ଓଡ଼ିଶାକୁ ସଅଳ ଆସିପାରେ ମୌସୁମୀ

କନକ ବ୍ୟୁରୋ: ବର୍ଷ ବର୍ଷ ଧରି ଠିକ୍‌ ସମୟରେ ମୌସୁମୀ ଆସୁନି । ଏହାର ପ୍ରଭାବ ଚାଷ ଓ ଚାଷୀ ଉପରେ ପଡୁଛି । ତେବେ ଏଥର ଆଗୁଆ ଆଣ୍ଡାମାନ ଛୁଇଁଥିବାରୁ ଆସନ୍ତା କିଛିଦିନ ଭିତରେ ମୌସୁମୀ କେରଳ ଛୁଇଁପାରେ । ଯଦି ପାଣିପାଗ ବିଭାଗର ଅନୁମାନ ସତ ହେବ ତେବେ, ବହୁ ବର୍ଷ ପରେ ମୌସୁମୀ ଓଡ଼ିଶା ବି ସଅଳ ଛୁଇଁବା ସମ୍ଭାବନା ରହିଛି ।

Advertisment

୧୬ବର୍ଷ ପରେ ମୌସୁମୀ ଆସିବ ସଅଳ
ସ୍ବାଭାବିକ ହେବ କି ବର୍ଷା, ବଢ଼ିବ କି ଅମଳ?

ସାରା ଦେଶକୁ ବର୍ଷା ଚିନ୍ତା । ଠିକ୍‌ ସମୟରେ ମୌସୁମୀ ଆସୁନଥିବାରୁ ଅମଳ ଉପରେ ପ୍ରଭାବ ପଡୁଛି । ହେଲେ ଏଥର ସଅଳ ଆସିବାକୁ ଯାଉଛି ମୌସୁମୀ । ଆଉ ମାତ୍ର ୪ରୁ ୫ ଦିନ ମଧ୍ୟରେ କେରଳ ଛୁଇଁପାରେ । ଯଦି ପାଣିପାଗ ବିଭାଗର ଅନୁମାନ ଠିକ୍‌ ହୁଏ, ତେବେ ୧୬ବର୍ଷ ପରେ ମୌସୁମୀ ଆଗୁଆ କେରଳ ଛୁଇଁବ । ଶେଷଥର ୨୦୦୯ ମେ' ୨୩ରେ କେରଳ ଛୁଇଁଥିଲା ମୌସୁମୀ । ଗତ ୫ବର୍ଷର ତଥ୍ୟ କହୁଛି, ମେ ୨୮ ପୂର୍ବରୁ ମୌସୁମୀ ଆସିନି ।

୨୦୨୦ରେ ଜୁନ ୧
୨୦୨୧ରେ ଜୁନ୍ ୩
୨୦୨୨ରେ ମେ ୨୯
୨୦୨୩ରେ ଜୁନ୍ ୮
୨୦୨୪ରେ ମେ ୩୦ରେ କେରଳ ଛୁଇଁଥିଲା ମୌସୁମୀ । ଏଥର ସଅଳ ଆସୁଥିବାରୁ ବର୍ଷା ସ୍ବାଭାବିକ ହୋଇପାରେ । ତେଣୁ ଅମଳ ମଧ୍ୟ ଭଲ ହେବ ବୋଲି ଆଶା କରାଯାଉଛି ।

ଓଡ଼ିଶାକୁ ଠିକ୍‌ ସମୟରେ ମୌସୁମୀ ଆସୁନଥିବାରୁ ଚାଷକାମ ଧିମେଇଛି । ଅକ୍ଷୟ ତୃତୀୟାରୁ ସରିଲାଣି ଅଖିମୁଠି ଅନୁକୂଳ । କିନ୍ତୁ ଏଯାଏଁ ବିଲରେ ଲଙ୍ଗଳ ବାଜିନି । ଜମିକୁ ପାଣି ଯାଉନି, ଆକାଶରେ ବି ମେଘ ନାହିଁ । ତେଣୁ ଶୁଖିଲା ପଡ଼ିଆ ଜମିକୁ ଦେଖି ଚାଷୀର ଛାତି ଫାଟି ଯାଉଛି । ଗତବର୍ଷ ଜୁନ ୮ରେ ଓଡ଼ିଶା ଛୁଇଁଥିଲା ମୌସୁମୀ । କିନ୍ତୁ ୨୦୧୯ରୁ ୨୦୨୩ ଭିତରେ ମୌସୁମୀ ଛୁଇଁବା ବେଳକୁ ପ୍ରାୟ ଜୁନ୍ ଅଧା ହୋଇଛି ।

୨୦୧୯ରେ ଜୁନ୍‌ ୨୧
୨୦୨୦ରେ ଜୁନ୍ ୧୧
୨୦୨୧ରେ ଜୁନ୍ ୧୦
୨୦୨୨ରେ ଜୁନ୍ ୧୬
୨୦୨୩ରେ ଜୁନ୍ ୨୨ରେ ଓଡ଼ିଶା ଛୁଇଁଥିଲା ଦକ୍ଷିଣ-ପଶ୍ଚିମ ମୌସୁମୀ । ଋତୁଚକ୍ର ବଦଳି ଯାଉଥିବାରୁ ଚାଷ ଉପରେ ତାହାର ପ୍ରଭାବ ପଡୁଛି । ଏଥର ଯଦି ବର୍ଷା ସ୍ବାଭାବିକ ନ ହେବ, ତେବେ ଚାଷ ଉଜୁଡିଯିବା କିଛି ଅସମ୍ଭବ ନୁହେଁ ।