ଭେଟିବାକୁ ଆଉ ରହିବନି ଭାୟା ମିଡିଆ । ନବୀନଙ୍କୁ ଘାରିଛି ବିଜେପି ଭୟ !

କନକ ବ୍ୟୁରୋ: ନିର୍ବାଚନ ପରାଜୟ ପରଠାରୁ ବିଜେଡି ଘର ଅସଜଡ଼ା ହୋଇପଡିଛି । ପରିସ୍ଥିତି ଏମିତି ହୋଇଛି ଯେ, ନବୀନ ଆଉ କାହାକୁ ଭରଷା କରିପାରୁ ନାହାନ୍ତି । ଏଭଳି ସଙ୍କେତ ମିଳିଛି ଶୁକ୍ରବାର ନବୀନ ନିବାସରେ ବସିଥିବା ସଂସଦୀୟ ଦଳ ବୈଠକରୁ । ଶୁକ୍ରବାର ସଂଧାରେ ୭ ସଂସାଦଙ୍କୁ ନେଇ ବସିଥିବା ବୈଠକରେ ବେଶ କୋଠର ଆଭିମୁଖ୍ୟ ଦେଖାଇଛନ୍ତି ବିଜେଡି ସୁପ୍ରିମୋ। 

-    ବିଜେପି ସହ ଲଢ଼ିବାକୁ ଶକ୍ତିଶାଳୀ ହେବାକୁ ଦେଲେ ପରାମର୍ଶ
-    ସମସ୍ୟା ଥିଲେ ସିଧାସଳଖ ତାଙ୍କୁ ଜଣାଇବାକୁ କହିଲେ ନବୀନ
-    ସାଂସଦଙ୍କ ଭିତରେ ସମନ୍ବୟ ରଖିବାକୁ ଦେଲେ ଗୁରୁତ୍ୱ
-    ବିଜେପି ପ୍ରୋଲଭନରୁ ଦୂରେଇ ରହିବାକୁ ନେତାଙ୍କୁ କର୍ଣ୍ଣମନ୍ତ୍ର
 
ଫସିଲା ପରେ ଚେତିଲେ 
ଦାୟିତ୍ବ ନେବାକୁ ଆଗେଇ ଆସିଲେ ନବୀନ

ପୂର୍ବରୁ ଦଳ ଛାଡିଥିବା ଦୁଇ ସାଂସଦ ନବୀନଙ୍କୁ ସିଧାସଳଖ ଭେଟ କରି ପାରୁନଥିବା ଅଭିଯୋଗ ଆଣି ବର୍ଷିଥିଲେ । ଏମିତି କି ନବୀନ ଅନ୍ୟ ଇସାରାରେ ପରିଚାଳିତ ହେଉଥିବା କହିଥିଲେ । ତେଣୁ ଆଗକୁ କେମିତି ଏହାର ପୁନରାବୃତ୍ତି ନହେବ ସେଥିପାଇଁ ଏହି ରଣନୀତି କରିଥିବା ଚର୍ଚ୍ଚା ହେଉଛି । ଏହାରି ଭିତରେ ମମତା ମହନ୍ତ ଓ ସୁଜିତ କୁମାରଙ୍କ ପରେ ଆଉ କିଏ ବିଜେପି ଲିଙ୍କରେ ରହିଛନ୍ତି ଏହାକୁ ନେଇ ସନ୍ଦେହ ବଢୁଛି । ଫଳରେ ହାତରେ ଥିବା ମାତ୍ର ୭ ସାଂସଦ କିପରି ଦଳ ନଛାଡିବେ ସେଥିପାଇଁ ଅଧିକ ସଜାଗ ହୋଇଛନ୍ତି ବିଜେଡି ସଭାପତି । ନବୀନଙ୍କୁ ଭେଟିବା ପାଇଁ ପୂର୍ବରୁ ଥିବା କଟକଣା ଆଉ ରହିବ ନାହିଁ ବୋଲି ସଂସଦୀୟ ଦଳ ବୈଠକରେ ସ୍ପଷ୍ଟ କରିଦେଇଛନ୍ତି । 

ନିର୍ବାଚନ ପୂର୍ବରୁ ମଧ୍ୟ ବିଜେଡି ଛାଡ଼ିଥିବା ଏକାଧିକ ନେତା ସେହି ସମାନ କଥା କହିଥିଲେ । ନିଜ ସମସ୍ୟା ଓ ଅସନ୍ତୋଷ ଜଣାଇବାକୁ ନବୀନଙ୍କୁ ଭେଟିବାର ସୁଯୋଗ ମିଳିନଥିବା ଖୋଲାଖୋଲି ଗଣମାଧ୍ୟମରେ ଅଭିଯୋଗ କରିଥିଲେ । ତେଣୁ ଚର୍ଚ୍ଚା ହେଉଥିଲା ନେତା ଓ ନବୀନଙ୍କ ଭେଟଘାଟରେ କିଏ ପାଲଟୁଛି ବାଧକ । ଲୋକସଭାରେ ଦଳର ଜଣେ ବି ସଦସ୍ୟ ନଥିବା ବେଳେ ରାଜ୍ୟସଭାରେ ମାତ୍ର ୭ ସାଂସଦଙ୍କୁ ନେଇ ଲଢେଇ କରିବ ବିଜେଡି । କେନ୍ଦ୍ର ବିରୋଧୀ ନାରାକୁ ଜୋରସୋରରେ ଉଠାଇବାକୁ ରଣନୀତି ହୋଇଥିବାବେଳେ ଦଳୀୟ ସାଂସଦଙ୍କୁ ପାଖରେ ରଖିବା ନବୀନଙ୍କ ପାଇଁ ଏବେ ବଡ ଆହ୍ବାନ ହୋଇଛି ।