୨୦ ହଜାର ଅଙ୍ଗନବାଡ଼ିର ନାହିଁ ନିଜସ୍ୱ କେନ୍ଦ୍ର ; ଖୁବ୍‌ଶୀଘ୍ର ମରାମତି କରାଯିବ କହିଲେ ଉପମୁଖ୍ୟମନ୍ତ୍ରୀ

କନକ ବ୍ୟୁରୋ : ବିଧାନସଭା ଶୀତ ଅଧିବେଶନର ଦ୍ବିତୀୟ ଦିନ ଭଳି ତୃତୀୟ ଦିନ ସ୍ବାଭାବିକ ଭାବେ ଚାଲିଛି । ଲୋକଙ୍କ ବିଭିନ୍ନ ସମସ୍ୟାକୁ ନେଇ ହୋଇଛି ଆଲୋଚନା । ଗୃହରେ ଅଙ୍ଗନବାଡି କେନ୍ଦ୍ରକୁ ନେଇ ଉଦ୍‌ବେଗ ପ୍ରକାଶ କରିଛନ୍ତି ବିଧାୟକ । ଉତ୍ତର ରଖିଛନ୍ତି ମହିଳା ଓ ଶିଶୁ ବିକାଶ ମନ୍ତ୍ରୀ ତଥା ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ରାଜ୍ୟରେ ୨୦ ହଜାର ୧୫୦ ଅଙ୍ଗନବାଡି କେନ୍ଦ୍ରର ନିଜସ୍ୱ ଗୃହ ନାହିଁ । ଏଥିସହ ୭୩୮୯ଟି ଅଙ୍ଗନୱାଡି କେନ୍ଦ୍ର ନିର୍ମାଣଧୀନ ଅଛି । ୪୫୭୪ ଅଙ୍ଗନବାଡ଼ି ସ୍କୁଲ ଘରେ ଚାଲିଛି ।  ରାଜ୍ୟରେ ମୋଟ ୭୪ ହଜାର ୨୨୪ ଅଙ୍ଗନୱାଡି କେନ୍ଦ୍ର ରହିଛି । ସେଥିରୁ ୫୪ ହଜାର ୭୪ ଅଙ୍ଗନୱାଡି କେନ୍ଦ୍ରର ନିଜସ୍ଵ ଗୃହରେ ଚାଲିଛି । ୧୦ ହଜାର ୪୧୬ ମିନି ଅଙ୍ଗନୱାଡି କେନ୍ଦ୍ର ସରକାରଙ୍କ ମୁଖ୍ୟ ଅଙ୍ଗନବାଡ଼ିକୁ ରୂପାନ୍ତର ହୋଇଛି । ସବୁ ଅଙ୍ଗନବାଡି ପାଇଁ ନିଜସ୍ଵ ଗୃହ ହେବ । ୧୦ ହଜାର ୪୬୯ କମ୍ୟୁନିଟି ଗୃହରେ ଚାଲିଛି । ୩ ହଜାର ୮୯୦ ଭଡ଼ା ଘରେ ଚାଲିଛି । 

ତେବେ ସବୁ ଅଙ୍ଗନୱାଡି ପାଇଁ ନିଜସ୍ଵ ଗୃହ ହେବ ବୋଲି ପ୍ରତିଶ୍ରୁତି ଦେଇଛନ୍ତି ଉପମୁଖ୍ୟମନ୍ତ୍ରୀ । କହିଛନ୍ତି,ସକ୍ଷମ ଅଙ୍ଗନୱାଡ଼ି ଜରିଆରେ ଗୃହ ନିର୍ମାଣ ପାଇଁ ଯୋଜନା ଚାଲିଛି । ଯେଉଁଠି ସ୍ଥାନ ମିଳିବ ନାହିଁ ପଞ୍ଚାୟତିରାଜ ବିଭାଗ ଠାରୁ ଜାଗା କିଣି ନିର୍ମାଣ ହେବ । ପୂର୍ବରୁ ୭ ଲକ୍ଷ ଟଙ୍କାରେ ନିର୍ମାଣ ହେଉଥିଲା। ପରବର୍ତ୍ତୀ ମୁହୂର୍ତ୍ତରେ ୧୨ ଲକ୍ଷ ଓ ଏବେ ୧୫ ଲକ୍ଷରେ ପହଞ୍ଚିଛି ।  ମହିଳା ଓ ଶିଶୁ ବିକାଶ ବିଭାଗ ନିଜସ୍ଵ ଅର୍ଥରେ ଅଙ୍ଗନୱାଡ଼ି ନିର୍ମାଣ କରିବ ।

