ଜୟପୁରରେ ଖାଦ୍ୟ ଷ୍ଟଲ ଉପରେ ମାଡ଼ିଗଲା ଅଡି, ଜଣେ ମୃତ, ୧୮ ଆହତ

କନକ ବ୍ୟୁରୋ : ରାଜସ୍ଥାନର ଜୟପୁରରେ ଏକ ଅଡି କାର୍‌ ଶୁକ୍ରବାର ରାତିରେ ଆତଙ୍କ ସୃଷ୍ଟି କରିଛି । କାର୍‌ର ଡ୍ରାଇଭର ନିୟନ୍ତ୍ରଣ ହରାଇ ଜନଗହଳିପୂର୍ଣ୍ଣ ମାନସରୋବର ଅଞ୍ଚଳରେ ରାସ୍ତାରେ ଯାଉଥିବା ଲୋକ ଏବଂ ରାସ୍ତାକଡ଼ରେ ଥିବା ଖାଦ୍ୟ ଷ୍ଟଲ ଉପରେ ମାଡ଼ି ଯାଇଥିଲା । ଫଳରେ ଘଟଣାସ୍ଥଳରେ ଜଣଙ୍କର ମୃତ୍ୟୁ ହୋଇଥିବାବେଳେ ୪ ଜଣ ଗୁରୁତର ଭା‌ବେ ଆହତ ହୋଇଛନ୍ତି । ଦୁର୍ଘଟଣା ରାତି ୯ଟା ୩୦ ସମୟରେ ପତ୍ରକର କଲୋନୀ ପୁଲିସ ଷ୍ଟେସନ ଅଞ୍ଚଳରେ ଘଟିଛି । ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁଯାୟୀ, ଅଡି କାର୍‌ଟି ଅନ୍ୟ ଏକ କାର୍‌ ସହିତ ପ୍ରତିଯୋଗିତା କରୁଥିଲା । ଗାଡ଼ିର ବେଗ ଘଣ୍ଟାକୁ ୧୨୦ କିମି ରହିଥିବା ଅନୁମାନ କରାଯାଇଛି । ଗାଡ଼ି ରାସ୍ତାରେ ଥିବା ଡିଭାଇଡର ସହିତ ପିଟି‌ ହୋଇ ନିୟନ୍ତ୍ରଣ ହରାଇବା ପରେ ୩୦ ମିଟର ଦୂର ପର୍ଯ୍ୟନ୍ତ ଅଞ୍ଚଳରେ ରହିଥିବା ଖାଦ୍ୟ ଷ୍ଟଲ ଉପରେ ଚଢ଼ି ଯାଇଥିଲା । 

୫୦ରୁ ଅଧିକ ଲୋକ ଘଟଣାସ୍ଥଳରେ ଉପସ୍ଥିତ ଥିବାବେଳେ ପାଖାପାଖି ୧୮ ଜଣଙ୍କ ଉପରେ ଅଡି କାର୍‌ଟି ଚଢ଼ି ଯାଇଥିଲା । ଦୁର୍ଘଟଣା ପରେ ଡ୍ରାଇଭର ସମେତ ଅଡି କାରରେ ବସିଥିବା ୩ ଜଣ ଫେରାର୍‌ ହୋଇଯାଇଥିଲେ । ସେମାନଙ୍କ ମଧ୍ୟରେ ଜୟପୁର ପୁଲିସର ଜଣେ କନଷ୍ଟେବଲ ମଧ୍ୟ ଅଛନ୍ତି । ଚତୁର୍ଥ ବ୍ୟକ୍ତିକୁ ଘଟଣାସ୍ଥଳରୁ ଧରି ପୁଲିସର ଜିମା ଦିଆଯାଇଥିଲା । ପ୍ରାଥମିକ ତଦନ୍ତରୁ କାର୍‌ରେ ଥିବା ଚାରି ଜଣ ଯାକ ଲୋକ ଦୁର୍ଘଟଣା ସମୟରେ ନିଶାସକ୍ତ ଅବସ୍ଥାରେ ଥିଲେ ବୋଲି ଜଣାପଡ଼ିଛି। ୮ ଜଣ ଆହତଙ୍କୁ ଜୟପୁରିଆ ହସ୍ପିଟାଲରେ ଭର୍ତ୍ତି କରାଯାଇଛି । ଚାରି ଜଣ ଗୁରୁତର ଆହତଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଛି । ଚାରି ଜଣଙ୍କୁ ଘଟଣାସ୍ଥଳରେ ଚିକିତ୍ସା ଯୋଗାଇ ଦିଆଯାଇଥିଲା।  ଅଡି କାର୍‌ଟି ଡାମନ ଓ ଡିୟ ନମ୍ବରରେ ପଞ୍ଜିକୃତ ହୋଇଛି। ଗାଡ଼ି ଦିନେଶ ରନୱା ଚଳାଉଥିବା ପପୁ କହିଛନ୍ତି । ମୁଖ୍ୟମନ୍ତ୍ରୀ ଭଜନଲାଲ ଶର୍ମା ଅଧିକାରୀଙ୍କୁ ତୁରନ୍ତ ଘଟଣାସ୍ଥଳରେ ପହଞ୍ଚି ଘଟଣାର ସମୀକ୍ଷା କରିବାକୁ କହିଛନ୍ତି ।