ଲଗାଣ ବର୍ଷାରେ ଭାଙ୍ଗିଗଲା ମାଟି ଘର । ଅଳ୍ପକେ ବର୍ତ୍ତିଗଲା ଅସହାୟ ବୃଦ୍ଧାଙ୍କ ପରିବାର

କନକ ବ୍ୟୁରୋ : ଲଗାଣ ବର୍ଷାରେ ଭାଙ୍ଗି ଗଲା ମାଟି ଘର । ଅସହାୟ ବୃଦ୍ଧା ଏବେ ବାରଦୁଆର ବୁଲୁଛନ୍ତି । ଘର ଖଣ୍ଡିଏ ପାଇଁ ଅଭିଯୋଗ କରିକରି ନିରାଶ ହୋଇଛନ୍ତି । ମାଟି ଘର ଭାଙ୍ଗିଯାଇଛି କିନ୍ତୁ ଅଳ୍ପକେ ତାଙ୍କ ଜୀବନ ବଞ୍ଚିଯାଇଛି । ଏବେ ନା ଘରେ ଚୁଲି ଜଳୁଛି ନା ମୁଣ୍ଡ ଗୁଞ୍ଜିବାକୁ ଛାତ ଅଛି । ଅସହାୟ ପରିବାର । ପୀଡ଼ିତଙ୍କ ପାଖରେ ପହଞ୍ଚି ନାହାନ୍ତି ସରପଞ୍ଚ କି ପ୍ରଶାସନ ।

ଅନୁଗୋଳ ସଦର ମହକୁମାରେ ରହିଛି, ବନରପାଳ ବ୍ଲକ କରଡାଗାଡିଆ ପଞ୍ଚାୟତ । ୪ ନମ୍ୱର୍ ୱାର୍ଡ ଉପରସାହିରେ ବସବାସ କରନ୍ତି କ୍ଷୀର ନାଏକ । ବହୁ ବର୍ଷ ପୂର୍ବରୁ କ୍ଷୀରଙ୍କ ସ୍ବାମୀ ଏକ ଦୁର୍ଘଟଣାରେ ପ୍ରାଣ ହରାଇବା  ପରେ ଭତା ଟଙ୍କାରେ ଗୁଜୁରାଣ ମେଣ୍ଟାଉଛନ୍ତି । ବୟସ ୭୦ ଟପିଲାଣି । ମୁଲ ମଜୁରୀ କରିପାରୁନାହାନ୍ତି । ଝିଅ ବାହାଘର ପରେ ଭଙ୍ଗା ଦଦରା ମାଟିଘରେ ଏକାକି ଜୀବନ ବିତାଉଛନ୍ତି । ଅସୁରକ୍ଷିତ ଅବସ୍ଥାରେ ରହୁଛନ୍ତି ।

ଲଗାଣ ବର୍ଷାରେ ହଠାତ୍ ରାତିରେ ଭୁଶୁଡ଼ି ପଡ଼ିଲା ମାଟିଘର । ସେତେବେଳେ ଘର ଭିତରେ ଥିଲେ କ୍ଷୀର, ତାଙ୍କ ଝିଅ ଓ ନାତି ନାତୁଣୀ । ଭଗବାନଙ୍କ ଦୟାରୁ ଅଳ୍ପକେ ବଞ୍ଚିଗଲା ଜୀବନ । ଏବେ ବାସହରା ହୋଇ ୟା-ତା ଘର ବୁଲୁଛନ୍ତି । ଘରେ ଚୁଲି ଜଳୁନି। ଖିଆପିଆ ନାହିଁ, ଭୋକ ଉପବାସରେ ମୁଣ୍ଡରେ ହାତ ଦେଇ ବସିଛନ୍ତି । ବର୍ଷବର୍ଷ ଧରି ଭଙ୍ଗା ଘରେ ଅସହାୟ ପରିବାର ରହୁଥିଲେ ମଧ୍ୟ ଏଯାଏଁ ସରପଞ୍ଚ କି ପ୍ରଶାସନ କେହି ତାଙ୍କ ପାଖରେ ପହଞ୍ଚି ନାହାନ୍ତି । ସରକାରୀ ଆବାସଟିଏ ବି ମିଳିନାହିଁ । ତେଣୁ ନିଜ ଭଙ୍ଗାଘରକୁ ଭଙ୍ଗାଅଣ୍ଟା ସଜାଡୁଛନ୍ତି କ୍ଷୀର । 

ଭୋଟ ସମୟରେ କ୍ଷୀରଙ୍କ ପାଖକୁ ନେତା ଆସନ୍ତି, ପ୍ରତିଶ୍ରୁତି ବି ଦିଅନ୍ତି । କିନ୍ତୁ ବିପଦ ବେଳେ କେହି ବି ଠିଆ ହେଉନାହାନ୍ତି । ବର୍ଷାରେ ବାସହାର ପରିବାରର ଅସହାୟତାକୁ ନେଇ ସରପଞ୍ଚ ଶାନ୍ତିଲତା ବେହେରାଙ୍କ ସହ ଯୋଗାଯୋଗ କରିବାକୁ ଚେଷ୍ଟା କରାଯାଇଥିଲେ ହିଁ ଯୋଗାଯୋଗ ହୋଇପାରିନି ।