ଅଧିକ ପଢନ୍ତୁ.. ଏୟାରବସ୍ ଏ୩୨୦ ବିମାନରେ ଯାନ୍ତ୍ରିକ ତ୍ରୁଟି, ଭାରତ ସମେତ ସାରା ବିଶ୍ୱରେ ବିମାନସେବା ପ୍ରଭାବିତ

ଅନ୍ୟପଟେ ନିର୍ମାଣ ବିଭାଗ ଅଧିନରେ ଚାଲିଥିବା ବିଭିନ୍ନ କାର୍ଯ୍ୟ ନେଇ ବିଧାନସଭାରେ ମଧ୍ୟ ହୋଇଛି ଆଲୋଚନା । ବିଧାୟକମାନେ ନିଜ ନିଜ ଅଂଚଳର ସମସ୍ୟା ନେଇ ବିଭାଗୀୟ ମନ୍ତ୍ରୀଙ୍କ ଉତ୍ତର ଲୋଡ଼ିଛନ୍ତି । ନିର୍ମାଣ ବିଭାଗ ମନ୍ତ୍ରୀ ପୃଥିରାଜ ହରିଚନ୍ଦନ ଉତ୍ତର ରଖିଛନ୍ତି । ରିଙ୍ଗ୍‌ ରୋଡ୍ ନିର୍ମାଣ ନେଇ ବାଲେଶ୍ବର ସଦର ବିଧାୟକ ମାନସ ଦତ୍ତଙ୍କ ପ୍ରଶ୍ନର ଉତ୍ତର ରଖିଛନ୍ତି ମନ୍ତ୍ରୀ । ସେହିପରି କଟକ ରିଙ୍ଗ୍‌ ରୋଡ଼ ପ୍ରକଳ୍ପ କାମ ଓ ଚଣ୍ଡି ମନ୍ଦିର ନିର୍ମାଣକୁ ନେଇ ପ୍ରଶ୍ନ କରିଛନ୍ତି କଟକ ବାରବାଟୀ ବିଧାୟିକା ସୋଫିଆ ଫିର୍ଦ୍ଦୋଶ। ମନ୍ତ୍ରୀ କହିଛନ୍ତି ବର୍ଷା କାରଣରୁ ନିର୍ମାଣ ବିଳମ୍ବିତ ହେଇଛି । ଚେଷ୍ଟା କରୁଛି ବିଭାଗ ଯଥାଶୀଘ୍ର ସାରିବା ପାଇଁ । ଚଣ୍ଡି ମନ୍ଦିର କାମ ୨୦୨୬ ଜୁନ ମାସ ସୁଦ୍ଧା ସାରିବା ପାଇଁ ନିର୍ଦେଶ ଦିଆଯାଇଛି । 

ବିଜେଡି ବିଧାୟକ ଦିବ୍ୟଶଙ୍କର ମିଶ୍ର ଅବିଭକ୍ତ କଳାହାଣ୍ଡି ଜିଲ୍ଳାର ରାସ୍ତା ସମସ୍ୟା ଓ ନିର୍ମାଣର ଅଗ୍ରଗତି ନେଇ ମନ୍ତ୍ରୀଙ୍କଠୁ ତଥ୍ୟ ଲୋଡିଥିଲେ।  ସେହିପରି ଭୁବନେଶ୍ବରର ରାସ୍ତା ସମସ୍ୟା ନେଇ ପ୍ରଶ୍ନ କରିଛନ୍ତି ଏକାମ୍ର ବିଧାୟକ ବାବୁ ସିଂ । ସମସ୍ୟାର ସମାଧାନ ପାଇଁ ସରକାର ନେଇଥିବା ପଦକ୍ଷେପ ସମ୍ପର୍କରେ ଗୃହକୁ ଅବଗତ କରିଛନ୍ତି ମନ୍ତ୍ରୀ ।