କନକ ବ୍ୟୁରୋ : ନବରଙ୍ଗପୁରର ନର୍ସିଂ ଛାତ୍ରୀଙ୍କ ମୃତ୍ୟୁ। ଭୁବନେଶ୍ବର ଏମସରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଛି । ରାଇଘର ଥାନା ଅଞ୍ଚଳର ଜଣେ ନର୍ସିଂ ଛାତ୍ରୀ ମାନସିକ ଓ ଶାରୀରିକ ନିର୍ୟାତନା ସହିନପାରି ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ଏହାପରେ ଭୁବନେଶ୍ବର ଏମସକୁ ସ୍ଥାନାନ୍ତର କରାଯାଇଥିଲା, କିନ୍ତୁ ସେଠାରେ ମୃତ୍ୟୁ ହୋଇଛି । ରାଇଘର ଡୁମୁରିମୁଣ୍ଡା ଅଞ୍ଚଳର ସମ୍ପୃକ୍ତ ଛାତ୍ରୀ, ଜୟପୁରସ୍ଥିତ  ଏକ କଲେଜରେ ବିଏସସି ନର୍ସିଂ ଦ୍ୱିତୀୟ ବର୍ଷ ଛାତ୍ରୀ ଥିଲେ । ତାଙ୍କୁ ପଡୋଶୀ ଗାଁର ସତ୍ୟଜିତ ସରକାର ଏକତରଫା ପ୍ରେମ କରି ବାରମ୍ବାର ହଇରାଣ କରୁଥିଲେ । ଗତ ଜୁଲାଇ ୧୩ ତାରିଖରେ ଛାତ୍ରୀ ଜଣକ ବଜାରକୁ ଗ୍ରୋସରି କିଣିବାକୁ ଯାଇଥିବା ବେଳେ ସତ୍ୟଜିତ ବିଚ୍‌ ବଜାରରେ ନିସ୍ତୁକ ମାରପିଟ କରିଥିଲେ । ୧୫ ଜୁଲାଇରେ ଟାଉନ ଥାନାରେ ପୀଡିତା ନିଜ ତରଫରୁ ଏକ ଏତଲା ଦେଇଥିଲେ। ଜୟପୁର ପୋଲିସ କିନ୍ତୁ ଘଟଣାକୁ ଅତି ହାଲକା ଭାବେ ନେଇ ସତ୍ୟଜିତଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ  ଗ୍ରହଣ କରିନଥିଲା । ଅନ୍ୟପଟେ ଏକତରଫା ପ୍ରେମ କରୁଥିବା ସତ୍ୟଜିତ, ପୀଡିତା ଓ ତାଙ୍କ ପୁରୁଷ ବନ୍ଧୁଙ୍କ କିଛି ଫଟୋ ଓ ଭିଡିଓ ସୋସିଆଲ ମିଡ଼ିଆରେ ଭାଇରାଲ କରିଥିଲା । ଏଥିରେ ପୀଡିତା ଲୋକଲଜ୍ୟା ସହି ନପାରି ୧୭ ତାରିଖରେ ଘରେ ଥିବା ଘାସମରା ବିଷ ଖାଇ ଆତ୍ମହତ୍ୟା ଉଦ୍ୟମ କରିଥିଲେ । ପ୍ରଥମେ ଉମରକୋଟ ମେଡିକାଲ, ପରେ ଅବସ୍ଥା ଗୁରୁତର ହେବାରୁ ରାୟପୁର ନେଇଥିଲେ । ଏହାପରେ ଭୁବନେଶ୍ୱର ଏମ୍ସକୁ ସ୍ଥାନାନ୍ତର କରାଯାଇଥିଲା । ଚିକିତ୍ସାଧୀନ ଅବସ୍ଥାରେ ପୀଡିତାଙ୍କ ମୃତ୍ୟୁ ଘଟିଛି । ସେପଟେ ପରିବାର ଲୋକଙ୍କ ଅଭିଯୋଗ ଆଧାରରେ ସତ୍ୟଜିତ ସରକାର ଓ ଫଟୋ ଭାଇରାଲ କରିଥିବା ତାଙ୍କ ବନ୍ଧୁଙ୍କୁ ପୋଲିସ ଗିରଫ କରିଛି 

Advertisment