ମହାକାଶ ଗବେଷଣାରେ ଭାରତକୁ ବଡ଼ ସଫଳତା ; ୧୩ ହଜାର କୋଟି ଟଙ୍କାର ଲଞ୍ଚ୍‌ ହେବ ସାଟେଲାଇଟ୍

କନକବ୍ୟୁରୋ : ମହାକାଶ କ୍ଷେତ୍ରରେ ଭାରତ ଆଉ ପାଦେ ଆଗେଇବାକୁ ଯାଉଛି । ଗ୍ରୁପ୍ କ୍ୟାପଟେନ୍ ଶୁଭାଂଶୁ ଶୁକ୍ଳାଙ୍କ ଆନ୍ତର୍ଜାତୀୟ ମହାକାଶ କେନ୍ଦ୍ର ଯାତ୍ରା ପରେ, ଭାରତ ୧୩ ହଜାର କୋଟି ଟଙ୍କା ବ୍ୟୟରେ ନିର୍ମିତ ଏକ ସାଟେଲାଇଟ୍ ଉତ୍‌କ୍ଷେପଣ କରିବାକୁ ଯାଉଛି । ଏହି ଉପଗ୍ରହର ଓଜନ ୨୪୦୦ କିଲୋଗ୍ରାମ ଏବଂ ଏହା ୧୨ ଦିନରେ ସମ୍ପୂର୍ଣ୍ଣ ପୃଥିବୀକୁ ପରିକ୍ରମା କରିପାରିବ । ଶ୍ରୀହରିକୋଟା ଉତ୍‌କ୍ଷେପଣ କେନ୍ଦ୍ରରୁ ୨୦୨୫ ଜୁଲାଇ ୩୦ ତାରିଖରେ ଏହି ସାଟେଲାଇଟକୁ ଲଞ୍ଚ୍‌ କରାଯିବ । ଏହି ସ୍ପେସ୍‌ ମିସନକୁ NISAR ନାମ ଦିଆଯାଇଛି । NISAR ଏକ ସେଣ୍ଟିମିଟରର ସଠିକତା ସହିତ ପୃଥିବୀର ସମସ୍ତ ଗତିବିଧିର ତଥ୍ୟ ପ୍ରଦାନ କରିବ । ଏହା ଭାରତ ଓ ଆମେରିକାର ଏକ ମିଳିତ ମିଶନ । ଦାବି କରାଯାଉଛି ଯେ ଏହି ଉପଗ୍ରହ ପୃଥିବୀ ଉପରେ ନଜର ରଖିବା ପ୍ରଣାଳୀରେ ଏକ ବଡ଼ ପରିବର୍ତ୍ତନ ଆଣିବ । 

NISAR ବିଶ୍ୱର ପ୍ରଥମ ଏଭଳି ସାଟେଲାଇଟ୍ ହେବ ଯାହା ଏକାସଙ୍ଗେ ଦୁଇଟି ରାଡାର ଫ୍ରିକ୍ୱେନ୍ସିରେ କାମ କରିବ । ଏହା ନାସାର L-ବ୍ୟାଣ୍ଡ୍‌ ରାଡାର ଏବଂ ଇସ୍ରୋର S-ବ୍ୟାଣ୍ଡ୍‌ ରାଡାର ଫ୍ରିକ୍ୱେନ୍ସିରେ କାର୍ଯ୍ୟ କରିବ । ୨୩୯୨ କିଲୋଗ୍ରାମ ଓଜନର ଏହି ସାଟେଲାଇଟ୍‌କୁ GSLV-F16 ରକେଟ୍ ଦ୍ୱାରା ଉତକ୍ଷେପଣ କରାଯିବ । NISARକୁ ୭୪୩ କିଲୋମିଟର ଉଚ୍ଚତାରେ Sun-synchronous orbit ରେ ସ୍ଥାପିତ କରାଯିବ । ପାଗ କିମ୍ବା ଦୃଶ୍ୟମାନତା ଯାହା ବି ହେଉନା କାହିଁକି , ଏହା ୧୨ ଦିନ ମଧ୍ୟରେ ସମଗ୍ର ପୃଥିବୀ ପୃଷ୍ଠର ହାଇ-ରିଜୋଲ୍ୟୁସନ୍ ଫଟୋ ପଠାଇବ । ଦିନ-ରାତି, ବର୍ଷା କିମ୍ବା ବାଦଲ ଥିଲେ ମଧ୍ୟ ଏହା କାର୍ଯ୍ୟକ୍ଷମ ରହିବ ।

NISAR ୧.୫ ବିଲିୟନ ଡଲାର ଅର୍ଥାତ୍ ପ୍ରାୟ ୧୩ ହଜାର କୋଟି ଟଙ୍କା ବ୍ୟୟରେ ନିର୍ମିତ ହୋଇଛି । ଏହା ପୃଥିବୀ ପର୍ଯ୍ୟବେକ୍ଷଣ ସାଟେଲାଇଟ୍ ମିସନ ମଧ୍ୟରେ ସବୁଠାରୁ ମହଙ୍ଗା ଉପଗ୍ରହ ଅଟେ । ସାଟେଲାଇଟ୍‌ରେ ଏକ ୧୨ ମିଟର ଲମ୍ବର ଆଣ୍ଟେନା ରହିଛି । ଦାବି କରାଯାଉଛି ଯେ ଏହାର ସେନ୍ସର ସେଣ୍ଟିମିଟର ଅଞ୍ଚଳରେ ହେଉଥିବା ସାମାନ୍ୟ ଗତିବିଧିକୁ ମଧ୍ୟ ଧରିପାରିବ । ଭୂକମ୍ପ ଯୋଗୁଁ ପୃଷ୍ଠରେ ସୃଷ୍ଟି ହେଉଥିବା ସୂକ୍ଷ୍ମ ଫାଟ କିମ୍ବା ବରଫାବୃତ ଅଞ୍ଚଳରେ ଗ୍ଲେସିୟର ସଙ୍କୁଚିତ ହେବା ଭଳି ପରିବର୍ତ୍ତନକୁ ମଧ୍ୟ ଏହା ଧରିପାରିବ ।