/kanak/media/agency_attachments/2024-07-23t061209958z-vpn68eiq1eknckql8r0y.jpg)
/kanak/media/member_avatars/2025/04/05/2025-04-05t104857750z-whatsapp-image-2025-04-05-at-161819.jpeg)
/kanak/media/media_files/2025/07/26/odisha-healthcare-crisis-2025-07-26-17-15-07.jpg)
କନକ ବ୍ୟୁରୋ : ବାଲେଶ୍ୱର ଜିଲ୍ଲା ସୋରରେ ସ୍ୱାସ୍ଥ୍ୟସେବାର ବିକଳ ଚିତ୍ର । ଟର୍ଚ୍ଚ ଆଲୁଆରେ ହେଲା ରୋଗୀ ସେବା । ସୋର ବ୍ଲକ୍ ଅନନ୍ତପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ପିଛା ଛାଡ଼ୁନି ବିବାଦ । ପୂର୍ବରୁ ଏଠାରେ ଜଣେ ସୁରକ୍ଷାକର୍ମୀ ରୋଗୀ ସେବା କରୁଥିବା ଦେଖିବାକୁ ମିଳିଥିଲା । ଆଉ ଏବେ ଟର୍ଚ୍ଚ ଆଲୁଅରେ ଚାଲିଛି ରୋଗୀସେବା ।
ଅନନ୍ତପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଉପରେ ସୋର, ବାହାନଗା ବ୍ଲକ୍ ସହ ଭଦ୍ରକ ଜିଲ୍ଲା ବାସୁଦେବପୁର ଅଞ୍ଚଳର ଅନେକ ଲୋକ ନିର୍ଭର କରନ୍ତି । ପ୍ରତିଦିନ ଶତାଧିକ ରୋଗୀ ଡାକ୍ତରଖାନାକୁ ଚିକିତ୍ସା ପାଇଁ ଆସନ୍ତି । ଗତକାଲି ରାତି ସାଢ଼େ ୮ଟାରେ ବିଦ୍ୟୁତ୍ କାଟ୍ ହୋଇଥିଲା । ଡିଜି ଥିଲେ ମଧ୍ୟ ଡାକ୍ତରଖାନା ୩ ଘଣ୍ଟାରୁ ଅଧିକ ସମୟ ଅନ୍ଧାରରେ ରହିଥିଲା । ଫଳରେ ଡାକ୍ତରମାନେ ଟର୍ଚ୍ଚ ଲାଇଟ୍ ଜାଳି ରୋଗୀଙ୍କ ଚିକିତ୍ସା କରିଥିଲେ ।
କେବଳ ସେତିକି ନୁହେଁ, ରୋଗୀଙ୍କ ଡ୍ରେସିଂ, ଇଞ୍ଜେକ୍ସନ ଓ ସାଲାଇନ୍ ବି ଟର୍ଚ୍ଚ ଆଲୁଅରେ ଦିଆଯାଇଥିଲା । ଏହି ଘଟଣା ଜଣାପଡ଼ିବା ପରେ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି । ସ୍ବାସ୍ଥ୍ୟ ବିଭାଗରେ ଏଭଳି ସାଙ୍ଘାତିକ ଘଟଣାକୁ ବୁଦ୍ଧିଜୀବୀ ନିନ୍ଦା କରିବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଏନେଇ ଡାକ୍ତରଖାନା ପରିଚାଳକ ଡା.ଶାଶ୍ୱତ କୁମାର ସାହୁ କହିଛନ୍ତି, ଘଟଣା ବାବଦରେ ମୁଁ କିଛି ଜାଣିନାହିଁ । ଡାକ୍ତରଖାନାରେ ଡିଜି ଅଛି । ହେଲେ କେଉଁ କାରଣ ପାଇଁ ସୁରକ୍ଷାକର୍ମୀ ଡିଜି ଚଲାଇ ନାହାନ୍ତି, ତାହାର ତଦନ୍ତ ହେବ ଏବଂ କାର୍ଯ୍ୟାନୁଷ୍ଠାନ ନିଆଯିବ । କିଛିମାସ ତଳେ ଏଠାରେ ଜଣେ ସୁରକ୍ଷାକର୍ମୀ ରୋଗୀଙ୍କ ଚିକିତ୍ସା କରୁଥିବାର ଭିଡିଓ ଭାଇରାଲ୍ ହୋଇଥିଲା । ଯାହାକୁ ନେଇ ଡାକ୍ତରଖାନା କର୍ତ୍ତୃପକ୍ଷଙ୍କୁ ନିନ୍ଦା ମୁଣ୍ଡାଇବାକୁ ପଡ଼ିଥିଲା ।