୩ ମାସ ହେଲା ବ୍ଲକରେ ନାହାନ୍ତି ବିଡିଓ ; ଖାଲି ପଡ଼ିଛି ୨୧ ପଦବୀ

କନକ ବ୍ୟୁରୋ : କାମଚଳା ବିଡିଓଙ୍କ ଭରସାରେ ମାହାଙ୍ଗା ବ୍ଲକ, ଦିନେ ରାଜ୍ୟ ରାଜନୀତି ଓ ଅମଲାତନ୍ତ୍ରର ଚିଠା ପ୍ରସ୍ତୁତ କରୁଥିବା ମାହାଙ୍ଗା ବ୍ଲକ ଏବେ ମୁରବି ବିହୀନ ବୋଲି ଜନସାଧାରଣ କହିଲେଣି । ମାହାଙ୍ଗା ରାଜ୍ୟ ରାଜନୀତିର ଏକ ପ୍ରମୁଖ ବିଧାନସଭା ନିର୍ବାଚନ ମଣ୍ଡଳୀ। ପ୍ରଶାସନ ଓ ଶାସନ ବ୍ୟବସ୍ଥାରେ ସବୁବେଳେ ଶାଣିତ ହୋଇଥାଏ ମାହାଙ୍ଗାର ସ୍ୱର । ସେବେର ମାହାଙ୍ଗା ଆଉ ଆଜିର ମାହାଙ୍ଗାରେ ଆକାଶ ପାତାଳ ଫରକ । ମାହାଙ୍ଗା ବ୍ଲକରେ ଏବେ ଚାଲିଛି ପ୍ରାଶାସନିକ ଅବ୍ୟବସ୍ଥା । ୩ ମାସ ହେଲାଣି ନାହାନ୍ତି ସ୍ଥାୟୀ ବିଡିଓ । କାମଚଳା ଭାବେ ନିଶ୍ଚିନ୍ତକୋଇଲି ବିଡିଓ ଦାୟିତ୍ୱ ଦେଇଛି ଜିଲ୍ଲା ପ୍ରଶାସନ । ସେହିଭଳି ଜିପିଇଓ, ଏଇଇ, ଡବ୍ଲ୍ୟୁଇଓ, ୯ଜଣ ପିଇଓ, ୮ଜଣ ଏଡିଇଓ, ବରିଷ୍ଠ କିରାଣୀ ଭଳି ୨୧ଟି ପଦବି ଖାଲି ପଡ଼ିଛି। ଏପଟେ ବିଭିନ୍ନ ସରକାରୀ ସୁବିଧା ଓ ସେବା ନପାଇ ହନ୍ତସନ୍ତ ହେଉଛନ୍ତି ୩୫ଟି ପଞ୍ଚାୟତର ଅଧିବାସୀ । ବିଭିନ୍ନ ପଦ ପଦବୀ ଖାଲି ପଡ଼ିଥିବାରୁ ଅନେକ ଅନୁଦାନ ରାଶି ଖର୍ଚ୍ଚ ହୋଇନପାରି ପଡ଼ି ରହିଛି ।

ମିଳିଥିବା ତଥ୍ୟ ଅନୁସାରେ...
୨୦୨୫-୨୬ ଆର୍ଥିକ ବର୍ଷରେ ମନରେଗାରେ ଆସିଥିବା ୧୨କୋଟି
ପଞ୍ଚମ ରାଜ୍ୟ ଅର୍ଥ କମିଶନ ଓ ପଞ୍ଚଦଶ କେନ୍ଦ୍ର ଅର୍ଥ କମିଶନର ମୋଟ ୬କୋଟି 
ପୂର୍ବ ଆର୍ଥିକ ବର୍ଷର ୮କୋଟିରୁ ଅଧିକ ଉନ୍ନୟନ ଅର୍ଥ ଖର୍ଚ୍ଚ ନହୋଇ ପଡ଼ିରହିଛି

ପ୍ରାଶାସନିକ ଅଚଳାବସ୍ଥା ସହିତ ଅଧ୍ୟକ୍ଷା ଓ ବିଧାୟକ ମଧ୍ୟରେ ଟଣାଓଟରା ବ୍ଲକ ଅଞ୍ଚଳର ସାମଗ୍ରିକ ବିକାଶ ସରକାରୀ ନାଲି ଫିତା ତଳେ ବନ୍ଦ ପଡ଼ିଛି । ଅନ୍ୟପଟେ ମାହାଙ୍ଗା ବିଧାୟକ କହିଛନ୍ତି, ବ୍ଲକରେ କିଛି ଜନ ପ୍ରତିନିଧି ଦୁର୍ନୀତି କରିବାକୁ ଚାପ ପକାଉଥିବାରୁ କୌଣସି ଅଧିକାରୀ ମାହାଙ୍ଗା ବ୍ଲକରେ ରହିବାକୁ ଇଚ୍ଛା ପ୍ରକାଶ କରୁନାହାନ୍ତି । ଖୁବ୍‌ଶୀଘ୍ର ନୂଆ ବିଡିଓଙ୍କ ସହିତ ଅନ୍ୟାନ୍ୟ ପଦବୀ ପୂରଣ କରାଯିବ । ମାହାଙ୍ଗା ବ୍ଲକ୍‌ ପରିସରରେ କାର୍ଯ୍ୟାଳୟର ସୁରକ୍ଷା ଓ ଦେଖାରଖା କରିବାକୁ ବି କେହି ନାହାନ୍ତି ।