କନକ ବ୍ୟୁରୋ : ସଂସଦରେ ପାରିତ ହେଲା ନୂଆ ଆୟକର ବିଲ୍ । ପ୍ରଥମେ ଲୋକସଭା, ପରେ ରାଜ୍ୟସଭାରେ ପାରିତ ହୋଇଛି ନୂଆ ଆୟକର ବିଲ୍ । ରାଷ୍ଟ୍ରପତିଙ୍କ ଅନୁମୋଦନ ପରେ ଏହା ଆଇନରେ ପରିଣତ ହେବ । ଏହାଦ୍ବାରା ୬୦ ବର୍ଷ ତଳର ପୁରୁଣା ଆଇନରେ ସଂଶୋଧନ କରାଯାଇପାରିବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି । ୨୦୨୬ ଏପ୍ରିଲ ପହିଲାରୁ ଏହା ଲାଗୁ ହେବ । ନୂଆ ଆୟକର ଆଇନ ଆସିଲେ ଆୟକର ଦାଖଲ ପ୍ରକିୟା ସରଳୀକରଣ ହୋଇପାରିବ । ରାଜ୍ୟସଭାରେ ଗତକାଲି ଏ ସମ୍ପର୍କରେ ବିତର୍କ ବେଳେ ନିର୍ମଳା ସୀତାରମଣ ଆୟକର ବିଲ୍‌ରେ କ’ଣ ରହିଛି ସେନେଇ ବିସ୍ତୃତ ଭାବେ ସୂଚନା ଦେଇଥିଲେ । ଏହା ପୂର୍ବରୁ ଲୋକସଭାରେ ସୋମବାର ଦିନ ନୂଆ ଆୟକର ବିଲ୍ ପାସ୍ ହୋଇଥିଲା । ପୂର୍ବରୁ ଗତ ଫେବୃଆରୀ ୧୩ ତାରିଖରେ ଆଗତ ଆୟକର ବିଲ୍ ତର୍ଜମା ପାଇଁ ସିଲେକ୍ଟ କମିଟି ନିକଟକୁ ପଠାଯାଇଥିଲା । ଏହାକୁ ଅନୁଧ୍ୟାନ କରିବା ପାଇଁ ବାଚସ୍ପତି ଓମ୍ ବିର୍ଲା, କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡାଙ୍କ ଅଧ୍ୟକ୍ଷତାରେ ୩୧ ଜଣିଆ ସିଲେକ୍ଟ କମିଟି ଗଠନ କରିଥିଲେ। ନୂଆ ଆୟକର ବିଲ୍‌ରେ ଟିକସଦାତାଙ୍କୁ ଆଶ୍ବସ୍ତି ସହିତ ଆୟକର ଟିକସ ରିଫଣ୍ଡ ନିୟମରେ ପରିବର୍ତ୍ତନ ହୋଇଛି ।