ରାହୁଲଙ୍କୁ କହିବାକୁ ନ ଦେବା ଅଭିଯୋଗ : ଓମ୍ ବିର୍ଲାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବାକୁ ବିରୋଧୀ ହେଉଛନ୍ତି ପ୍ରସ୍ତୁତ

କନକବ୍ୟୁରୋ : ସଂସଦର ବଜେଟ ଅଧିବେଶନରେ ଶାସକ ଦଳ ଓ ବିରୋଧୀ ଦଳ ମଧ୍ୟରେ ଚାଲିଥିବା ବିବାଦ ଏବେ ଏକ ବଡ଼ ମୁହାଁମୁହିଁ ସ୍ଥିତିକୁ ଆସିଛି ।  ବିରୋଧୀ ଦଳଗୁଡ଼ିକ ଏକଜୁଟ୍ ହୋଇ ଲୋକସଭା ବାଚସ୍ପତି ଓମ୍ ବିର୍ଲାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବାକୁ ଯୋଜନା କରୁଛନ୍ତି ।  ସୂତ୍ର ଅନୁସାରେ, ବିରୋଧୀ ଦଳଗୁଡ଼ିକ ଅସନ୍ତୋଷ ପ୍ରକାଶ କହିଛନ୍ତି, ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ଗୃହରେ କହିବା ପାଇଁ ପର୍ଯ୍ୟାପ୍ତ ସୁଯୋଗ ଦିଆଯାଉନାହିଁ ।

ଏହି ପ୍ରସ୍ତାବ ଉପରେ ବିରୋଧୀ ଦଳଗୁଡ଼ିକ ମଧ୍ୟରେ ଏନେଇ ସହମତି ହୋଇଛି। ସଦସ୍ୟମାନଙ୍କ ସ୍ୱାକ୍ଷରକୁ ଅପେକ୍ଷା କରାଯାଇଛି। ଯଦିଓ କୌଣସି ଦଳ ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ଏହା ସାର୍ବଜନୀନ ଭାବରେ ଘୋଷଣା କରିନାହାନ୍ତି। ତଥାପି ଗୃହ ମଧ୍ୟରେ ବିରୋଧୀ ସାଂସଦମାନଙ୍କ ଆକ୍ରମଣାତ୍ମକ ମନୋଭାବ ସ୍ପଷ୍ଟ ଭାବରେ ଏହା ସୂଚାଇ ଦେଉଛି ବୋଲି କିଛି ରାଜନୈତିକ ସମୀକ୍ଷକ ମତପୋଷଣ କରିଛନ୍ତି । 

ଗୃହରେ ପ୍ରବଳ ହଟ୍ଟଗୋଳ, କାର୍ଯ୍ୟକାଳ ମୁଲତବୀ

ସୋମବାର ବଜେଟ ଅଧିବେଶନର ନବମ ଦିନ ପ୍ରବଳ ହଟ୍ଟଗୋଳ ସହିତ ଆରମ୍ଭ ହୋଇଥିଲା। ବାଚସ୍ପତି ଓମ୍ ବିର୍ଲା ପ୍ରଥମେ ଭାରତୀୟ ଦଳକୁ ୧୯ ବର୍ଷରୁ କମ୍ କ୍ରିକେଟ ବିଶ୍ୱକପ୍ ଜିତିବା ପାଇଁ ଅଭିନନ୍ଦନ ଜଣାଇଥିଲେ। ଯାହାକୁ ସମସ୍ତ ସଦସ୍ୟଙ୍କ ଦ୍ୱାରା ପ୍ରଶଂସା କରାଯାଇଥିଲା। ପ୍ରଶ୍ନକାଳ ଆରମ୍ଭ ହେବା ମାତ୍ରେ କଂଗ୍ରେସ ସଦସ୍ୟମାନେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ କହିବାକୁ ଦେବା ନେଇ ଦାବି କରିବା ଆରମ୍ଭ କରିଥିଲେ।

