ତୁଳସୀକ୍ଷେତ୍ରରେ ହେଉନି ନବକଳେବର; ତଥାପି ସୁରକ୍ଷିତ ରହିଛି ଶ୍ରୀବିଗ୍ରହ ?

କନକ ବ୍ୟୁରୋ : ୨୦୧୫ରେ ପୁରୀରେ ମହାପ୍ରଭୁଙ୍କ ନବକଳେବର କେହି ଭୁଲିନାହାନ୍ତି । ଏହାପୂର୍ବରୁ ୧୯୯୬, ୧୯୭୭ରେ ବି ଶ୍ରୀବିଗ୍ରହମାନଙ୍କର ନବକଳେବର ହୋଇଥିଲା । ହେଲେ କେନ୍ଦ୍ରାପଡ଼ା ବଳଦେବଜୀଉ ମନ୍ଦିରରେ ଶ୍ରୀବଳଦେବ ସିନା ମଣିବିଗ୍ରହ,କାଠରେ ନିର୍ମିତ ଶ୍ରୀଜଗନ୍ନାଥ ଓ ଦେବୀ ସୁଭଦ୍ରାଙ୍କର କିନ୍ତୁ ହୋଇନାହିଁ ନବକଳେବର । ଭକ୍ତ କହୁଛନ୍ତି, ଏସବୁ ଠାକୁରଙ୍କ ଲୀଳା ।

କିଏ କହିପାରେ ଅଲୌକିତତା । ଆଉ କିଏ କହିପାରେ ମହାପ୍ରଭୁଙ୍କ ଲୀଳାଖେଳା । ତୁଳସୀକ୍ଷେତ୍ରର ଆରାଧ୍ୟ ଶ୍ରୀବଳଦେବଜୀଉ ମନ୍ଦିରରେ ଦୀର୍ଘ ବର୍ଷ ଧରି ହୋଇନାହିଁ ଠାକୁରଙ୍କ ନବକଳେବର । ଶ୍ରୀକ୍ଷେତ୍ରର ସବୁ ନୀତିକାନ୍ତି ବଳଦେବଜୀଉଙ୍କ ପୀଠରେ ପାଳନ ହୁଏ । ହେଲେ ନବକଳେବରରେ ଦେଖିବାକୁ ମିଳିଛି ବ୍ୟତିକ୍ରମ ପରମ୍ପରା ଅନୁଯାୟୀ, ମହାପ୍ରଭୁଙ୍କ ବିଗ୍ରହ ଥିବା ଅନ୍ୟ ମନ୍ଦିରରେ ଯୋଡ଼ା ଶ୍ରାବଣ ବର୍ଷରେ ନବକଳେବର ହୋଇଥାଏ । ତୁଳସୀକ୍ଷେତ୍ରରେ ପ୍ରଭୁ ବଳଦେବଜୀଉ ହେଉଛନ୍ତି ମଣି ବିଗ୍ରହ । ଦେବୀ ସୁଭଦ୍ରା ଓ ପ୍ରଭୁ ଜଗନ୍ନାଥ ବିଗ୍ରହ କିନ୍ତୁ କାଠରେ ନିର୍ମିତ । ଏହାସତ୍ତ୍ୱେ ଦୀର୍ଘ ଦଶନ୍ଧି ଧରି ପରିବର୍ତ୍ତନ ହୋଇନାହାନ୍ତି ବିଗ୍ରହ । ସାଂକେତିକ ଭାବେ କେବଳ ପ୍ରଭୁଙ୍କ ବସ୍ତ୍ରର ହୋଇଥାଏ ନବକଳେବର ।

ଶ୍ରୀବଳଦେବଜୀଉ ପୀଠରେ ବିଗ୍ରହଙ୍କ ନବକଳେବର ହୋଇଥିବାର ମୂକସାକ୍ଷୀ କେହି ନାହାନ୍ତି । ହେଲେ ବନଯାଗ ପୋଥିରେ ଥିବା ତଥ୍ୟ ନବକଳେବରର ଚର୍ଚ୍ଚାକୁ ଭିନ୍ନ ମୋଡ଼ ଦେଇଛି । ୧୯୭୨ ମସିହାରେ ବାସୁଦେବ ସୁଆରଙ୍କ ପତ୍ନୀଙ୍କ ଠାରୁ ଏହି ପୋଥି ସଂଗ୍ରହ କରିଥିଲେ ଡ଼ ସତ୍ୟ ନାରାୟଣ ରାଜଗୁରୁ । ଏଥିରେ ନବକଳେବରର ନୀତିକାନ୍ତି ବାବଦରେ ସମସ୍ତ ତଥ୍ୟ ଉଲ୍ଲେଖ ରହିଛି । ଯାହା ଶମ୍ଭୁନାଥ ବାଜପେୟୀଙ୍କ ଦ୍ୱାରା ଷୋଡଶ ଶତାବ୍ଦୀରେ ବର୍ଣ୍ଣିତ । ପ୍ରଶ୍ନ ଉଠୁଛି, ଯଦି ଶ୍ରୀମନ୍ଦିରର ସବୁ ନୀତିକାନ୍ତି ପାଳନ ହେଉଛି ତେବେ ନବକଳେବର ନୀତି କାହିଁକି ନୁହେଁ ? ନବକଳେବର ହୋଇନଥିଲେ ମଧ୍ୟ ୨ରୁ ୩ ପିଢି ଧରି ରତ୍ନସିଂହାସନରୁ ଚତୁର୍ଦ୍ଧାମୂର୍ତ୍ତି ସେମିତି ଅକ୍ଷତ ଅବସ୍ଥାରେ ପୂଜା ପାଇ ଆସୁଛନ୍ତି । ଏହା ମହାପ୍ରଭୁଙ୍କ ଅଲୌକିକତା ନୁହେଁ ତ କଣ ?