ଆଜି ଓଡ଼ିଶା ନିର୍ମାଣ କନକ୍ଲେଭ : ସାମିଲ ହେବେ ଦୁଇ ମନ୍ତ୍ରୀ । ପ୍ରସଙ୍ଗ ଦାଦନ, କ୍ରୀଡ଼ା ଓ ପର୍ଯ୍ୟଟନ

କନକବ୍ୟୁରୋ : କେମିତି ହେବ ସ୍ୱପ୍ନର ଓଡ଼ିଶା?  ବିକଶିତ ଓଡ଼ିଶାର ଭାଗ୍ୟ କାହା ହାତରେ ଲେଖାଯିବ?  ନୀତି ନିର୍ଦ୍ଧାରକମାନେ କିଭଳି ଯୋଜନା କରିବା ଉଚିତ୍‌? କାର୍ୟ୍ୟକାରୀ କରିବାରେ କଉଁଠି ରହୁଛି ସମସ୍ୟା?  ବିଚାର ବିମର୍ଶରୁ ବାହାରିବ ନିସ୍କର୍ଷ ।  ଏଭଳି ଉଦ୍ଦେଶ୍ୟ ରଖି ପ୍ରତିବର୍ଷ କନକ ନ୍ୟୁଜ ଆୟୋଜନ କରିଆସୁଛି ଓଡ଼ିଶା ନିର୍ମାଣ କନକ୍ଲେଭ । 

ଗୋଟିଏ ମଞ୍ଚରେ ଏକାଠି ବସି ମତାମତ ରଖୁଛନ୍ତି ଉଭୟ ସରକାରୀ ଓ ବିରୋଧୀ ପକ୍ଷ। ରାଜନୈତିକ ପ୍ରତିଦ୍ୱନ୍ଦ୍ୱିତାକୁ ଭୁଲି ଗଠନମୂଳକ ପ୍ରସ୍ତାବ ଜରିଆରେ ରାଜ୍ୟବାସୀଙ୍କ ଆଗରେ ରଖୁଛନ୍ତି ବିକଶିତ ଓଡ଼ିଶର ରୋଡମ୍ୟାପ୍‌  । ବର୍ଷ ୨୦୨୪ର କ୍ୟାଲେଣ୍ଡର ଏହାର ଶେଷ ଫର୍ଦ୍ଦ ଛୁଇଁବାକୁ ଯାଉଥିବାବେଳେ ପୁଣିଥରେ ସେହି ଅବସର ଆସିଛି ।

ଶନିବାର ଭୁବନେଶ୍ୱରର ତାରକା ହୋଟେଲ ସ୍ୱସ୍ତି ପ୍ରିମିୟମରେ ଆୟୋଜନ ହେବ ଓଡ଼ିଶା ନିର୍ମାଣ କନକ୍ଲେଭ- ୨୦୨୪। ଏଥିରେ ସାମିଲ ହେବେ ରାଜ୍ୟ ସରକାରଙ୍କ ଦୁଇଜଣ ମନ୍ତ୍ରୀ ସୁରେଶ ପୂଜାରୀ ଓ ପୃଥ୍ୱୀରାଜ ହରିଚନ୍ଦନ ।  ମୋଟ୍‌ ୫ଟି ସେସନରେ ରାଜ୍ୟ ବିକାଶର ବେଗ ବଢ଼ାଇବାଠାରୁ ଆରମ୍ଭ କରି ଯୁବ ନେତୃତ୍ୱଙ୍କ ଆଖିରେ ସ୍ୱପ୍ନ ଓ ଦାଦନ ପ୍ରସଙ୍ଗରେ ହେବ ବିସ୍ତୃତ ଆଲୋଚନା  ।

କ୍ରୀଡ଼ା, ପର୍ଯ୍ୟଟନ ଭଳି କ୍ଷେତ୍ରରେ ବିଶ୍ୱ ମାନଚିତ୍ରରେ କେମିତି ସ୍ୱତନ୍ତ୍ର ଛାପ ଛାଡ଼ିବ ଓଡ଼ିଶା। ଡବଲ ଇଞ୍ଜିନ ସରକାର ସବୁ ପଛୁଆ ଟ୍ୟାଗକୁ ପଛରେ ପକାଇ ରାଜ୍ୟକୁ ଆଗେଇ ନେବାରେ କେତେ ହେବ ସମର୍ଥ, ବିଶେଷଜ୍ଞ ରଖିବେ ମତ । 

ସଚେତନତା ଅଭାବରୁ ଆମେ ଅନେକ ସମୟରେ ସ୍ୱାସ୍ଥ୍ୟକୁ ଅବହେଳା କରୁ। ଆଉ ରୋଗ ଚିହ୍ନିଲା ବେଳକୁ ଚିକିତ୍ସା କଷ୍ଟକର ହୋଇପଡ଼େ। ତେଣୁ ସାଧାରଣ ଲୋକଙ୍କଠାରେ ଦେଖାଯାଉଥିବା ସ୍ୱାସ୍ଥ୍ୟ ସମସ୍ୟାକୁ ନେଇ ସଚେତନ କରାଇବାର ଦାୟିତ୍ୱ ତୁଲାଇ ଆସୁଛି କନକ ନ୍ୟୁଜ । ପ୍ରତିବର୍ଷ ସ୍ୱାସ୍ଥ୍ୟ ସମ୍ବାଦ ଓ କନକ ନ୍ୟୁଜର ମିଳିତ ପ୍ରୟାସରେ ଆୟୋଜନ ହେଉଛି ହେଲ୍‌ଥ କନକ୍ଲେଭ  ।

ଶନିବାର ସନ୍ଧ୍ୟାରେ ରାଜ୍ୟର ବଛାବଛା ସ୍ୱାସ୍ଥ୍ୟ ବିଶେଷଜ୍ଞଙ୍କୁ ନେଇ ସ୍ୱସ୍ତି ପ୍ରମିୟମରେ ଆୟୋଜନ ହେବ ଦି ହେଲ୍‌ଥ କନକ୍ଲେଭ- ୨୦୨୪  । ଏଥିରେ ଅତିଥି ଭାବେ ଯୋଗଦେବେ ରାଜ୍ୟପାଳ ରଘୁବର ଦାସ ଓ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ।  ମୋଟ୍ ୫ଟି ସେସନରେ ରାଜ୍ୟର ପ୍ରତିଷ୍ଠିତ ଡାକ୍ତର ଓ ସ୍ୱାସ୍ଥ୍ୟ ବିଶେଷଜ୍ଞ ଦୈନନ୍ଦିନ ଜୀବନରେ ଦେଖାଯାଉଥିବା ସ୍ୱାସ୍ଥ୍ୟ ସମସ୍ୟା ଓ ଏହାର ଉପସମ ନେଇ ପରାମର୍ଶ ଦେବେ ।