ପୁଅ ସାହାଯ୍ୟ ପାଇଁ ଚିତ୍କାର କରୁଥିଲା, ଆଉ ମୁଁ ଥିଲି ଅସହାୟ: ଆଖି ଆଗରେ ବୁଡ଼ିଗଲା ମୋ ପୁଅ, କାନ୍ଦି କାନ୍ଦି କହିଲେ ବାପା

କନକବ୍ୟୁରୋ : ଗ୍ରେଟର ନୋଏଡାର ସେକ୍ଟର ୧୫୦ରେ ଘଟିଥିବା ଏକ ଦୁଃଖଦ ଦୁର୍ଘଟଣା‌ରେ ବାପାଙ୍କ ଆଖି ଆଗରେ ପୁଅର ଜୀବନ ଯାଇଛି ।  ପୁଅ ମତେ ବଞ୍ଚାଅ ବଞ୍ଚାଅ ବୋଲି ଚିତ୍କାର କରୁଥିଲେ ମଧ୍ୟ ଅସହାୟ ବାପା କେବଳ ନୀରବ ଦ୍ରଷ୍ଟା ସାଜିଥିଲେ । ତାଙ୍କ ଆଖି ଆଗରେ ପୁଅ ବୁଡ଼ି ଯାଇଥିଲେ ବୋଲି କୋହଭରା କଣ୍ଠରେ କାନ୍ଦିକାନ୍ଦି କହିଛନ୍ତି ବାପା ।  ଟାଟା ୟୁରେକା ପାର୍କ ସୋସାଇଟିର ବାସିନ୍ଦା ସଫ୍ଟୱେର୍ ଇଞ୍ଜିନିୟର ଯୁବରାଜ ମେହେଟ୍ଟାଙ୍କ ପିତା ରାଜ କୁମାର ମେହେଟ୍ଟା କହିଛନ୍ତି , ତାଙ୍କ ପାଖକୁ ଦିନ ପ୍ରାୟ ୧୨ଟା ବେଳେ ପୁଅର ଫୋନ୍ ଆସିଥିଲା ।

ଟଙ୍କା ଦିଅ ମେମ୍ବର ହୁଅ: ପିସ୍ ବୋର୍ଡ ସଦସ୍ୟ ହେବାକୁ ଭାରତକୁ ଟ୍ରମ୍ପଙ୍କ ନିମନ୍ତ୍ରଣ

 ପୁଅ କହିଥିଲା ମୁଁ ଏକ ଡ୍ରେନ୍‌ରେ ପଡ଼ିଯାଇଛି । ମୋତେ ଆସି ବଞ୍ଚାଇ ।  କିନ୍ତୁ ମୁଁ ତାହା କରିପାରିଲି ନାହିଁ ।  ଯଦି ଡ୍ରାଇଭରମାନେ ଆସିଥାନ୍ତେ, ତେବେ ମୋ ପୁଅର ଜୀବନ ବଞ୍ଚିଯାଇଥାନ୍ତା । ସେକ୍ଟର ୧୫୦ ଟି-ପଏଣ୍ଟ ନିକଟରେ ଏକ ବେସ୍‌ମେଣ୍ଟରେ ୭୦ ଫୁଟ ପାଣି ଭର୍ତ୍ତି ଖାଲରେ ସଫ୍ଟୱେର୍ ଇଞ୍ଜିନିୟର ଯୁବରାଜ ମେହେଟାଙ୍କ କାର ବୁଡ଼ି ଯାଇଥିଲା ।  କାର ଭିତରେ ଥିବା ଯୁବରାଜଙ୍କର ମୃତ୍ୟୁ ଘଟିଥିଲା ।  ପୁଅ ସାହାଯ୍ୟ ପାଇଁ ଚିତ୍କାର କରିଚାଲିଥିଲା ।  

କାର ଭିତରେ ଥାଇ ପୁଅ ଟର୍ଚ୍ଚ ଜାଳି ଜୀବିତ ଥିବାର ପ୍ରମାଣ ମଧ୍ୟ ଦେଖାଇଥିଲା ।  ସୂଚନା ପାଇବା ପରେ, ପୁଲିସ ଓ ଅଗ୍ନିଶମ ବାହିନୀ କର୍ମଚାରୀ ମାନେ ଘଟଣାସ୍ଥଳରେ ପହଞ୍ଚି ପ୍ରଥମେ ଏକ ରଶି ପକାଇ ତାଙ୍କୁ ଉଦ୍ଧାର କରିବାକୁ ଚେଷ୍ଟା କରିଥିଲେ । କିନ୍ତୁ ରଶି ତାଙ୍କ ପାଖରେ ପହଞ୍ଚି ପାରି ନଥିଲା । ଡକାଯାଇଥିବା କ୍ରେନ୍ ମଧ୍ୟ ତାଙ୍କ ପାଖରେ ପହଞ୍ଚି ପାରିନଥିଲା। ବୋଲି ବାପା କହିଛନ୍ତି। ଉଦ୍ଧାର କାର୍ଯ୍ୟରେ ବିଳମ୍ବ ହୋଇଥିଲା। ଘଟଣାସ୍ଥଳରେ କୌଣସି ଡାଇଭର ମଧ୍ୟ ପହଞ୍ଚି ପାରିନଥିଲେ ।  ଶେଷରେ ଏସ୍‌ଡିଆର୍‌ଏଫ୍ ଓ ଏନ୍‌ଡିଆର୍‌ଏଫ୍‌ କର୍ମଚାରୀଙ୍କୁ ଡକାଯାଇଥିଲା ।

 କିଛି ଘଣ୍ଟା ଖୋଜାଖୋଜି ପରେ, ସେମାନେ ପୁଅକୁ ଉଦ୍ଧାର କରିଥିଲେ, କିନ୍ତୁ ସେତେବେଳକୁ ତା’ର ମୃତ୍ୟୁ ହୋଇସାରିଥିଲା ।  ମୃତ୍ୟୁ ଘଟଣାରେ ନଲେଜ୍ ପାର୍କ କୋତୱାଲି ପୁଲିସ ଏକ ମାମଲା ରୁଜୁ କରିଛି ।  ରବିବାର ଦିନ, ସଫ୍ଟୱେର୍  ଇଞ୍ଜିନିୟରଙ୍କ ପିତାଙ୍କ ଅଭିଯୋଗ ଆଧାରରେ ଦୁଇଟି ବିଲ୍ଡର କମ୍ପାନି ଏମଜେ ୱିଷ୍ଟଟାଉନ୍ ଓ ଲୋଟସ୍ ଗ୍ରୀନ୍ ବିରୋଧରେ ଏକ ଏଫଆଇଆର୍ ରୁଜୁ କରାଯାଇଛି । ରାଜକୁମାର ମେହେଟ୍ଟାଙ୍କ ଅଭିଯୋଗ ଆଧାରରେ, ପୁଲିସ ବିଲ୍ଡରଙ୍କ ବିରୋଧରେ ଆଇପିସିର ଧାରା ଅନୁଯାୟୀ ମାମଲା ରୁଜୁ କରିଛି । ବେସ୍‌ମେଣ୍ଟରେ ଥିବା ଖାଲ ଚାରିପଟେ କାହିଁକି ବ୍ୟାରିକେହ୍ ଲଗାଯାଇ ନଥିଲା ସେନେଇ ଏବେ ପ୍ରଶ୍ନ ଉଠିଛି ।