ବିପଦରେ ଜଙ୍ଗଲର ରାଜା, ବିଶ୍ବ ବ୍ୟାଘ୍ର ଦିବସରେ ବାଘ ଚିନ୍ତା

କନକ ବ୍ୟୁରୋ : ଓଡ଼ିଶା ଜଙ୍ଗଲରେ ଶୁଭୁନି ମହାବଳର ଗର୍ଜନ । ବିସ୍ତୀର୍ଣ୍ଣ ଜଙ୍ଗଲ ପଡ଼ିଛି, କିନ୍ତୁ ବାଘଙ୍କ ସଂଖ୍ୟା କମି କମି ଚାଲିଛି । ବ୍ୟାଘ୍ର ବଂଶ ବୃଦ୍ଧି ପାଇଁ ଯୋଜନା ପରେ ଯୋଜନା ହେଉଛି । ବିଭିନ୍ନ ରାଜ୍ୟରୁ ବାଘ ଅଣାଯାଉଛି । ହେଲେ ଜଙ୍ଗଲରେ ବାଘଙ୍କ ବଦଳରେ ବଢ଼ିଛି ଶିକାରୀଙ୍କ ରାଜୁତି । ବିଭିନ୍ନ ସମୟରେ ବାଘ ଛାଲ ଜବତ ସୂଚାଇ ଦେଇଛି ଓଡ଼ିଶା ଜଙ୍ଗଲରେ ସୁରକ୍ଷିତ ନାହାନ୍ତି ମହାବଳ । ମହାବଳ ବାଘଙ୍କ ବିନା ଖାଁ ଖାଁ ସାତକୋଶିଆ ବ୍ୟାଘ୍ର ଅଭୟାରଣ୍ୟ । ସ୍ଥିତି ଏମିତି ରହିଲେ ଆଗକୁ ମାନ୍ୟତା ରହିବ କି ନାହିଁ ସନ୍ଦେହରେ । ପ୍ରସ୍ତାବିତ ଦୁଇ ବ୍ୟାଘ୍ର ଅଭୟାରଣ୍ୟ ଡେବ୍ରିଗଡ଼ ଓ ସୁନାବେଡ଼ାରେ କେବଳ କଲରାପତରିଆ ବାଘ ଦୌଡ଼ୁଛନ୍ତି । କେନ୍ଦୁଝର, ହୀରାକୁଦ ଓ ପାରଳାଖେମୁଣ୍ଡି ବନଖଣ୍ଡରେ ମହାବଳ ଦେଖିବାକୁ ମିଳୁଛନ୍ତି, କିନ୍ତୁ ସରକାରୀ ଖାତାରେ ହିସାବ ନାହିଁ । 

ମଧ୍ୟପ୍ରଦେଶ, ମହାରାଷ୍ଟ୍ର, କର୍ଣ୍ଣାଟକ, ଉତ୍ତରାଖଣ୍ଡ ବାଘ ବଂଶ ବୃଦ୍ଧି କରିବାରେ ସଫଳ ହୋଇଛନ୍ତି । ଓଡ଼ିଶାରେ ବାଘ ବଂଶ ବୃଦ୍ଧି କରିବାକୁ ଏକ ଦଶନ୍ଧି ହେବ ଯୋଜନା ଚାଲିଛି କିନ୍ତୁ ସଫଳତା ଶୂନ । ସାତକୋଶିଆରେ ଦେଶର ପ୍ରଥମେ ଅନ୍ତଃରାଜ୍ୟ ବାଘ ସ୍ଥାନାନ୍ତରଣ ଯୋଜନା ଫେଲ୍ ମାରିଛି । ସୁନ୍ଦରୀ ଫେରିଗଲା, ମହାବୀର ମରିଗଲା । ଓଡ଼ିଶାର ଶିମିଳିପାଳରେ କେବଳ ମହାବଳ ବାଘ ଏବେ ସ୍ଥିତି ଜାହିର କରୁଛନ୍ତି । ଏଠାରେ ବାଘ ବଂଶ ବୃଦ୍ଧି ପାଇଁ ମହାରାଷ୍ଟ୍ରରୁ ଦୁଇଟି ବାଘୁଣୀକୁ ଆଣି ଛଡ଼ାଯାଇଛି । ଖୁବଶୀଘ୍ର ବାଘୁଣୀ ଜିନ୍ନତ ମା’ ହେବା ସହ ବାଘ ବଂଶ ବୃଦ୍ଧି ଦିଗରେ ଓଡ଼ିଶା ଗୋଟିଏ ପାଦ ଆଗକୁ ବଢ଼ିବ । ୨୦୩୬ ସୁଦ୍ଧା ଶିମିଳିପାଳରେ ବାଘ ସଂଖ୍ୟାକୁ ଶହେରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି । ଡେବ୍ରିଗଡ଼ରେ ମହାବଳ ଛାଡ଼ିବାକୁ କ୍ଷେତ୍ର ପ୍ରସ୍ତୁତି ହେଉଛି । ଏହାସହ ସାତକୋଶିଆକୁ ୧୨ ବାଘ ଆଣିବାକୁ ସରକାର ଯୋଜନା କରୁଛନ୍ତି । ହେଲେ ଏଥିରେ ବଡ଼ ବାଧକ ସାଜିଛି ଏନ୍‌ଟିସିଏର ସର୍ତ୍ତ ।