ଦିଲ୍ଲୀରେ ରାଜ୍ୟପାଳ, ଝାଡ଼ଖଣ୍ଡରେ ମୁଖ୍ୟମନ୍ତ୍ରୀ; ନିର୍ବାଚନ ଲଢ଼ିବେ କି ରଘୁବର ?

କନକ ବ୍ୟୁରୋ : ଝାଡ଼ଖଣ୍ଡରେ ରାଜନୀତି ଓଡ଼ିଶାରେ ତାତି । ଝାଡ଼ଖଣ୍ଡ ବିଧାନସଭା ନିର୍ବାଚନ ପାଇଁ ଖୁବଶୀଘ୍ର ତାରିଖ ଘୋଷଣା ହେବାକୁ ଥିବାବେଳେ ରଘୁବାର ଦାସଙ୍କ ଦିଲ୍ଲୀ ଗସ୍ତକୁ ନେଇ ଚର୍ଚ୍ଚା ଜୋର ଧରିଛି । ଜାତୀୟ ଗଣମାଧ୍ୟମର ଚର୍ଚ୍ଚା ଅନୁସାରେ, ଦିଲ୍ଲୀରେ ବିଜେପିର ଶୀର୍ଷ ନେତାଙ୍କୁ ଭେଟିଛନ୍ତି ରଘୁବର । ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଓ ବିଜେପିର ବରିଷ୍ଠ ନେତା ଥିଲେ ରଘୁବର ଦାସ । କିଛିଦିନ ତଳେ ଝାଡ଼ଖଣ୍ଡ ନିର୍ବାଚନ ପ୍ରଭାରୀ ହିମନ୍ତ ବିଶ୍ୱଶର୍ମା ଭୁବନେଶ୍ୱରରେ ରଘୁବର ଦାସଙ୍କୁ ଭେଟିଥିଲେ । ତେଣୁ କୁହାଯାଉଛି, ସେ ଝାଡଖଣ୍ଡ ରାଜନୀତିକୁ ପୁଣି ଫେରିପାରନ୍ତି ।

ଚର୍ଚ୍ଚା ହେଉଛି, ଜାମସେଦପୁର ଅଂଚଳରେ ଝାଡଖଣ୍ଡ ମୁକ୍ତି ମୋର୍ଚ୍ଚାର ଗଡ ଭାଙ୍ଗିବାକୁ ଜଣେ ବଡ ଚେହେରା ଚାହୁଁଛି ବିଜେପି । ତେଣୁ ରଘୁବର ଦାସଙ୍କୁ ସକ୍ରିୟ ରାଜନୀତିକୁ ଆଣିବାକୁ କିମ୍ୱା ତାଙ୍କ ପରିବାରର ଜଣେ ସଦସ୍ୟଙ୍କୁ ନିର୍ବାଚନ ଲଢାଇବାକୁ ଯୋଜନା କରୁଛି ବିଜେପି ।

ଓଡିଶାରେ ପ୍ରଥମ ଥର ପାଇଁ ସରକାର ଗଠନ କରିବା ପରେ ପଡୋଶୀ ଝାଡଖଣ୍ଡରେ ଡବଲ ଇଞ୍ଜିନ ସରକାର ପାଇଁ ଅଣ୍ଟା ଭିଡିଛି ବିଜେପି । ଏଥିପାଇଁ ଓଡିଶା ନେତାଙ୍କୁ ଦାୟିତ୍ୱ ଦିଆଯାଇଛି । ମୁଖ୍ୟମନ୍ତ୍ରୀ ମୋହନ ମାଝି ଦୁଇଦିନିଆ ଗସ୍ତରେ ଝାଡଖଣ୍ଡ ଯାଇ ଓଡିଆ ଲୋକ ରହୁଥିବା ସିଂହଭୂମିରେ ପରିବର୍ତ୍ତନ ସଭା କରିଛନ୍ତି । କାଲି ଓଡିଶା ବହୁଳ ଚାଇଁବସାରେ ପରିବର୍ତ୍ତନ ଯାତ୍ରା ସମାପନ ସଭାରେ ଯୋଗଦେବେ । ସେହିଭଳି କେନ୍ଦ୍ରମନ୍ତ୍ରୀ ଜୁଏଲ ଓରାମ ଓ ବିଜେପି ସାଂସଦ ମମତା ମହନ୍ତ ମଧ୍ୟ ପ୍ରଚାର ଦାୟିତ୍ୱରେ ଅଛନ୍ତି ।

ଝାଡଖଣ୍ଡରେ ଓଡିଶା ନେତାଙ୍କ ପ୍ରଚାର କରିବା ପଛରେ ବିଜେପିର ଖାସ ରଣନୀତି ରହିଛି ।

-ଝାଡ଼ଖଣ୍ଡରେ ୨୦ ଲକ୍ଷ ଓଡ଼ିଆ ତଥା ୧୮ % ଭୋଟର ରହୁଛନ୍ତି

-ଷଢେଇକଳା, ଖରସୁଆଁରେ ୭୦ ପ୍ରତିଶତ ଲୋକ ଓଡ଼ିଆ ଭାଷାରେ କଥା ହୁଅନ୍ତି

-ଝାଡ଼ଖଣ୍ଡରେ ଅଧିକାଂଶ ଆଦିବାସୀ ଭୋଟର ଅଛନ୍ତି

ତେଣୁ ଓଡିଆ ନେତାଙ୍କୁ ନେଇ ଝାଡଖଣ୍ଡରେ ଜୋରଦାର ପ୍ରଚାର କରି ୫ ବର୍ଷ ପରେ ପୁଣି ଥରେ କ୍ଷମତାକୁ ଆସିବାକୁ ଲକ୍ଷ୍ୟ ରଖିଛି ବିଜେପି ।