କନକ ବ୍ୟୁରୋ: ପ୍ରମିଳା ପ୍ରଧାନଙ୍କୁ ପ୍ରଧାନମନ୍ତ୍ରୀଙ୍କ ଭୁରି ଭୁରି ପ୍ରଶଂସା । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ରେଡିଓରେ ତାଙ୍କ ମନ୍‌ କି ବାତ୍‌ କାର୍ଯ୍ୟକ୍ରମର ୧୨୪ତମ ସଂସ୍କରଣରେ ପ୍ରମିଳାଙ୍କ ସଂକୀର୍ତ୍ତନ ମଣ୍ଡଳୀର କଥା ଉଠାଇଛନ୍ତି । ପ୍ରମିଳାଙ୍କ ନେତୃତ୍ୱରେ ପରିବେଶ ସଚେତନତାର ବାର୍ତ୍ତା ବାଣ୍ଟୁଛି 'ରାଧା କୃଷ୍ଣ ସଂକୀର୍ତ୍ତନ ମଣ୍ଡଳୀ' । ପରିବେଶ ସୁରକ୍ଷାକୁ ପ୍ରୋତ୍ସାହିତ କରୁଥିବା ମନ୍ତ୍ର ଜପ କରୁଛନ୍ତି ଏହି ଗୋଷ୍ଠୀ । ଲୋକଙ୍କୁ ଜଙ୍ଗଲରେ ନିଆଁ ନ ଲଗାଇବା ପାଇଁ କରୁଛନ୍ତି ସତର୍କ । ନିଆଁ ଲିଭାଇବା ଓ ଜଙ୍ଗଲ ବିଭାଗକୁ ସହଯୋଗ କରିବାକୁ ବୁଝାଉଛନ୍ତି । ଦମକଳ ବାହିନୀକୁ କିଭଳି ଖବର ଦେବେ ସେନେଇ ଗ୍ରାମବାସୀଙ୍କୁ କରୁଛନ୍ତି ଶିକ୍ଷିତ । ପ୍ରମିଳା ଓ ତାଙ୍କ ଗୋଷ୍ଠୀର ଏହି ଉଦ୍ୟମ ସମାଜକୁ ନୂଆ ଦିଗ ଦେବ ବୋଲି ପ୍ରଧାନମନ୍ତ୍ରୀ କହିଛନ୍ତି । 

Advertisment

ଏହାସହ ଭୋକାଲ୍ ଫର୍ ଲୋକାଲକୁ ଗୁରୁତ୍ୱ ଦେଇ ଆସୁଥିବା ପ୍ରଧାନମନ୍ତ୍ରୀ, ଆଜି ମୟୂରଭଞ୍ଜର ସାନ୍ତାଳୀ ଶାଢ଼ି ପ୍ରସଙ୍ଗ ଉଠାଇଛନ୍ତି । ଆଜି ବୟନଶିଳ୍ପ ଦେଶର ଶକ୍ତି ପାଲଟିଛି । ପ୍ରତିବର୍ଷ ଅଗଷ୍ଟ ୭ ତାରିଖରେ ଜାତୀୟ ହସ୍ତତନ୍ତ ଦିବସ ପାଳନ କରାଯାଉଛି । ତେଣୁ ମୟୂରଭଞ୍ଜ ଜିଲ୍ଲାର ଆଦିବାସୀ ମହିଳାମାନେ କିଭଳି ସାନ୍ତାଳୀ ଶାଢ଼ିକୁ ନୂତନ ଜୀବନ ଦେଇଛନ୍ତି, ସେହି କଥା ଉଠାଇ କରିଛନ୍ତି ପ୍ରଶଂସା । ବୟନ ଶିଳ୍ପ ଆମ ସାଂସ୍କୃତିକ ଐତିହ୍ୟ । ୬୫୦ଜଣ ଆଦିବାସୀ ମହିଳା ଏହି ଶାଢ଼ି ବୁଣି ଭଲ ରୋଜଗାର କରୁଛନ୍ତି । ଏବେ ଦେଶରେ ୩୦୦୦ରୁ ଅଧିକ ଷ୍ଟାର୍ଟଅପ୍‌ ଏ କ୍ଷେତ୍ରରେ କାମ କରୁଛନ୍ତି । ତେଣୁ ପ୍ରଧାନମନ୍ତ୍ରୀ କହିଛନ୍ତି ୨୦୪୭ ସୁଦ୍ଧା ବିକଶିତ ଭାରତର ସ୍ୱପ୍ନ, ଆତ୍ମନିର୍ଭରତା ସହ ଜଡ଼ିତ । 

ତେବେ ମୁଖ୍ୟମନ୍ତ୍ରୀ ମୋହନ ମାଝୀ ଆଜି ଭୁବନେଶ୍ୱର ସ୍ଥିତ ବନବାସୀ ଆଶ୍ରମ ପିଲାଙ୍କ ଗହଣରେ ଶୁଣିଛନ୍ତି ପ୍ରଧାନମନ୍ତ୍ରୀଙ୍କ ମନ କି ବାତ କାର୍ଯ୍ୟକ୍ରମ । ପିଲାଙ୍କୁ ପାଠ ପଢ଼ି ବଡ଼ ମଣିଷ ହେବାକୁ ଉପଦେଶ ଦେଇଛନ୍ତି । ପ୍ରଧାନମନ୍ତ୍ରୀ ବାରମ୍ୱାର ଲୋକଙ୍କ ସଂଘର୍ଷ, ସଫଳତା ଓ ନବସୃଜନ ଉପରେ ତାଙ୍କ ରେଡିଓ କାର୍ଯ୍ୟକ୍ରମରେ ଗୁରୁତ୍ୱ ଦେଇଆସୁଥିବା କହିଛନ୍ତି ମୁଖ୍ୟମନ୍ତ୍ରୀ ।