କନକ ବ୍ୟୁରୋ : ଶେଷ ପର୍ଯ୍ୟାୟରେ ଆଇପିଏଲ ୨୦୨୫ । କିଏ ପିନ୍ଧିବ ଏଥର ବିଜୟ ମୁକୁଟ, ଏ ନେଇ ବଢୁଛି ଉତ୍କଣ୍ଠା । ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଫାଇନାଲରେ ପହଞ୍ଚିସାରିଥିବା ବେଳେ, ମୁମ୍ୱାଇ-ପଞ୍ଜାବ ମଧ୍ୟରୁ କିଏ ଫାଇନାଲ ଟିକେଟ୍‌ ପାଇବ, ତାଉପରେ ରହିଛି ସମସ୍ତଙ୍କ ନଜର । ଏଥର ଆଇପିଏଲରେ ଅନେକ ନୂଆ ପ୍ରତିଭା ନିଜ ପ୍ରଦର୍ଶନ ଜରିଆରେ ଚର୍ଚ୍ଚାକୁ ଆସିଛନ୍ତି । ଆଉ ଏହି ତାଲିକାର ଟପ୍‌ରେ କିଏ ବୋଲି ଯଦି ପ୍ରଶ୍ନ କରାଯାଏ ତେବେ ଉତ୍ତରରେ ଯୁବତାରକା ବୈଭବ ସୂର୍ଯ୍ୟବଂଶୀଙ୍କ ନାଁ ହିଁ ଆସିବ । 

Advertisment

ମାତ୍ର ୧୪ ବର୍ଷ ବୟସରେ ସର୍ବକନିଷ୍ଠ ଖେଳାଳି ଭାବେ ଆଇପିଏଲରେ ପଦାର୍ପଣ କରିବା ଓ ମାତ୍ର ୩୫ଟି ବଲରୁ ଦ୍ରୁତ ଶତକ ହାସଲ କରି ସମସ୍ତଙ୍କ ମନ ଜିଣିନେଇଥିଲେ ବୈଭବ । ଛକା ଚୌକାର ବର୍ଷା କରି ବୋଲରଙ୍କ ହୋସ୍ ଉଡାଇଦେଇଥିଲେ ଏହି ୟଙ୍ଗ ଷ୍ଟାର୍ । ଆଇପିଏଲର ଏହି ବିସ୍ମୟ ବାଳକ ବୈଭବ ସୂର୍ଯ୍ୟବଂଶୀଙ୍କ ପାଇଁ ଶୁକ୍ରବାର ଆଉ ଏକ ସ୍ମରଣୀୟ ଦିନ ହୋଇଛି । ପାଟନା ବିମାନବନ୍ଦରରେ ବୈଭବ ଏବଂ ତାଙ୍କ ପରିବାରଲୋକଙ୍କୁ ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । 

ସୋସିଆଲ ମିଡିଆ ଏକ୍ସରେ ଫଟୋ ପୋଷ୍ଟ କରି ବୈଭବଙ୍କ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ମୋଦୀ ଲେଖିଛନ୍ତି, "ପାଟନା ବିମାନବନ୍ଦରରେ ଯୁବ କ୍ରିକେଟର ବୈଭବ ସୂର୍ଯ୍ୟବଂଶୀ ଓ ତାଙ୍କ ପରିବାରକୁ ଭେଟିଲି । ତାଙ୍କ କ୍ରିକେଟିଂ କ୍ଷମତା ଦେଶବ୍ୟାପୀ ଚର୍ଚ୍ଚାରେ ରହିଛି । ବୈଭବଙ୍କ ଉଜ୍ଜ୍ବଳ ଭବିଷ୍ୟତ ପାଇଁ ଶୁଭେଚ୍ଛା ଜଣାଇଛନ୍ତି ପ୍ରଧାନମନ୍ତ୍ରୀ ।" ପ୍ରଧାନମନ୍ତ୍ରୀଙ୍କ ପାଦ ଛୁଇଁ ଆଶୀର୍ବାଦ ନେଇଛନ୍ତି ବୈଭବ ସୂର୍ଯ୍ୟବଂଶୀ । ମୋଦୀଙ୍କ ସହ କରମର୍ଦ୍ଦନ କରିବାର ଫଟୋ ବି ଭାଇରାଲ ହୋଇଛି । 

ନିଲାମୀ ପ୍ରକ୍ରିୟାରେ ବୈଭବ ସୂର୍ଯ୍ୟବଂଶୀଙ୍କୁ ୧କୋଟି ୧୦ଲକ୍ଷ ଟଙ୍କାରେ କିଣି ନିଜ ଦଳରେ ସାମିଲ କରିଥିଲା ରାଜସ୍ଥାନ ରୟାଲ୍ସ । ପ୍ରଥମରୁ ୭ଟି ମ୍ୟାଚରେ ଖେଳିବାକୁ ସୁଯୋଗ ପାଇନଥିଲେ ବୈଭବ । ଆଉ ମୈଦାନକୁ ଓହ୍ଲାଇବା ପରେ ପ୍ରଥମ ବଲ୍‌ରେ ଛକା ମାରି ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲେ ଏହି ଯୁବ କ୍ରିକେଟର । ଚଳିତ ସିଜିନରେ ୭ଟି ମ୍ୟାଚ୍ ଖେଳି ୨୫୨ ରନ୍ କରିଛନ୍ତି ବୈଭବ ସୂର୍ଯ୍ୟବଂଶୀ । ଯେଉଁଥିରେ ଗୋଟିଏ ଦମଦାର ଶତକ ବି ସାମିଲ ଅଛି । ଜୟପୁରରେ ଗୁଜରାଟ ଟାଇଟନ୍ସ ବିପକ୍ଷରେ ଏହି ଶତକୀୟ ଇନିଂସ ଖେଳିଥିଲେ ବୈଭବ ।