ବାଇଡେନ୍ ଦମ୍ପତିଙ୍କୁ ପ୍ରଧାନମନ୍ତ୍ରୀ ମୋଦିଙ୍କ ଉପହାର । ରୁପା ଖଚିତ ଟ୍ରେନ୍ ମଡେଲ ସହ କାଶ୍ମୀର ଶାଲ୍ ଭେଟି

କନକ ବ୍ୟୁରୋ : ଆମେରିକା ଗସ୍ତରେ ଯାଇ ପ୍ରଧାନମନ୍ତ୍ରୀ ମୋଦି ବାଇଡେନ ଦମ୍ପତିଙ୍କୁ ଦାମୀ ଉପହାର ପ୍ରଦାନ କରିଛନ୍ତି । ମୋଦି ଆମେରିକା ରାଷ୍ଟ୍ରପତି ଜୋ ବାଇଡେନ ଏବଂ ତାଙ୍କ ସ୍ତ୍ରୀ ଜିଲ୍‌ ବାଇଡେନଙ୍କୁ ଉପହାର ଦେଇଛନ୍ତି । ବାଇଡେନଙ୍କୁ ରୁପା ଖଚିତ ଏକ ଟ୍ରେନ୍‌ ମଡେଲ ଉପହାର ଦେଇଥିବା ବେଳେ ଜିଲ୍‌ଙ୍କୁ କଶ୍ମୀର ଶଲ୍‌ ଉପହାର ଦେଇଛନ୍ତି । 

ମୋଦିଙ୍କଠାରୁ ଏହି ଉପହାର ପାଇ ବାଇଡେନ ଦମ୍ପତି ବେଶ୍‌ ଖୁସି ଥିବା ଜଣାପଡ଼ିଛନ୍ତି । ବାଇଡେନଙ୍କୁ ମୋଦି ଦେଇଥିବା ରୁପା ଖଚିତ ଟ୍ରେନ୍‌ ମଡେଲ ଉପହାରକୁ ମହାରାଷ୍ଟ୍ରର କାରିଗରମାନେ ପ୍ରସ୍ତୁତ କରିଛନ୍ତି । ଏହା ହାତରେ ଖୋଦିତ ହୋଇଛି । ୯୨.୫ ପ୍ରତିଶତ ରୁପାରେ ନିର୍ମିତ ଏହି ମଡେଲ ଭାରତୀୟ ଧାତବ କଳାର ଶିଖରକୁ ପ୍ରତିପାଦିତ କରେ । ଏହି ମଡେଲରେ ‘ଦିଲ୍ଲୀ – ଡେଲାଓ୍ବେର୍‌’ ଲେଖା ଯାଇଛି ।