ମୌସୁମୀ ଅଧିବେଶନର ପ୍ରଥମ ଦିନରୁ ବିରୋଧୀଙ୍କ ପ୍ରବଳ ହଟ୍ଟଗୋଳ, ଗୃହରେ ସ୍ୱର ଚପାଯାଉଥିବା ବିରୋଧୀଙ୍କ ଅଭିଯୋଗ

କନକ ବ୍ୟୁରୋ : ସଂସଦର ମୌସୁମୀ ଅଧିବେଶନ ଆଜିଠାରୁ ଆରମ୍ଭ ହୋଇଛି । ଆରମ୍ଭରୁ ସରଗରମ ରହିଛି ଉଭୟ ଲୋକସଭା ଓ ରାଜ୍ୟସଭା । ଉଭୟ ଗୃହ ବାରମ୍ୱାର ମୁଲତବୀ ରହିଛି । ପହଲଗାମ୍ ଆତଙ୍କୀ ଆକ୍ରମଣ, ଅପରେସନ ସିନ୍ଦୂର, ଭାରତ- ପାକିସ୍ତାନ ଅସ୍ତ୍ରବିରତି, ଏଥିରେ ପ୍ରମୁଖ ଭୂମିକା ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦାବି, ଏୟାର ଇଣ୍ଡିଆ ବିମାନ ଦୁର୍ଘଟଣା ଆଦି ବିଭିନ୍ନ ପ୍ରସଙ୍ଗରେ  ଆଲୋଚନା ପାଇଁ ବିରୋଧୀ ଦାବି କରିଥିଲେ ।

ବିଭିନ୍ନ ପ୍ରସଙ୍ଗରେ ଆଲୋଚନା ପାଇଁ କଂଗ୍ରେସ ପକ୍ଷରୁ ନୋଟିସ ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନିଜେ ଉଭୟ ଗୃହରେ ଉତ୍ତର ଦେବାକୁ ବିରୋଧୀ ଦାବି କରିଛନ୍ତି । ମୁଖ୍ୟ ପ୍ରସଙ୍ଗ ରହିଛି ପହଲଗାମ ଆକ୍ରମଣ, ଅପରେସନ ସିନ୍ଦୂର ଓ ଟ୍ରମ୍ପଙ୍କ ମଧ୍ୟସ୍ଥତା ଭୂମିକା । ବିହାରରେ ଭୋଟର ତାଲିକା ସଂଶୋଧନ ପ୍ରସଙ୍ଗ ମଧ୍ୟ ସଂସଦରେ ଉଠିଛି । ଏସବୁ ଉପରେ ସରକାର ଆଭିମୁଖ୍ୟ ସ୍ପଷ୍ଟ କରିବାକୁ  ବିରୋଧୀ ଦାବି କରିଛନ୍ତି ।

ସବୁ ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ ବୋଲି ସରକାର ସଂକେତ ଦେଇଥିଲେ ସଂସଦରେ ଏହାର କୌଣସି ପ୍ରଭାବ ପଡ଼ିନାହିଁ । ସଂସଦର ମୌସୁମୀ ଅଧିବେଶନ ଅଗଷ୍ଟ ୨୧ ପର୍ଯ୍ୟନ୍ତ ଚାଲିବ। ଏଥିରେ ବିଭିନ୍ନ ବିଲ୍ ପାସ୍ ପାଇଁ ଲକ୍ଷ୍ୟ ରଖିଛନ୍ତି ସରକାର । ଉଭୟ ଗୃହ ସାରା ଅଧିବେଶନରେ ସରଗରମ ରହିବା ସମ୍ଭାବନା ଅଛି।