କାଶ୍ମୀର-ହିମାଚଳରେ ମୌସୁମୀର କରାଳ ରୂପ, ଭୂସ୍ଖଳନରେ ୪ ମୃତ

କନକ ବ୍ୟୁରୋ: ଦେଶର ବିଭିନ୍ନ ଭାଗରେ ମୌସୁମୀ ବର୍ଷା କେଉଁଠି ଆଶୀର୍ବାଦ ତ କେଉଁଠି ଅଭିଶାପ ପାଲଟିଛି । ପାହାଡ଼ିଆ ରାଜ୍ୟ କାଶ୍ମୀର ଏବଂ ହିମାଚଳ ପ୍ରଦେଶରେ ପ୍ରବଳ ବର୍ଷା ଯୋଗୁଁ ଭୂସ୍ଖଳନ ଘଟିଛି । ସେହିପରି ରାଜସ୍ଥାନରୁ ମୁମ୍ବାଇ ପର୍ଯ୍ୟନ୍ତ ସମତଳ ଅଞ୍ଚଳରେ ପ୍ରବଳ ବର୍ଷା ଯୋଗୁ  ଜନଜୀବନକୁ ଅସ୍ତବ୍ୟସ୍ତ  ହୋଇପଡିଛି । ହିମାଚଳ ପ୍ରଦେଶର କିନ୍ନୌର ଜିଲ୍ଲାରେ ଏକ ବଡ଼ ଧରଣର ଭୂସ୍ଖଳନ ଘଟିଛି । ରିପୋର୍ଟ ଅନୁଯାୟୀ, ଏହି ଘଟଣାରେ ଏକ ଗାଡ଼ି ଭାଙ୍ଗିରୁଜି ଯିବା ସହ ତିନି ଜଣଙ୍କର ମୃତ୍ୟୁ ହୋଇଛି । ମୃତକମାନେ ଗାଡ଼ିରେ ଯାତ୍ରା କରୁଥିବାବେଳେ ପାହାଡ଼ରୁ ଅତଡ଼ା ଖସି ସେମାନଙ୍କ ଉପରେ ପଡ଼ିଥିଲା ।

ସେହିପରି, କାଶ୍ମୀରର ଗାନ୍ଦରବଲ ଜିଲ୍ଲାରେ ମଧ୍ୟ ଅମରନାଥ ଯାତ୍ରା ମାର୍ଗ ନିକଟରେ ଭୂସ୍ଖଳନ ହୋଇଛି । ଯେଉଁଥିରେ ଜଣେ ତୀର୍ଥଯାତ୍ରୀଙ୍କର ମୃତ୍ୟୁ ଘଟିଛି ଏବଂ ଛଅ ଜଣ ଆହତ ହୋଇଛନ୍ତି । ଏହି ଘଟଣା ପରେ ଅମରନାଥ ଯାତ୍ରାକୁ ଅସ୍ଥାୟୀ ଭାବେ ସ୍ଥଗିତ ରଖାଯାଇଛି । ପ୍ରଶାସନ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଛି ଏବଂ ଆହତମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଅନ୍ୟପଟେ, ପଶ୍ଚିମ ଭାରତରେ ମୌସୁମୀ ସକ୍ରିୟ ରହିଛି । ମୁମ୍ବାଇରେ ପ୍ରବଳ ବର୍ଷା ଲାଗିରହିଛି, ଯାହାଫଳରେ ଅନେକ ତଳିଆ ଅଞ୍ଚଳ ଜଳମଗ୍ନ ହୋଇଛି ଏବଂ ଟ୍ରାଫିକ ସମସ୍ୟା ସୃଷ୍ଟି ହୋଇଛି । ପାଣିପାଗ ବିଭାଗ ପକ୍ଷରୁ ମୁମ୍ବାଇ ଏବଂ ଏହାର ଆଖପାଖ ଅଞ୍ଚଳ ପାଇଁ ଅରେଞ୍ଜ ଆଲର୍ଟ ଜାରି କରାଯାଇଛି । ରାଜସ୍ଥାନରେ ମଧ୍ୟ ବର୍ଷାର ପ୍ରକୋପ ଦେଖିବାକୁ ମିଳିଛି । ରାଜ୍ୟର ଅନେକ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ରେକର୍ଡ କରାଯାଇଛି, ଯାହାଫଳରେ ବନ୍ୟା ପରିସ୍ଥିତି ସୃଷ୍ଟି ହୋଇଛି ।