ବୌଦ୍ଧ ବାଣ ବିସ୍ଫୋରଣକୁ ମାସେ; ଆଜି ବି ମିଳିପାରିନି ସରକାରୀ ସହାୟତା

କନକ ବ୍ୟୁରୋ : ବୌଦ୍ଧ ଜିଲ୍ଲା ପୁରୁଣାକଟକ ବାଣ ବିସ୍ପୋରଣ ଘଟଣାକୁ ମାସେ ପୁରିଛି । ବିସ୍ପୋରଣରେ ଜଣଙ୍କର ମୃତ୍ୟୁ ହେବା ସହ ୧୦ ଜଣ ଗୁରୁତର ହୋଇଥିଲେ । ଅନେକଙ୍କ ଘର ଉଜୁଡ଼ିଯାଇଥିଲା । ହେଲେ ଆଜି ଯାଏଁ ବିପନ୍ନଙ୍କୁ ସରକାରୀ ସହାୟତା ନ ମିଳିବାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ପୀଡ଼ିତଙ୍କ ପରିବାର ।

ମାଟିରେ ମିଶିଛିଯାଇଛି ଘର । ଉଜୁଡ଼ିଯାଇଛି ପରିବାର । ଆଜି ବି ବିସ୍ପୋରଣର ଶଦ୍ଦ କାନରେ ଗୁଞ୍ଜରିତ ହେଉଛି । ଗାଁରୁ ଆସୁଛି ବାରୁଦ ଗନ୍ଧ । ବୌଦ୍ଧ ଜିଲ୍ଲା ପୁରୁଣାକଟକ ଜିଆଁକଟା ଗାଁରେ ବାଣ ବିସ୍ପୋରଣ ଘଟଣାକୁ ମାସେ ପୁରିଛି । ଗୋଟେ ପରିବାର ହରାଇଥିବା ପ୍ରିୟଜନକୁ ଝୁରୁଛି । ଅନେକ ଶାରୀରିକ ଭାବେ ଅକ୍ଷମ ହୋଇଯାଇଛନ୍ତି । ହେଲେ ଏପର୍ଯ୍ୟନ୍ତ ସରକାରୀ ସହାୟତା ମିଳିନଥିବାରୁ ଜିଲ୍ଲାପାଳଙ୍କ ଦ୍ୱାରସ୍ଥ ହୋଇଛନ୍ତି ପୀଡ଼ିତ ପରିବାର ।

ସେପ୍ଟେମ୍ବର ୨, ରବିବାର । ବାଣ ବିସ୍ଫୋରଣରେ ଥରି ଉଠିଲା ବୌଦ୍ଧ ଜିଆଁକଟା ଗାଁ । କେହି କିଛି ବୁଝିବା ଆଗରୁ ସବୁ କିଛି ମାଟି ମିଶିଗଲା ଧ୍ୱଂସ ହୋଇଗଲା ୩୦ ରୁ ଅଧିକ ଘର । ଲକ୍ଷ୍ମୀଧର ବେହେରା ନାମକ ବ୍ୟକ୍ତିଙ୍କର ମୃତ୍ୟୁ ହୋଇଗଲା । ୧୦ ରୁ ଅଧିକ ଗୁରୁତର ହେଲେ । ବତ୍ତର୍ମାନ ଗୁରୁତରମାନେ ଚିକିତ୍ସିତ ହୋଇ ଘରକୁ ଫେରିଛନ୍ତି । ଆଉ ସରକାରୀ ସହାୟତାକୁ ଅପେକ୍ଷା କରିଛନ୍ତି । ତଦନ୍ତ କରି ସହାୟତା ଯୋଗାଇ ଦିଆଯିବ ବୋଲି କହିଛନ୍ତି ବୌଦ୍ଧ ଉପଜିଲ୍ଲାପାଳ । ବାଣ ବିସ୍ଫୋରଣ ଘଟଣାକୁ ମାସେ ପରେ ବି କ୍ଷତିଗ୍ରସ୍ତଙ୍କୁ କ୍ଷତିପୂରଣ ନମିଳିବା ଜିଲ୍ଲା ପ୍ରଶାସନର ପାରିବାପଣିଆକୁ ପଦାରେ ପକାଇଛି ।