ଅଧିକ ପଢନ୍ତୁ... ମହିଳା ମାନବାଧିକାର କର୍ମୀଙ୍କୁ ଗିରଫ: ଚୀନ୍‌କୁ ଚେତାବନୀ ଦେଲା ଜାତିସଂଘ

ହଟ୍ଟଗୋଳ ଏତେ ବୃଦ୍ଧି ପାଇଥିଲା ଯେ, ଗୃହ ଆରମ୍ଭ ହେବାର ମାତ୍ର ପାଞ୍ଚ ମିନିଟ୍ ପରେ, ଗୃହକୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ମୁଲତବୀ ରଖିବାକୁ ପଡିଥିଲା। ବିରୋଧୀ ଦଳ ଅଭିଯୋଗ କରିଛନ୍ତି, ସେମାନଙ୍କୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ କହିବାରୁ ବାରଣ କରାଯାଉଛି। ଅପରପକ୍ଷରେ ଶାସକ ଦଳ ଦାବି କରୁଛି, ବିରୋଧୀ ଦଳ ଯୋଜନାବଦ୍ଧ ଭାବରେ ଗୃହ କାର୍ଯ୍ୟରେ ବାଧା ସୃଷ୍ଟି କରୁଛନ୍ତି।

ବାଚସ୍ପତିଙ୍କ ଯୁକ୍ତି ପ୍ରଶ୍ନକାଳ ସାଂସଦଙ୍କ ସମୟ, ଗୃହ ନିୟମ ଅନୁଯାୟୀ ଚାଲିବ
ହଟ୍ଟଗୋଳ ମଧ୍ୟରେ, ଲୋକସଭା ବାଚସ୍ପତି ଓମ୍ ବିର୍ଲା ବିରୋଧୀ ସାଂସଦମାନଙ୍କୁ ଶାନ୍ତ କରିବାକୁ ଚେଷ୍ଟା କରିଥିଲେ। ସେ ସ୍ପଷ୍ଟ କରିଥିଲେ ଯେ, ପ୍ରଶ୍ନକାଳ ସମୟରେ କେବଳ ପ୍ରଶ୍ନ ପଚରାଯାଏ ଓ ଅନ୍ୟ କୌଣସି ପ୍ରସଙ୍ଗକୁ ଅନୁମତି ଦିଆଯାଏ ନାହିଁ। ସେ ଆବେଦନ କରିଥିଲେ, ପ୍ରଶ୍ନକାଳ ସାଂସଦମାନଙ୍କର ନିଜସ୍ୱ ସମୟ ଓ ଏହାକୁ ବାଧାପ୍ରାପ୍ତ କରାଯିବା ଉଚିତ ନୁହେଁ।

ବିର୍ଲା ପ୍ରତିଶ୍ରୁତି ଦେଇଛନ୍ତି, ବିରୋଧୀ ଦଳ ନେତା ଓ ଅନ୍ୟ ସମସ୍ତ ସଦସ୍ୟଙ୍କୁ ନିର୍ଦ୍ଧାରିତ ସମୟ ଅନୁଯାୟୀ ବଜେଟ ଆଲୋଚନା କିମ୍ବା ଶୂନ୍ୟ କାଳରେ ସେମାନଙ୍କର ମତାମତ ପ୍ରକାଶ କରିବା ପାଇଁ ପୂର୍ଣ୍ଣ ସୁଯୋଗ ଦିଆଯିବ। ସେ ଗୁରୁତ୍ୱାରୋପ କରିଥିଲେ, ଗୃହ ନିୟମ ଓ ପ୍ରକ୍ରିୟା ଅନୁସାରେ ଚାଲିଥାଏ। ଏହାକୁ ସ୍ଲୋଗାନ ପାଇଁ ବ୍ୟବହାର କରାଯିବା ଉଚିତ ନୁହେଁ।