ଯୁଦ୍ଧ ଭୂମିରୁ ଜୀବନ ଧରି ଫେରିଲେ : ଇସ୍ରାଏଲରୁ ଫେରିଲେ ଓଡ଼ିଆ ଛାତ୍ରଛାତ୍ରୀ

କନକ ବ୍ୟୁରୋ : ଯୁଦ୍ଧ ଭୂମିରୁ ଫେରିଲେ ଇସ୍ରାଏଲରେ ଫସିଥିବା ଓଡ଼ିଆ ଛାତ୍ରଛାତ୍ରୀ । ଭାରତର ଅପରେସନ ସିନ୍ଧୁ ଜରିଆରେ ଇସ୍ରାଏଲରୁ ଭୁବନେଶ୍ୱର ବିଜୁ ପଟ୍ଟନାୟକ ବିମାନ ବନ୍ଦରରେ ପହଞ୍ଚିଛନ୍ତି ଛାତ୍ରଛାତ୍ରୀ । ଓଡ଼ିଶା ମାଟିରେ ପାଦ ଥାପିବା ପରେ କିପରି ଯୁଦ୍ଧଭୂମିର ବଙ୍କର୍ ଭିତରୁ ନିଜ ଜନ୍ମମାଟିରେ ପହଞ୍ଚିଲେ ତା’ର ଭୟଙ୍କର କାହାଣୀ ବଖାଣିଛନ୍ତି । ଖୁସି ବ୍ୟକ୍ତ କରିବା ସହ ଉଦ୍ଧାର ପାଇଁ ଭାରତ ସରକାରଙ୍କୁ ଧନ୍ୟବାଦ ଦେଇଛନ୍ତି । ଇରାନ ଓ ଇସ୍ରାଏଲ ଭିତରେ ଯୁଦ୍ଧ ସମୟରେ ମିସାଇଲ୍ ମାଡ଼ର ଶବ୍ଦ ଶୁଣି ଡର ଲାଗୁଥିଲା । କିନ୍ତୁ ଇସ୍ରାଏଲର ଆଣ୍ଟିମିସାଇଲ୍ ସିଷ୍ଟମ୍ ଯୋଗୁ ସେମାନେ ବଞ୍ଚିଯାଇଥିଲେ । 

ତେବେ ଏହା ପୂର୍ବରୁ ଇରାନ-ଇସ୍ରାଏଲ ଯୁଦ୍ଧ ଭିତରେ ଫସିଥିବା ଭାରତୀୟଙ୍କ ପାଇଁ ନୂଆ ଆଶା ପାଲଟିଥିଲା ଅପରେସନ ସିନ୍ଧୁ । ଅପରେସନ ସିନ୍ଧୁ ଜରିଆରେ ଇରାନରୁ ସ୍ଵଦେଶ ଫେରିଛନ୍ତି ଭାରତୀୟ । ସୋମବାର ୨୯୦ଜଣ ଭାରତୀୟଙ୍କୁ ସୁରକ୍ଷିତ ନେଇ ପହଞ୍ଚିଛି ସ୍ବତନ୍ତ୍ର ବିମାନ । ସ୍ବଦେଶ ଫେରିବା ପରେ ଶାନ୍ତିରେ ନିଶ୍ବାସ ନେଇଛନ୍ତି ୨୯୦ଜଣ ଭାରତୀୟ । ବିମାନ ବନ୍ଦରରେ ପହଞ୍ଚିବା ପରେ କିଏ ଭାରତ ମାତା କି ଜୟ କହିଥିଲେ ତ ଆଉ କିଏ ମାଟିକୁ ମୁଣ୍ଡିଆ ମାରୁଥିବାର ଦେଖିବାକୁ ମିଳିଥିଲା । ତେବେ ୨୯୦ ଜଣଙ୍କ ମଧ୍ୟରୁ ୧୯୦ଜଣ କାଶ୍ମୀରର ବାସିନ୍ଦା ଥିବା ଜଣାପଡ଼ିଥିଲା । ଦିଲ୍ଲୀ, ହରିୟାଣା ଓ କର୍ଣ୍ଣାଟକର ମଧ୍ୟ ଅନେକ ଲୋକ ଭାରତ ଫେରିଥିଲେ । ଏହା ପୂର୍ବରୁ ୧୯ ତାରିଖରେ ୧୧୦ ଜଣଙ୍କୁ ସୁରକ୍ଷିତ ଭାବେ ସ୍ବଦେଶ ଅଣାଯାଇଥିଲା ।