କନକ ବ୍ୟୁରୋ: ରାଜ୍ୟରେ ମୋହନ ସରକାରକୁ ୩୩୪ ଦିନ ପୂରା ହୋଇଛି । ମାସେ ପରେ ବିଜେପି ସରକାରକୁ ବର୍ଷେ ପୂରିବ । ଏହି ଶାସନ ଅବଧିରେ ଲୋକଙ୍କ ପାଇଁ ନୂଆ ସରକାର କଣ କରିଛନ୍ତି, କଣ କରିବେ ତାହାର ହିସାବ ନିକାଶ ନିଜେ ଦେବେ ମୁଖ୍ୟମନ୍ତ୍ରୀ ମୋହନ ମାଝୀ । ଏଥିପାଇଁ ଉଭୟ ସରକାରୀ ଓ ଦଳୀୟ ସ୍ତରରେ ଚାଲିଛି ଜୋରଦାର ପ୍ରସ୍ତୁତି ।

Advertisment
  • ହାତରେ ଆଉ ମାସେ
  • ନୂଆ ସରକାରକୁ ପୂରିବ ବର୍ଷେ
  • ଲୋକ ଜାଣିବେ ଲୋକଙ୍କ ସରକାରର ସଫଳତା

କାଉଣ୍ଟଡାଉନ ଆରମ୍ଭ, ମାସେ ପରେ ମୋହନ ସରକାରକୁ ପୂରିବ ବର୍ଷେ । ୧୧ ମାସର ନୂଆ ସରକାରରେ ଅନେକ କିଛି ନୂଆ ଅନୁଭୂତି ସାଉଁଟିଛି ଓଡ଼ିଶା । ନିର୍ବାଚନରେ ଦେଇଥିବା ପ୍ରତିଶ୍ରୁତିରୁ କିଛି ପୂରା କରିବାରେ ସକ୍ଷମ ହୋଇଛନ୍ତି ମୋହନ । ସୁଭଦ୍ରା ଯୋଜନା, ଚାଷୀଙ୍କୁ ୮୦୦ ଟଙ୍କାର ଇନପୁଟ୍ ସହାୟତା, ଶ୍ରୀମନ୍ଦିର ଚାରିଦ୍ବାର ଖୋଲିବା, ରତ୍ନଭଣ୍ଡାର ଖୋଲିବା, ଆୟୁଷ୍ମାନ ଯୋଜନା ଲାଗୁ ଭଳି ପ୍ରତିଶ୍ରୁତି ପୂରା କରି ଲୋକଙ୍କ ଭରସା ଜିଣିଛନ୍ତି । ଏସବୁ ଉପଲବ୍ଧିକୁ ଏବେ ଲୋକଙ୍କ ପାଖରେ ପହଞ୍ଚାଇବାକୁ ସରକାରୀସ୍ତରରେ ଆରମ୍ଭ ହୋଇଛି ପ୍ରସ୍ତୁତି । ଉଭୟ ଅଧିକାରୀ ଓ ମନ୍ତ୍ରୀଙ୍କୁ ବିଭାଗୱାରି ସଫଳତାର ରିପୋର୍ଟକାର୍ଡ ପ୍ରସ୍ତୁତ କରିବାକୁ ଦିଆଯାଇଛି ଟାସ୍କ । ସମାବେଶ ଜରିଆରେ ଏ ସବୁକୁ ସାଧାରଣ ଲୋକଙ୍କ ପାଖରେ ପହଞ୍ଚାଇବାକୁ ଲକ୍ଷ୍ୟ ରଖିଛନ୍ତି ସରକାର । 

କେବଳ ସରକାରୀ ସ୍ତରରେ ନୁହେଁ ମୋହନ ସରକାରର ବର୍ଷ ପୂର୍ତ୍ତିକୁ ଜୋରସୋରରେ ପାଳନ କରିବାକୁ ଅଣ୍ଟା ଭିଡ଼ିଛନ୍ତି ମନମୋହନ । ନୂଆ ସରକାର ଚାଷୀଙ୍କ ଦାବିକୁ ଅଧିକ ଗୁରୁତ୍ବ ଦେଇଥିବାରୁ ମନମୋହନ ସାମଲଙ୍କ ନେତୃତ୍ବରେ ବିଜେପି କୃଷକ ମୋର୍ଚ୍ଚା ମଙ୍ଗଳବାର ଠାରୁ ଧନ୍ୟବାଦ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କାର୍ଯ୍ୟକ୍ରମ ଆରମ୍ଭ କରିବ । ରାଜ୍ୟର ୧୦ଟି ସ୍ଥାନରେ ଏହି କାର୍ଯ୍ୟକ୍ରମ ହେବ । ଚାନ୍ଦବାଲିରୁ ଆରମ୍ଭ ହୋଇ ସରିବ ଢେଙ୍କାନାଳରେ । ଏଠାରେ ମୁଖ୍ୟମନ୍ତ୍ରୀ ଯୋଗ ଦେଇ ନିଜେ ବଖାଣିବେ ସରକାରଙ୍କ ସଫଳତା । ହେଲେ ମୋହନ ଓ ମନମୋହନଙ୍କ ପ୍ରସ୍ତୁତିକୁ କଟାକ୍ଷ କରିଛନ୍ତି ବିରୋଧୀ । 

ସୂଚନାଯୋଗ୍ୟ ଯେ, ୧୧ ମାସରେ ସରକାର ଅନେକ ନୂଆ ନୂଆ ଯୋଜନାର ସଫଳ ରୂପାୟନ କରିଛନ୍ତି । କିନ୍ତୁ ଅନେକ ପ୍ରତିଶ୍ରୁତି ଏବେ ବି ପୂରା ହୋଇନି । ଚିଟଫଣ୍ଡ ଟଙ୍କା ଫେରସ୍ତ, ଦୁର୍ନୀତିଗ୍ରସ୍ତଙ୍କୁ ଦଣ୍ଡ ଆଦି ଏହାର ଗୋଟିଏ ଗୋଟିଏ ଉଦାହରଣ ।