ଲୋକସଭାରେ ରାଜନାଥଙ୍କ ବର୍ଷଣ : ଅପରେସନ ସିନ୍ଦୂର ପ୍ରସଙ୍ଗରେ ରାହୁଲ ଗାନ୍ଧୀଙ୍କୁ କଲେ ଟାର୍ଗେଟ୍‌

କନକ ବ୍ୟୁରୋ : ଲୋକସଭାରେ ଅପରେସନ ସିନ୍ଦୂର ପ୍ରସଙ୍ଗରେ ଆଲୋଚନା ସମୟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ କଡ଼ା ସମାଲୋଚନା କରିଛନ୍ତି । ଏୟାର ଷ୍ଟ୍ରାଇକ୍ ପ୍ରସଙ୍ଗ ଉଠାଇ ସେ କହିଛନ୍ତି ଯେ ବିରୋଧୀ ଦଳ, ବିଶେଷକରି ରାହୁଲ ଗାନ୍ଧୀ, ସେନା ଏବଂ ସରକାରଙ୍କ କାର୍ଯ୍ୟ ଉପରେ କେବେ ବି ପ୍ରଶଂସା କରିନାହାନ୍ତି ବରଂ ପ୍ରଶ୍ନ ଉଠାଇଛନ୍ତି ।

ରାଜନାଥ ସିଂହ ଗୃହରେ କହିଛନ୍ତି, "ଯେତେବେଳେ ଆମର ବାୟୁସେନା ପାକିସ୍ତାନର ଆତଙ୍କବାଦୀ ଶିବିରକୁ ଧ୍ୱଂସ କରିଦେଇଥିଲା , ସେତେବେଳେ ସାରା ଦେଶ ସେନାର ପରାକ୍ରମକୁ ସଲାମ କରୁଥିଲା । କିନ୍ତୁ କଂଗ୍ରେସର ନେତାମାନେ ପ୍ରମାଣ ମାଗୁଥିଲେ । ସେମାନେ ଏହା ପଚାରୁଥିଲେ ଯେ କେତେଜଣ ଆତଙ୍କବାଦୀ ମଲେ ? ମୁଁ କହିବାକୁ ଚାହେଁ, ବାୟୁସେନାର କାମ ଆତଙ୍କବାଦୀଙ୍କ ମୃତ ଦେହ ଗଣିବା ନୁହେଁ, ଆତଙ୍କବାଦୀଙ୍କୁ ସଫା କରିବା ।"

ସେ ଆହୁରି ମଧ୍ୟ କହିଛନ୍ତି, "ସେମାନେ ଆମକୁ କେବେହେଲେ ଏହା ପଚାରି ନାହାନ୍ତି ଯେ ଆମ ସେନା ଶତ୍ରୁର କେତୋଟି ବିମାନ ଖସାଇ ଦେଇଛି କିମ୍ବା କେତେ ଅନୁପ୍ରବେଶକାରୀଙ୍କୁ ମାରିଛି । ସେମାନଙ୍କର କେବଳ ଗୋଟିଏ କାମ, ସରକାର ଏବଂ ସେନାର ମନୋବଳକୁ ଭାଙ୍ଗିବା ।"

ପ୍ରତିରକ୍ଷା ମନ୍ତ୍ରୀ ସ୍ପଷ୍ଟ ଭାବରେ କହିଛନ୍ତି ଯେ ମୋଦୀ ସରକାରଙ୍କ ନେତୃତ୍ୱରେ ଭାରତର ସୁରକ୍ଷା ନୀତିରେ ବଡ଼ ପରିବର୍ତ୍ତନ ଆସିଛି । ବର୍ତ୍ତମାନ ଭାରତ କେବଳ ନିଜ ସୀମା ଭିତରେ ନୁହେଁ ବରଂ ଆବଶ୍ୟକ ପଡ଼ିଲେ ସୀମା ପାର କରି ଶତ୍ରୁକୁ ଜବାବ ଦେବାକୁ ମଧ୍ୟ ସକ୍ଷମ । ତାଙ୍କର ଏହି ବୟାନକୁ ଗୃହରେ ଶାସକ ଦଳର ସଦସ୍ୟମାନେ ଜୋରଦାର ସମର୍ଥନ କରିଥିଲେ ।