କନକ ବ୍ୟୁରୋ : ଘରୋଇ ହିଂସା ମାମଲାରେ ସୁପ୍ରିମକୋର୍ଟ ଏକ ବଡ଼ ନିଷ୍ପତ୍ତି ଶୁଣାଇଛନ୍ତି । ଏହାସହ ଦୁଇବର୍ଷ ତଳେ ଆହ୍ଲାବାଦ ହାଇକୋର୍ଟ ଦେଇଥିବା ରାୟକୁ କାଏମ ରଖି କୋର୍ଟ କହିଛନ୍ତି କି, ଭାରତୀୟ ଦଣ୍ଡ ସଂହିତା ଧାରା ୪୯୮ (କ) ଆଧାରରେ ଅଭିଯୋଗ ହେବାର ଦୁଇମାସ ପର୍ଯ୍ୟନ୍ତ ପୁଲିସ ଅଭିଯୁକ୍ତଙ୍କୁ ଗିରଫ କରିପାରିବ ନାହିଁ । କୋର୍ଟ କହିଛନ୍ତି କି, ଯେତେବେଳେ ଜଣେ ମହିଳା ତାଙ୍କ ସ୍ୱାମୀ ଓ ପରିବାର ଲୋକଙ୍କ ବିରୋଧରେ ନିର୍ଯାତନା ଅଭିଯୋଗ ଆଣୁଛନ୍ତି ସେତେବେଳେ ପୁଲିସ ସଂପୃକ୍ତ ସ୍ୱାମୀ ଓ ତାଙ୍କ ପରିବାର ଲୋକଙ୍କୁ ୨ ମାସ ପର୍ଯ୍ୟନ୍ତ ଗିରଫ କରିପାରିବ ନାହିଁ । 

Advertisment

ମଙ୍ଗଳବାର ଦିନ ସୁପ୍ରିମକୋର୍ଟ ଏହି ଆଦେଶ ଜଣେ ମହିଳା ଆଇପିଏସ୍ ଅଧିକାରୀଙ୍କ ସହ ଜଡ଼ିତ ମାମଲାର ଶୁଣାଣି ସମୟରେ କହିଛନ୍ତି । ଏହାସହ ମହିଳା ଜଣଙ୍କ ମିଥ୍ୟା ଅଭିଯୋଗ ଆଣିଥିବାରୁ ତାଙ୍କୁ ଗଣମାଧ୍ୟମରେ କ୍ଷମା ମାଗିବାକୁ ନିର୍ଦ୍ଦେଶ ଦେଇଛନ୍ତି । 

ସମାନ ମାମଲାରେ ୨୦୨୨ ମସିହାରେ ଆହ୍ଲାବାଦ ହାଇକୋର୍ଟ କହିଥିଲେ କି, ଏଭଳି ମାମଲାରେ ଅଭିଯୋଗ ହେବାର ଆଗାମୀ ଦୁଇମାସ ପର୍ଯ୍ୟନ୍ତ ସମୟକୁ ଶାନ୍ତି ଅବଧି ଭାବେ ଗଣନା କରାଯିବ । ଏହାସହ ଏହି ଦୁଇମାସ ମଧ୍ୟରେ ପୁଲିସ ଅଭିଯୁକ୍ତଙ୍କୁ କେବଳ ପଚରାଉଚରା କରିପାରିବ, କିନ୍ତୁ ଗିରଫ କରିପାରିବ ନାହିଁ । କୋର୍ଟ କହିଥିଲେ କି ଏହି ମାମଲାକୁ ପ୍ରଥମେ ଜିଲ୍ଲାରେ ଥିବା ପରିବାର କଲ୍ୟାଣ ସମିତି ନିକଟକୁ ପଠାଯିବ । 

ସୁପ୍ରିମକୋର୍ଟର ମୁଖ୍ୟ ବିଚାରପତି ଜଷ୍ଟିସ ବି.ଆର ଗବାଇ ଓ ଜଷ୍ଟିସ ଅଙ୍ଗଷ୍ଟାଇନଙ୍କ ପୀଠ ମଙ୍ଗଳବାର ଦିନ ଏଭଳି ନିର୍ଦ୍ଦେଶନାମାକୁ ସାରା ଦେଶରେ ଲାଗୁ କରିବାକୁ ନିର୍ଦ୍ଦେଶ ଦେଇଛନ୍ତି । ଏହି ନିର୍ଦ୍ଦେଶ ମୁତାବକ ଅଭିଯୋଗ ଦାଖଲ ହେବା ପର ଠାରୁ ଶାନ୍ତି ଅବଧି ସମାପ୍ତ ହେବା ପର୍ଯ୍ୟନ୍ତ ପୁଲିସ କୌଣସି ଦଣ୍ଡାତ୍ମକ ପଦକ୍ଷେପ ନେଇପାରିବ ନାହିଁ । ଏହି ଶାନ୍ତି ଅବଧି ସମୟରେ ମାମଲାକୁ ଜିଲ୍ଲା ପରିବାର କଲ୍ୟାଣ ସମିତିକୁ ପଠାଯିବ ।