ସୁସ୍ଥ ଅଛନ୍ତି ସୁନିତା ୱିଲିୟମ୍ସ ; ନାସାର ଦୃଢୋକ୍ତି ଆଣିଦେଲା ଆଶ୍ୱସ୍ତି

କନକ ବ୍ୟୁରୋ : ମହାକାଶରେ ସୁସ୍ଥ ଅଛନ୍ତି ସୁନୀତା ୱିଲିୟମ୍‌ସ । ଏନେଇ ନାସା ପକ୍ଷରୁ ସ୍ପଷ୍ଟ କରାଯାଇଛି । ସୁନୀତା ୱିଲିୟମ୍ସଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା ବଢ଼ୁଥିବା ବେଳେ ନାସା କହିଛି , ଅନ୍ତର୍ଜାତୀୟ ମହାକାଶ କେନ୍ଦ୍ରରେ ଥିବା ସମସ୍ତ ମହାକାଶଚାରୀଙ୍କ ସ୍ୱାସ୍ଥ୍ୟାବସ୍ଥା ଭଲ ରହିଛି । 

ନାସାର ମହାକାଶ ଅଭିଯାନ ନିର୍ଦ୍ଦେଶାଳୟର ମୁଖପାତ୍ର ଜିମି ରସେଲ କହିଛନ୍ତି, ଆଇଏସଏସରେ ଥିବା ନାସାର ସମସ୍ତ ମହାକାଶଚାରୀଙ୍କର ନିୟମିତ ସ୍ୱାସ୍ଥ୍ୟ ଯାଞ୍ଚ କରାଯାଇଥାଏ । ଫ୍ଲାଇଟ୍ ସର୍ଜନଙ୍କ ଦ୍ୱାରା ତଦାରଖ କରାଯାଏ । ସମସ୍ତଙ୍କ ସ୍ୱାସ୍ଥ୍ୟାବସ୍ଥା ଭଲ ରହିଛି ବୋଲି ସେ ସ୍ପଷ୍ଟ କରିଛନ୍ତି । ଆଇଏସଏସରେ ଦୀର୍ଘ ଦିନ ରହିବା ପରେ ୱିଲିୟମ୍ସ ସ୍ୱାସ୍ଥ୍ୟ ସଙ୍କଟର ସମ୍ମୁଖୀନ ହେଉଛନ୍ତି ବୋଲି ଗଣମାଧ୍ୟମରେ ଖବର ପ୍ରକାଶ ପାଇବା ପରେ ନାସା ଏହି ବୟାନ ଦେଇଛି । ସୁନିତା ଏବଂ ତାଙ୍କ ସାଥୀ ମହାକାଶଚାରୀ ବ୍ୟାରି ୱିଲମୋର ଜୁନ୍ ମାସରୁ ଆଇଏସ୍ଏସରେ ଅଛନ୍ତି । ଷ୍ଟାରଲାଇନର ମହାକାଶଯାନରେ ତ୍ରୁଟି ଯୋଗୁଁ ୮ ଦିନିଆ ଆଇଏସଏସ୍ ଅଭିଯାନ ମାସ ମାସ ଧରି ଚାଲିଥିଲା। ମହାକାଶଚାରୀମାନେ ଆସନ୍ତା ବର୍ଷ ଫେବ୍ରୁଆରିରେ ଘରକୁ ଫେରିବେ ।