କନକ ବ୍ୟୁରୋ: ଗୁଡ଼ାରୀ ବ୍ଲକ ଅଧକ୍ଷ୍ୟାଙ୍କ ବିରୋଧରେ ଅନାସ୍ଥା ଭୋଟିଂ । ରାୟଗଡା ଜିଲ୍ଲା ଗୁଡ଼ାରୀ ବ୍ଲକ ଅଧକ୍ଷ୍ୟା ଲକ୍ଷ୍ମୀ ଶବରଙ୍କ ବିରୋଧରେ ଅନାସ୍ଥା ଭୋଟିଂ ସରିଛି । କିନ୍ତୁ ହାଇକୋର୍ଟଙ୍କ ବାରଣ ପାଇଁ ଫଳାଫଳ ଘୋଷଣା ହୋଇ ପାରିନାହିଁ । ଗତ ପଞ୍ଚାୟତ ନିର୍ବାଚନରେ କର୍ଲାଘାଟି ପଞ୍ଚାୟତରୁ ସମିତି ସଭ୍ୟା ପ୍ରାର୍ଥୀ ଭାବେ ନିର୍ବାଚନ ଲଢ଼ି ବିଜେଡ଼ି ସମର୍ଥନରେ ଗୁଡ଼ାରୀ ବ୍ଲକର ଅଧକ୍ଷ୍ୟା ଭାବେ ନିର୍ବାଚିତ ହୋଇଥିଲେ । ତେବେ ପରବର୍ତ୍ତୀ ସମୟରେ କଂଗ୍ରେସରେ ଯୋଗ ଦେଇଥିଲେ । ଆଉ ଏହାପରେ ଅନାସ୍ଥା ଭୋଟିଂର ସମ୍ମୁଖୀନ ହୋଇଛନ୍ତି ବ୍ଲକ ଅଧକ୍ଷ୍ୟା ଲକ୍ଷ୍ମୀ ଶବର । ଗୁରୁବାର ଗୁଡ଼ାରୀ ବ୍ଲକ ଅଫିସ ପରିସରରେ କଡ଼ା ସୁରକ୍ଷା ବଳୟ ମଧ୍ୟରେ ଅଧ୍ୟକ୍ଷାଙ୍କ ବିରୋଧରେ ଅନସ୍ଥା ଭୋଟିଂ ହୋଇଛି । ବ୍ଲକର ୯ଟି ପଞ୍ଚାୟତରେ ୧୮ ଜଣ ସରପଞ୍ଚ ଓ ସମିତି ସଭ୍ୟ ରହିଛନ୍ତି । ତେବେ ୧୬ ଜଣ ସରପଞ୍ଚ ଓ ସମିତି ସଭ୍ୟ ଅନାସ୍ଥା ଭୋଟରେ ଅଂଶ ଗ୍ରହଣ କରିଥିଲେ । ଫଳାଫଳ ଘୋଷଣା ନକରିବା ପାଇଁ ବ୍ଲକ ଅଧ୍ୟକ୍ଷା ଲକ୍ଷ୍ମୀ ଶବର ହାଇକୋର୍ଟରୁ ରହିତାଦେଶ ଆଣିଥିବାରୁ ଗଣତି ପ୍ରକ୍ରିୟା ସ୍ଥଗିତ ରଖାଯାଇଛି । ପରବର୍ତ୍ତୀ ରାୟ ପର୍ଯ୍ୟନ୍ତ ନିର୍ବାଚନ ଫଳାଫଳ ଘୋଷଣା ହୋଇପାରିବ ନାହିଁ ବୋଲି ସ୍ପଷ୍ଟ କରିଛନ୍ତି ନିର୍ବାଚନ ଅଧିକାରୀ ତଥା ଗୁଡ଼ାରୀ ତହସିଲଦାର ଏ. ସ୍ନେହଲତା । ଗୁଡ଼ାରୀ ବ୍ଲକ ଅଧକ୍ଷ୍ୟା ମନମୁଖୀ ଶାସନ କରୁଥିବା ଅଭିଯୋଗ ଆଣି ବ୍ଲକର ଜନ ପ୍ରତିନିଧି ମାନେ ବ୍ଲକ ଅଧ୍ୟକ୍ଷାଙ୍କ ବିରୋଧରେ ଅନାସ୍ଥା ପ୍ରସ୍ଥାବ ଆଗତ ପାଇଁ ଗୁଣପୁର ଉପଜିଲ୍ଲାପାଳଙ୍କ ନିକଟରେ ଫେରାଦ ହୋଇଥିଲେ ।