ଅଶୁଭ ଶନିବାରର ଫିଟୁନି ରହସ୍ୟ ; ବଳଙ୍ଗା ପୋଡି ଘଟଣାରୁ ଏବେ ବି ଉଠୁନି ପରଦା

କନକ ବ୍ୟୁରୋ : ବଳଙ୍ଗା ନାବାଳିକା ପୋଡ଼ି  ଘଟଣା ତଦନ୍ତରେ ଅଟକି ରହିଛି ପୁଲିସ । ପୀଡ଼ିତାଙ୍କ ବୟାନ ଶୁଣିବା ପରେ ବି କ୍ରାଇମବ୍ରାଞ୍ଚ ମୁହଁ ଖୋଲୁନି । ଏସବୁ ଭିତରେ ପ୍ରଶ୍ନ ଉଠୁଛି, ରହସ୍ୟରୁ କେବେ ହଟିବ ପରଦା । ବଳଙ୍ଗା ନାବାଳିକା ପୋଡି ଘଟଣାକୁ ୮ ଦିନ ବିତିଲାଣି , ହେଲେ ଏଯାଏଁ ପୁଲିସ ହାତ ଖାଲି । କ୍ରାଇମବ୍ରାଞ୍ଚର ଟିମ୍ ଦିଲ୍ଲୀରେ ପୀଡିତାଙ୍କୁ ବୟାନ ରେକର୍ଡ କରିଛି । ପୀଡିତା ଗୁରୁତ୍ବପୂର୍ଣ୍ଣ ତଥ୍ୟ ଦେଇଛନ୍ତି,  ହେଲେ ଦୁର୍ବୃତ୍ତଙ୍କ ବାବଦରେ କେହି ଖୋଲୁନାହାନ୍ତି ମୁହଁ । ବରଂ ଆହୁରି ପ୍ରମାଣ ହାତେଇବାକୁ ତଦନ୍ତ କରୁଛି ପୁଲିସ ।  ଫରେନ୍ସିକ ଟିମ୍ ଘଟଣାସ୍ଥଳ, ଉଦ୍ଧାରକାରୀ ଦୁଃଖୀଶ୍ୟାମଙ୍କ ଘରୁ ଅନେକ ସାମଗ୍ରୀ ଜବତ କରିଛି । 

କିରୋସିନି ଡବା, ପୋଡା କପଡା, ମାଟି, ଫିଙ୍ଗର ପ୍ରିଣ୍ଟ ଥିବା ସାମଗ୍ରୀ ବଳଙ୍ଗା ଥାନାକୁ ଅଣାଯାଇଛି । ଏସ୍‌ପି କହିଛନ୍ତି, କୌଣସି ଦିଗକୁ ତଦନ୍ତରେ ଛଡ଼ାଯିବନି , ସେଥିପାଇଁ ସମୟ ଲାଗୁଛି । ପୁଲିସ ଓ କ୍ରାଇମବ୍ରାଞ୍ଚର ତଦନ୍ତ ଭିତରେ ଜଟଣୀରେ ପହଞ୍ଚିଛି ବଳଙ୍ଗା ପୁଲିସର ଏକ ଟିମ୍ । ଜଣେ ସମ୍ପର୍କୀୟଙ୍କ ସମ୍ପୃକ୍ତି ସନ୍ଦେହ କରି ତଦନ୍ତକୁ ଜୋରଦାର କରିଛି ପୁଲିସ । ହେଲେ ନାବାଳିକା ପୀଡିତାଙ୍କୁ କିଏ ଓ କାହିଁକି ଜାଳି ମାରିଦେବାକୁ ଚାହୁଁଥିଲେ ତା ଉପରୁ ହଟୁନି ପରଦା । ଅନ୍ୟପଟେ ଏହି ଘଟଣାରେ ପୁଲିସର ତଦନ୍ତ ଉପରେ ବଡ ପ୍ରଶ୍ନବାଚୀ ଛିଡା କରିଛନ୍ତି ବିରୋଧି କଂଗ୍ରେସ ଓ ବିଜେଡି । କେବଳ ବଳଙ୍ଗା ଅଘଟଣ ନୁହେଁ ପୂର୍ବ ଶନିବାର ବାଲେଶ୍ବର ଏଫ୍ଏମ୍ କଲେଜରେ ଘଟିଥିବା ଛାତ୍ରୀ ଆତ୍ମହୁତି ଘଟଣାରେ ମଧ୍ୟ ଏଯାଏଁ ଖିଅ ପାଉନି ତଦନ୍ତକାରୀ ଟିମ୍ । ଅନେକ ପଚରାଉଚରା ପରେ ମଧ୍ୟ ଅଶୁଭ ଶନିବାରର ସେହି ଅଘଟଣ ଉପରୁ ହଟୁନି ପରଦା ।