କୁହୁଡ଼ି ପାଇଁ ଏସ୍‌ଟିଏର ସତର୍କତା; ଲମ୍ବା ଯାତ୍ରା କରୁଥିଲେ ମଝିରେ ମଝିରେ ନିଅନ୍ତୁ ବିଶ୍ରାମ

କନକ ବ୍ୟୁରୋ : ଶୀତ ଦିନେ ଗାଡ଼ି ଚଳାଇବାବେଳେ ସତର୍କ ରୁହନ୍ତୁ । କୁହୁଡ଼ି ସମୟରେ ଗାଡ଼ି ଚଳାଇଲେ ଦୁର୍ଘଟଣା ହେବାର ସମ୍ଭାବନା ରହିଛି । ସାବଧାନତା ସହ ଗାଡ଼ି ଚଳାଇବାକୁ ଏଭଳି ପରାମର୍ଶ ଦେଇଛି ରାଜ୍ୟ ପରିବହନ ପ୍ରାଧିକରଣ । ରାତି ଓ ଭୋର ସମୟରେ କୁହୁଡ଼ି ଯୋଗୁଁ ରାସ୍ତା ଠିକ ଭାବେ ଦେଖାଯାଏ ନାହିଁ, ଯାହା ଦୁର୍ଘଟଣାର କାରଣ ହୁଏ ।

ଦୀର୍ଘ ସମୟ ଧରି ଗାଡ଼ି ଚଳାଉଥିଲେ ମଝିରେ ମଝିରେ ଟିକେ ଅଟକିଯାଇ ବିଶ୍ରାମ ନେବାକୁ ପରାମର୍ଶ ଦେଇଛି ଏସଟିଏ । ସୋସିଆଲ ମିଡିଆରେ ଏଭଳି ସତର୍କ ସୂଚନା ଜାରି କରିଛି । ଗତ କିଛି ଦିନ ତଳେ ରାଜ୍ୟ ପରିବହନ ପ୍ରାଧିକରଣ ଏନେଇ ଏସଓପି ମଧ୍ୟ ଜାରି କରିଥିଲା । ୧୬ ନଭେମ୍ବରରୁ ୨୮ ଫେବୃଆରୀ ପର୍ଯ୍ୟନ୍ତ ବିଶେଷ ଅଭିଯାନ ପାଇଁ ରାଜ୍ୟର ସମସ୍ତ ଆରଟିଓଙ୍କୁ ଏସଓପି ପାଳନ କରିବାକୁ ନିର୍ଦ୍ଦେଶ ରହିଛି ।

ଅଧିକ ପଢ଼ନ୍ତୁ : ଶ୍ରୀଲଙ୍କାରେ ବାତ୍ୟା ଡିଟୱାର ବଡ଼ ପ୍ରଭାବ; ଗଲାଣି ୭୦ରୁ ଅଧିକ ଜୀବନ, ବ୍ୟାପକ କ୍ଷୟକ୍ଷତି

ତଥ୍ୟ କହୁଛି ରାସ୍ତା ଦୁର୍ଘଟଣାରେ ପ୍ରତିବର୍ଷ ୫ ହଜାର ଲୋକଙ୍କ ଜୀବନ ଯାଉଛି । ଗତ ୧୦ ବର୍ଷରେ ଓଡ଼ିଶାରେ ୪୭ ହଜାରରୁ ଅଧିକ ଲୋକ ରାସ୍ତା ଦୁର୍ଘଟଣାରେ ଜୀବନ ହରାଇଛନ୍ତି । ୧ ଲକ୍ଷରୁ  ଅଧିକ ଲୋକ ଗୁରୁତର ହୋଇଛନ୍ତି । ନଭେମ୍ବରରୁ ଫେବୃଆରୀ ମଧ୍ୟରେ ଅଧିକ ସଡ଼କ ଦୁର୍ଘଟଣା ଘଟୁଥିବାରୁ ଏହି ସମୟରେ ସତର୍କ ରହିବାକୁ ପରାମର୍ଶ ଦେଇଛି ଏସଟିଏ ।

ସେପଟେ ଦକ୍ଷିଣ-ପଶ୍ଚିମ ବଙ୍ଗୋପସାଗର ଉପରେ ସୃଷ୍ଟି ହୋଇଥିବା ଘୂର୍ଣ୍ଣିଝଡ଼ ଡିଟୱାହ ଆସନ୍ତା ୩୦ ତାରିଖରେ ସ୍ଥଳଭାଗ ଛୁଇଁବ । ଉତ୍ତର ତାମିଲନାଡୁ, ପୁଡୁଚେରୀ ଏବଂ ଦକ୍ଷିର ଆନ୍ଧ୍ରପ୍ରଦେଶର ଉପକୂଳରେ ବାତ୍ୟା ସ୍ଥଳଭାଗ ଛୁଇଁବା ନେଇ ଆକଳନ କରାଯାଉଥିବା ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି । ଶୁକ୍ରବାର ପୂର୍ବାହ୍ନରେ ଘୂର୍ଣ୍ଣିଝଡ଼ ଶ୍ରୀଲଙ୍କା ଉପକୂଳ ଏବଂ ଦକ୍ଷିଣ-ପଶ୍ଚିମ ବଙ୍ଗୋପସାଗର ଉପରେ ଅବସ୍ଥିତ ଥିଲା । ପରେ ଏହା ଉତ୍ତର-ଉତ୍ତରପଶ୍ଚିମ ଦିଗକୁ ଗତି କରିଛି ।

ବାତ୍ୟା ପ୍ରଭାବରେ ପ୍ରବଳ ପବନ ଏବଂ ବର୍ଷା ହେବାର ସମ୍ଭାବନା ରହିଥିବା ନେଇ ଭାରତ ପାଣିପାଗ ବିଭାଗ ସତର୍କତା ଜାରି କରିଛି । ଆଜି ତାମିଲନାଡୁର କିଛି ଜିଲ୍ଲାରେ ଅତି ପ୍ରବଳ ବର୍ଷା ହେବ । ଡିସେମ୍ବର ୧ ପର୍ୟ୍ୟନ୍ତ ତାମିଲନାଡୁର କିଛି ଜିଲ୍ଲା ଏବଂ ଆନ୍ଧ୍ର ପ୍ରଦେଶର କିଛି ଅଂଶରେ ପ୍ରବଳରୁ ଅତି ପ୍ରବଳ ବର୍ଷା ହେବ । ଉପକୂଳ ଅଞ୍ଚଳ ପାଇଁ ରେଡ୍ ଏବଂ ଅରେଞ୍ଜ ସତର୍କତା ଜାରି କରାଯାଇଛି । ମତ୍ସ୍ୟଜୀବୀମାନଙ୍କୁ ସମୁଦ୍ର ଅଞ୍ଚଳରେ ପ୍ରବେଶ ନ କରିବାକୁ ଏବଂ କୂଳକୁ ଫେରିବାକୁ ପରାମର୍ଶ ଦିଆଯାଇଛି । ସମ୍ଭାବ୍ୟ ସ୍ଥିତିକୁ ଆଖିରେ ରଖି ତାମିଲନାଡୁ ପ୍ରଶାସନ ପକ୍ଷରୁ ପ୍ରସ୍ତୁତି କରାଯାଉଛି । ଭିଲୁପୁଲମ ଜିଲ୍ଲାରେ ଆଜି ସବୁ ସ୍କୁଲ ଛୁଟି ଘୋଷଣା ହୋଇଛି । କୁଡାଲୋର ଜିଲ୍ଲାରେ ମଧ୍ୟ ସତର୍କତା ବଢ଼ାଯାଇଛି ।