କନକ ବ୍ୟୁରୋ;  ପୃଥିବୀର ସ୍ୱର୍ଗ କୁହାଯାଉଥିବା ପହଲଗାମର ସବୁଜ ଘାଟି ଏବଂ ସୁନ୍ଦର ପରିବେଶ ଉପରେ ଆଜି ଯେମିତି ଏକ ଶୋକର କଳା ବାଦଲ ଛାଇ ଯାଇଛି । କିଛି ଦିନ ପୂର୍ବେ ଏଠାରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଏହି ସୁନ୍ଦର ପର୍ଯ୍ୟଟନ ସ୍ଥଳୀର ଚିତ୍ର ସମ୍ପୂର୍ଣ୍ଣ ବଦଳି ଯାଇଛି । ଯେଉଁଠି ଦିନେ ପର୍ଯ୍ୟଟକଙ୍କ କୋଳାହଳରେ ଫାଟି ପଡୁଥିଲା, ଆଜି ସେଠାରେ ଏକ ଅଜଣା ଭୟ ଏବଂ ଆଶଙ୍କାର ନୀରବତା ଖେଳିଯାଇଛି । ଏହି ଆକ୍ରମଣ କେବଳ କିଛି ନିରୀହ ଜୀବନ ନେଇନାହିଁ, ବରଂ ଏଠାକାର ଲୋକଙ୍କ ଜୀବିକା ଏବଂ ସ୍ୱପ୍ନକୁ ମଧ୍ୟ ଛାରଖାର କରିଦେଇଛି । 

Advertisment

ଆକ୍ରମଣ ପରଠାରୁ ପହଲଗାମର ମୁଖ୍ୟ ବଜାର ପ୍ରାୟତଃ ବନ୍ଦ ରହୁଛି । ଦୋକାନ ବଜାର ଖୋଲୁଥିଲେ ମଧ୍ୟ ଗ୍ରାହକ ନାହାନ୍ତି । ହୋଟେଲଗୁଡ଼ିକ ଖାଲି ପଡ଼ିଛି, ଟ୍ୟାକ୍ସି ଷ୍ଟାଣ୍ଡରେ ଗାଡ଼ି ଛିଡ଼ା ହୋଇ ରହିଛି ଏବଂ ଘୋଡ଼ାବାଲା ଓ ଶିକାରା ଚାଳକମାନେ ନିରାଶ ହୋଇ ବସିଛନ୍ତି । ପର୍ଯ୍ୟଟନ ହିଁ ଏଠାକାର ଅର୍ଥନୀତିର ମେରୁଦଣ୍ଡ, କିନ୍ତୁ ଏହି ଆକ୍ରମଣ ପରେ ପର୍ଯ୍ୟଟକମାନେ ନିଜର ବୁକିଂ ବାତିଲ କରିଦେଇଛନ୍ତି ।

ଏକ ସ୍ଥାନୀୟ ହୋଟେଲର ମାଲିକ ଗୁଲାମ ଅହମଦ କୋହଭରା କଣ୍ଠରେ କହନ୍ତି, "ଆମେ ଭଲ ପର୍ଯ୍ୟଟନ ଋତୁ ପାଇଁ ବର୍ଷ ତମାମ ଅପେକ୍ଷା କରିଥାଉ । ଏଥର ସବୁକିଛି ଭଲ ଚାଲିଥିଲା, କିନ୍ତୁ ଗୋଟିଏ ଘଟଣା ସବୁକିଛି ନଷ୍ଟ କରିଦେଲା । ଆମର ବ୍ୟବସାୟ ପୂରାପୂରି ଠପ୍ ହୋଇଯାଇଛି । ଆଗକୁ କେମିତି ଚଳିବୁ, ସେହି ଚିନ୍ତା ଘାରୁଛି ।" 

ଏହି ଆକ୍ରମଣର ପ୍ରଭାବ କେବଳ ବ୍ୟବସାୟ ଉପରେ ପଡ଼ିନାହିଁ, ଏହା ସାମାଜିକ ଜୀବନକୁ ମଧ୍ୟ ଗଭୀର ଭାବେ ପ୍ରଭାବିତ କରିଛି । ଗାଁରେ ଏକ ଶୋକାକୂଳ ପରିବେଶ ସୃଷ୍ଟି ହୋଇଛି, ଯେଉଁଥିପାଇଁ ଅନେକ ପରିବାର ନିଜ ଘରେ ହେବାକୁ ଥିବା ବିବାହ ଏବଂ ଅନ୍ୟାନ୍ୟ ଶୁଭ କାର୍ଯ୍ୟକୁ ସ୍ଥଗିତ ରଖିଦେଇଛନ୍ତି ।
ଜଣେ ସ୍ଥାନୀୟ ବାସିନ୍ଦା ଅବଦୁଲ ରଶିଦ କହନ୍ତି, "ଆମ ପୂରା ଗାଁ ବସିଯାଇଛି । ଯେଉଁ ପଡ଼ୋଶୀମାନଙ୍କୁ ଆମେ ହରାଇଛୁ, ସେମାନଙ୍କ ଘରେ କାନ୍ଦ ବୋବାଳି ଶୁଭୁଛି । ଏଭଳି ପରିସ୍ଥିତିରେ ଆମେ କେମିତି ଉତ୍ସବ ପାଳନ କରିବୁ? ମୋ ଭଣଜାର ବାହାଘର ଥିଲା, କିନ୍ତୁ ଆମେ ତାକୁ ବାତିଲ କରିଦେଲୁ । ଯେତେବେଳେ ପୂରା ଗାଁ ଦୁଃଖରେ ବୁଡ଼ିଛି, ସେତେବେଳେ କୌଣସି ଖୁସିର କାର୍ଯ୍ୟକ୍ରମ କରିବା ମଣିଷପଣିଆ ନୁହେଁ ।"

ଏହି ଘଟଣା ପରେ ସ୍ଥାନୀୟ ଲୋକଙ୍କ ମନରେ ଭୟର ବାତାବରଣ ସୃଷ୍ଟି ହୋଇଛି । ସେମାନେ ନିଜର ଏବଂ ନିଜ ପରିବାରର ସୁରକ୍ଷାକୁ ନେଇ ଚିନ୍ତିତ । ସୁରକ୍ଷାକର୍ମୀମାନେ ସମଗ୍ର ଅଞ୍ଚଳରେ କଡ଼ା ପହରା ଦେଉଛନ୍ତି, କିନ୍ତୁ ଲୋକଙ୍କ ମନରୁ ଭୟ ଦୂର ହୋଇପାରୁ ନାହିଁ ।  ଏହା  ସ୍ପଷ୍ଟ କରୁଛି ଯେ ଆତଙ୍କବାଦର ଗୁଳି କେବଳ ଶରୀରକୁ ରକ୍ତାକ୍ତ କରେ ନାହିଁ, ବରଂ ଏହା ଏକ ସମଗ୍ର ସମାଜର ଆତ୍ମାକୁ କ୍ଷତାକ୍ତ କରିଦିଏ । ଏହି ସୁନ୍ଦର ଉପତ୍ୟକା ଉପରେ ଲାଗିଥିବା ଏହି ଗଭୀର କ୍ଷତ ଶୁଖିବା ପାଇଁ ବୋଧହୁଏ ବହୁତ ସମୟ ଲାଗିବ ।