କନକ ବ୍ୟୁରୋ : ୨୦୧୯ ମସିହା, ସେତେବେଳେ ରାଜ୍ୟରେ ବିଜେଡି ସରକାର ଶାସନ କରୁଥିଲା । ଏହି ସମୟରେ ଶ୍ରୀମନ୍ଦିରକୁ ଏକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ । ଶ୍ରୀମନ୍ଦିରରେ ଜଣେ ପୂର୍ଣ୍ଣକାଳୀନ ପ୍ରଶାସକ ରହିବେ ଏବଂ ତାଙ୍କୁ ଅନ୍ୟ କୌଣସି ଦାୟିତ୍ୱ ଦିଆଯିବ ନାହିଁ । ଏବେ ନୂଆ ସରକାର ଶାସନ ଭାର ହାତକୁ ନେଇ ଏକ ବର୍ଷରୁ ଅଧିକ ସମୟ ବିତି ଗଲାଣି । ହେଲେ ବର୍ତ୍ତମାନ ସୁଦ୍ଧା ସୁପ୍ରିମକୋର୍ଟଙ୍କ ସେହି ନିର୍ଦ୍ଦେଶକୁ ଅନୁପାଳନ କରିବାକୁ କାହାରି ଆନ୍ତରିକତା ନଥିବା ଭଳି ମନେ ହେଲାଣି । 

Advertisment

ଗତ ସରକାର ସମୟରେ ସ୍ୱଳ୍ପ ସମୟ ପାଇଁ ଶ୍ରୀମନ୍ଦିରରେ ଜଣେ ପୂର୍ଣ୍ଣକାଳୀନ ପ୍ରଶାସକଙ୍କୁ ଦାୟିତ୍ୱ ଦିଆଯାଇଥିଲା । କିନ୍ବୁ ବର୍ଷକ ମଧ୍ୟରେ ତାଙ୍କୁ ଅନ୍ୟତ୍ର ବଦଳି କରିଦେଇଥିଲେ ତତ୍କାଳୀନ ବିଜେଡି ସରକାର । ୨୦୧୯ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଏହାକୁ ଲାଗୁ କରିବାକୁ ୩ ବର୍ଷ ସମୟ ଲାଗିଥିଲା । ଗତ ୨୦୨୩ ମସିହା ଏପ୍ରିଲ୍ ୩୦ରେ ଶ୍ରୀମନ୍ଦିର କାର୍ଯ୍ୟାଳୟରେ ମୁଖ୍ୟ ପ୍ରଶାସକ ଭାବରେ ଯୋଗ ଦେଇଥିଲେ ରଞ୍ଜନ ଦାସ । ହେଲେ ଏକ ବର୍ଷରୁ ବି କମ ସମୟ ମଧ୍ୟରେ ତାଙ୍କୁ ଅନ୍ୟତ୍ର ବଦଳି କରାଯାଇଥିଲା । ସେବେଠାରୁ ଆଜିଯାଏଁ ଶ୍ରୀମନ୍ଦିରର କେହି ପୂର୍ଣ୍ଣକାଳୀନ ମୁଖ୍ୟ ପ୍ରଶାସକ ଦାୟିତ୍ୱରେ ରହିନାହାନ୍ତି । ଏହାର ପ୍ରଭାବ ଶ୍ରୀମନ୍ଦିର ନୀତିକାନ୍ତିରେ ପଡ଼ୁଥିବା ଦେଖିବାକୁ ମିଳୁଛି । ପୂର୍ବାପେକ୍ଷା ଏବେ ଶ୍ରୀମନ୍ଦିର ନୀତିକାନ୍ତିରେ ଅଧିକ ବିଭ୍ରାଟ ହେଉଛି । 

ଅତିରିକ୍ତ ଦାୟିତ୍ୱ ଭାବେ ଶ୍ରୀମନ୍ଦିର ମୁଖ୍ୟ ପ୍ରଶାସକ ପଦବିରେ ନିଯୁକ୍ତି ଦିଆଯାଉଥିବା ନୀତିରେ ବିଭ୍ରାଟ ହେଉଛି । ଶ୍ରୀମନ୍ଦିରରେ ନୀତି ଶୃଙ୍ଖଳିତ କରିବାକୁ ୪ ଜଣ ଅଧିକାରୀ ରହିଛନ୍ତି । ୩ ଜଣଙ୍କୁ ଅବସର ପରେ ଦାୟିତ୍ୱ ଦିଆଯାଇଥିବା ବେଳେ ଜଣେ ନିୟମିତ ପ୍ରଶାସକ ଅଛନ୍ତି । ନୀତିରେ କୌଣସି ସୁଧାର ଆସିପାରୁନାହିଁ । ଚଳିତବର୍ଷ ନୀତି ବାତିଲ ହେବା ଓ ରାତିରେ ପହୁଡ଼ ନହେବାରେ ରେକର୍ଡ ହୋଇଛି । ଗତବର୍ଷ ଭୋଗଲାଗି ହୋଇନପାରିବାରୁ ଠାକୁରଙ୍କୁ ଉପାସ ରହିବାକୁ ପଡ଼ିଛି । 

ପତିତପାବନଙ୍କ ମଙ୍ଗଳଆଳତି ସୂର୍ଯ୍ୟୋଦୟ ପୂର୍ବରୁ ହେବା କଥା, ତାହା ହୋଇପାରୁନି । ପୂର୍ବରୁ ମଙ୍ଗଳ ଆଳତି ଭୋର ୪ଟାରୁ ୫ଟା ମଧ୍ୟରେ ହେଉଥିଲା । ଜୁଲାଇ ୧ ତାରିଖରୁ ଏବେଯାଏଁ ହାରାହାରି ସକାଳ ୭ଟା ୧୦ ମିନିଟ୍‌ରେ ମଙ୍ଗଳଆଳତି ହେଉଛି । ଛାମୁ ଖୁଣ୍ଟିଆ ନିଯୋଗ ସଭାପତିଙ୍କ ମତରେ ସୂର୍ଯ୍ୟୋଦୟ ପରେ ମଙ୍ଗଳଆଳତି ହେଲେ ଅଘଟଣ ଘଟିବ । ମଙ୍ଗଳଆଳତି ସମୟରେ ଦିନଟିଏ ହେଲେ ପ୍ରଶାସକ ଉପସ୍ଥିତ ରହୁଥିବା ଦେଖାଯାଉନି । ମହାପ୍ରଭୁଙ୍କ ୨୨ ହଜାର ଏକର ଜମି ଠାବ ହୋଇପାରିନି । ସରକାରୀ ବାବୁ ତହସିଲଦାରମାନଙ୍କୁ ଚିଠି ଲେଖି ଚୁପ ହୋଇ ବସି ଯାଇଛନ୍ତି । ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ବି ବେଦାନ୍ତକୁ ବିକ୍ରି ହୋଇଥିବା ୬୦୭ ଏକର ଜମି ଫେରାଇ ଅଣା ଯାଇପାରୁନି । ଖାଲି ସେତିକି ନୁହେଁ ପୁରୀ ସହରରେ ଭିଟାମାଟି ସମସ୍ୟାର ସମାଧାନ ହୋଇପାରୁନି । ଏଭଳି ଯାବତୀୟ ସମସ୍ୟା ରହିଥିଲେ ସୁଦ୍ଧା ଏଥିପ୍ରତି କେହି ଦୃଷ୍ଟି ଦେଉନାହାନ୍ତି ।