ପହଲଗାମ ଆକ୍ରମଣର ମାଷ୍ଟରମାଇଣ୍ଡ୍‌ ହାସିମ ମୁସା ସେନା ଗୁଳିରେ ନିପାତ

କନକ ବ୍ୟୁରୋ : ଜମ୍ମୁ ଓ କଶ୍ମୀରରେ ଆତଙ୍କବାଦ ବିରୋଧରେ ଭାରତୀୟ ସେନାକୁ ଏକ ବଡ଼ ସଫଳତା ମିଳିଛି । 'ଅପରେସନ୍ ମହାଦେବ' ଅଧୀନରେ ସୁରକ୍ଷାକର୍ମୀମାନେ ପହଲଗାମ ଆତଙ୍କବାଦୀ ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ତଥା ଲଶ୍କର-ଏ-ତୋଇବାର କୁଖ୍ୟାତ ଆତଙ୍କବାଦୀ ହାସିମ ମୁସା ଓରଫ ସୁଲେମାନକୁ ନିହତ କରିଛନ୍ତି । 

କିପରି ହେଲା ଏହି ଅପରେସନ୍?

ସୁରକ୍ଷାକର୍ମୀଙ୍କୁ ଗୁଇନ୍ଦା ସୂତ୍ରରୁ ଖବର ମିଳିଥିଲା ଯେ ପହଲଗାମ ଆକ୍ରମଣର ମାଷ୍ଟରମାଇଣ୍ଡ ହାସିମ ମୁସା ନିଜର କିଛି ସହଯୋଗୀଙ୍କ ସହ ଶ୍ରୀନଗର ନିକଟସ୍ଥ ଦାଚିଗାମ ଜାତୀୟ ଉଦ୍ୟାନର ଘଞ୍ଚ ଜଙ୍ଗଲରେ ଲୁଚି ରହିଛି । ଏହି ସୂଚନା ପାଇବା ପରେ ଭାରତୀୟ ସେନା, ଜମ୍ମୁ ଓ କଶ୍ମୀର ପୁଲିସର ସ୍ପେଶାଲ ଅପରେସନ୍ ଗ୍ରୁପ୍ ଏବଂ ସିଆରପିଏଫ୍ ମିଳିତ ଭାବେ 'ଅପରେସନ୍ ମହାଦେବ' ଆରମ୍ଭ କରିଥିଲେ । ଘଞ୍ଚ ଜଙ୍ଗଲ ଏବଂ ଦୁର୍ଗମ ଅଞ୍ଚଳ ହୋଇଥିବାରୁ ଏହି ଅପରେସନ୍ ଅତ୍ୟନ୍ତ ଚ୍ୟାଲେଞ୍ଜପୂର୍ଣ୍ଣ ଥିଲା । ସୁରକ୍ଷାକର୍ମୀମାନେ ଅଞ୍ଚଳକୁ ଘେରାବନ୍ଦୀ କରିବା ପରେ ଆତଙ୍କବାଦୀମାନେ ଗୁଳି ଚଳାଇବା ଆରମ୍ଭ କରିଥିଲେ । ଦୀର୍ଘ ସମୟ ଧରି ଚାଲିଥିବା ଏହି ଗୁଳି ବିନିମୟରେ ହାଶିମ ମୂସା ନିହତ ହୋଇଥିଲା ।

କିଏ ଏହି ହାସିମ ମୁସା ?

ହାଶିମ ମୂସା କଶ୍ମୀର ଉପତ୍ୟକାରେ ଲଶ୍କର-ଏ-ତୋଇବାର ଜଣେ ପ୍ରମୁଖ କମାଣ୍ଡର ଥିଲା । ସେ ପହଲଗାମରେ ପର୍ଯ୍ୟଟକଙ୍କ ଉପରେ ହୋଇଥିବା ଆକ୍ରମଣର ମୁଖ୍ୟ ଷଡ଼ଯନ୍ତ୍ରକାରୀ ଥିଲା । ଏହା ବ୍ୟତୀତ ସେ ସ୍ଥାନୀୟ ଯୁବକମାନଙ୍କୁ ଆତଙ୍କବାଦୀ ସଙ୍ଗଠନରେ ସାମିଲ କରିବା, ସୁରକ୍ଷାକର୍ମୀଙ୍କ ଉପରେ ଆକ୍ରମଣ ଯୋଜନା କରିବା ଏବଂ ସୀମାପାରି ଅସ୍ତ୍ରଶସ୍ତ୍ର ଆଣିବା ଭଳି ଅନେକ ମାମଲାରେ ସମ୍ପୃକ୍ତ ଥିଲା ।

ଏହି ସଫଳତାକୁ କଶ୍ମୀରରେ ଶାନ୍ତି ଫେରାଇ ଆଣିବା ଦିଗରେ ଏକ ବଡ଼ ପଦକ୍ଷେପ ବୋଲି କୁହାଯାଉଛି । ସୁରକ୍ଷାକର୍ମୀମାନେ ଘଟଣାସ୍ଥଳରୁ ଏକେ-୪୭ ରାଇଫଲ ସମେତ ବହୁ ପରିମାଣର ଅସ୍ତ୍ରଶସ୍ତ୍ର ଓ ବିସ୍ଫୋରକ ଜବତ କରିଛନ୍ତି ।