ଚାଷୀଙ୍କ ପାଇଁ ଅଡ଼ୁଆ ପଞ୍ଜୀକରଣ: ଜମି ପଟ୍ଟାରେ ନାଁ ନଥିବାରୁ ବଢ଼ୁଛି ସମସ୍ୟା

କନକ ବ୍ୟୁରୋ: ୧୯ ତାରିଖରୁ ଖରିଫ ଧାନ ବିକ୍ରି ପାଇଁ ପ୍ରକ୍ରିୟା ଆରମ୍ଭ ହୋଇଛି । ଏବେ ପଞ୍ଜୀକରଣ ଚାଲିଛି । ନିୟମ ଅନୁସାରେ ଧାନ ବିକ୍ରି କରିବାକୁ ହେଲେ ଚାଷ ଜମିର ପଟ୍ଟାରେ ନିଜ ନାମ କିମ୍ବା ବାପାଙ୍କ ନାଁ ଥିବା ଆବଶ୍ୟକ । କିନ୍ତୁ କେତେକ ସ୍ଥାନରେ ଜମି ପଟ୍ଟାରେ ସାମାନ୍ୟ ସମସ୍ୟା ପାଇଁ ଚାଷୀ ପଞ୍ଜୀକରଣ କରିପାରୁନଥିବା ଅଭିଯୋଗ ହୋଇଛି । ସେପଟେ ନୂଆପଡ଼ାରୁ ମଧ୍ୟ ଆସିଛି ସମାନ ଅଭିଯୋଗ । ପଞ୍ଜୀକରଣକୁ ସରଳୀକରଣ କରାଯାଇଥିବା ସରକାର କହୁଥିଲେ ବି ଅନେକ ଚାଷୀ ସମସ୍ୟାରେ ପଡ଼ିଥିବା ଅଭିଯୋଗ କରିଛନ୍ତି ।

• ସବୁ ଚାଷୀଙ୍କର ହେବ ଇ-କେୱାଇସି
• ସରଳୀକରଣ ହେଲା ପଞ୍ଜୀକରଣ ପ୍ରକ୍ରିୟା 

ନକଲି ଚାଷୀଙ୍କୁ ରୋକିବାକୁ ରାଜ୍ୟର ସମସ୍ତ ଚାଷୀଙ୍କ ଇ-କେୱାଇସି କରିବେ ସରକାର । ଏନେଇ ସୂଚନା ଦେଇ ଯୋଗାଣ ମନ୍ତ୍ରୀ କହିଛନ୍ତି, ଅନେକ ନକଲି ଚାଷୀ ସରକାରୀ ସୁବିଧା ନେଉଥିବା ନଜରକୁ ଆସିବା ପରେ ବିଭାଗ ଏହି ପଦକ୍ଷେପ ନେଇଛି । ଦଲାଲି ରୋକିବାକୁ ବିଭାଗ ଏପରି ପଦକ୍ଷେପ ନେଇଛି । ଏଥିସହ ବାପା କି ଜେଜେ ବାପାଙ୍କ ନାମରେ ଜମି ଥିଲେ ବି ପୁଅ ମାନେ ପଞ୍ଜୀକରଣ କରିପାରିବେ ବୋଲି କହିଛନ୍ତି ମନ୍ତ୍ରୀ । ତେବେ ଧାନର ଏମଏସପି ୩୧ଶହ ଟଙ୍କା ହୋଇଥିବାରୁ ଚଳିତ ବର୍ଷ ବହୁ ଦଲାଲ, ଚାଷୀ ସାଜି ପଞ୍ଜୀକରଣ କରିପାରନ୍ତି ବୋଲି ଆଶଙ୍କା କରାଯାଉଛି ।