାବ ଦେଇ ଭାରତ କହିଛି, 'ପାକିସ୍ତାନ ଉଗ୍ରବାଦ ଏବଂ ଆତଙ୍କବାଦରେ ବୁଡ଼ି ରହିଛି ।' 

IMF ବୋର୍ଡରେ ଭାରତ ପ୍ରଶ୍ନ କରିଥିଲା ଯେ ଗତ ୩୫ ବର୍ଷ ମଧ୍ୟରୁ ୨୮ ବର୍ଷ ଧରି ପାକିସ୍ତାନ IMFର କୌଣସି ନା କୌଣସି କାର୍ଯ୍ୟକ୍ରମରେ ରହିଆସିଛି, ତଥାପି ଏହାର ଅର୍ଥନୀତି କାହିଁକି ସୁଧୁରୁନାହିଁ । ଭାରତ ଚିନ୍ତା ପ୍ରକଟ କରିଛି ଯେ ଏହି ଋଣର ବ୍ୟବହାର ସ୍ଥାୟୀ ଆର୍ଥିକ ସୁଧାର ବଦଳରେ ଅନାବଶ୍ୟକ କାର୍ଯ୍ୟ ଏବଂ ସମ୍ଭବତଃ ସୀମାପାର ଆତଙ୍କବାଦକୁ ପ୍ରୋତ୍ସାହନ ଦେବା ପାଇଁ କରାଯାଇପାରେ । ଭାରତ ଏହା ମଧ୍ୟ ଦର୍ଶାଇଛି ଯେ ପାକିସ୍ତାନର ଆର୍ଥିକ ନିଷ୍ପତ୍ତି ପ୍ରକ୍ରିୟାରେ ସେନାର ଅତ୍ୟଧିକ ପ୍ରଭାବ ରହିଛି, ଯାହା ସ୍ୱଚ୍ଛତା ଏବଂ ପ୍ରଭାବଶାଳୀ ସଂସ୍କାର କ୍ଷେତ୍ରରେ ଏକ ବଡ଼ ବାଧା ସୃଷ୍ଟି କରୁଛି ।