ମୁଣ୍ଡ ଉପରେ ନାହିଁ ଛାତ : ୨୫ ବର୍ଷ ଧରି ଦଦରା ଘରେ ବିତୁଛି ସମୟ

କନକ ବ୍ୟୁରୋ  :  ରହିବା ପାଇଁ  ଭଲ ଘର ଖଣ୍ଡିଏ ନାହିଁ ।  ଖରା ବର୍ଷା ଶୀତ କାକରରେ ବର୍ଷ ବର୍ଷ ସୁରକ୍ଷା ଯୋଗାଉଥିବା ଚାଳ ଛପରଟି ଲଗାଣ ବର୍ଷାରେ ଭାଙ୍ଗିଯିବା  ପରେ ନିରାଶ୍ରୟ ହୋଇ ପଡ଼ିଛନ୍ତି ପରିବାର  ।

ଘର କହିଲେ,  ଦଦରା ମାଟି କାନ୍ଥ ଉପରେ ଜରିପାଲ ।  ବାଉଁଶ ଢ଼େରାରେ ଠିଆ ହୋଇଛି ଭଙ୍ଗା କୁଡ଼ିଆ ।  ମାସେ ଦୁଇ ମାସେ ନୁହେଁ, ୨୫ ବର୍ଷ ହେଲାଣି ଏହି ଘରେ ମୁଣ୍ଡ ଗୁଞ୍ଜିଛନ୍ତି ମାର୍ଶାଘାଇ ବ୍ଲକ ଅଙ୍ଗୁଳାଇ ଗାଁର ବୃଦ୍ଧା ଅମ୍ବିକାଙ୍କ ପରିବାର ।  ନିଜର ଠିକଣା ନାହିଁ କିନ୍ତୁ ମାଟି କାନ୍ଥରେ ଥାକ ଥାକ କରି ଠାକୁରଙ୍କୁ ରଖିଛନ୍ତି ।  ନିଜେ କେବେକେବେ ଉପାସରେ ରହିଛନ୍ତି ହେଲେ ଠାକୁର ପୂଜା କେବେ ବନ୍ଦ କରିନାହାନ୍ତି ।  ପକ୍କା ଘରଟିଏ ପାଇଁ ସରକାରୀ ବାବୁଙ୍କୁ କେତେ ନେହୁରା ହୋଇଛନ୍ତି । ହେଲେ ନା ପ୍ରଶାସନ ପହଞ୍ଚିଛି ନା ପହଞ୍ଚିଛି ସରକାରୀ ଯୋଜନା । 
 ବର୍ଷା ଦିନେ ଆସିଲା ତ କଥା ସରିଲା ।  ଘରେ ପାଣି ପଶିଯାଏ ।  କଂସା, ତାଟିଆରେ ପାଣି କାଢ଼ି ପୁଣି ସେଇଠି ରାତି ବିତେ ।  ଗତ ଲଗାଣ ବର୍ଷାରେ ଘରର ଅବସ୍ଥା ଆହୁରି ଶୋଚନୀୟ ହୋଇପଡ଼ିଥିଲା ।  ଆଜବେଷ୍ଟସ୍‌, ଜରିପାଲ ବାନ୍ଧି ବଞ୍ଚିବାକୁ ଚେଷ୍ଟା କରୁଛି ଏହି ପରିବାର ।  ମୂଲ ଲାଗି ଚଳନ୍ତି ଏମାନେ । ଘର ମରାମତି ବା କେମିତି କରିବେ  । ଆଗକୁ ଶୀତ ଆସୁଛି ।   ନିଜ ଦେଢ ମାସର ନାତିକୁ ନେଇ କିପରି ଏହି ଭଙ୍ଗାଘରେ ରହିବେ ତାକୁ ନେଇ ଚିନ୍ତାରେ ପଡ଼ିଛନ୍ତି ଅମ୍ବିକା ଓ ତାଙ୍କ ପରିବାର। 

 ଅସହାୟ ପରିବାର ପାଖରେ କେବେ ପହଁଚିବ ଜିଲ୍ଲା ପ୍ରଶାସନ? କେବେ ମିଳିବ ସରକାରଙ୍କ ପକ୍କାଘର? ଏବେ ତାକୁ ହିଁ ଅପେକ୍ଷା।