ଦିଲ୍ଳୀରେ କେନ୍ଦ୍ରକୁ ଘେରୁଛନ୍ତି ଚାଷୀ । କ୍ଷତରେ ମଲମ ଲଗାଇଲେ ମୋଦୀ । ବଢ଼ିଲା ପ୍ରଧାନମନ୍ତ୍ରୀ ଫସଲବୀମା ଆକାର

କନକ ବ୍ୟୁରୋ : ରାଜ୍ୟରେ ଅଦିନିଆ ବର୍ଷା ଯେତେବେଳେ ଚଷୀଙ୍କ ଅଣ୍ଟା ଭାଙ୍ଗି ଦେଇଛି, ଠିକ ଏତିକିବେଳେ ମୋଦୀ ସରକାରଙ୍କ ବଡ଼ ଘୋଷଣା କ୍ଷତରେ ମଲମ ଭଳି କାମ ଦେଇଛି ।  ପ୍ରଧାନମନ୍ତ୍ରୀ ଫସଲ ବୀମା ଯୋଜନାର ଆକାରକୁ ବୃଦ୍ଧି କରିଛନ୍ତି କେନ୍ଦ୍ର ସରକାର । ଏଥିପାଇଁ ୨୦୨୧-୨୨ ଆର୍ଥିକ ବର୍ଷରୁ ୨୦୨୫-୨୬ ଆର୍ଥିକ ବର୍ଷଯାଏଁ ବଜେଟ୍‌ ପରିମାଣ ବଢି ୬୯ ହଜାର ୫୧୫ କୋଟି ୭୧ ଲକ୍ଷ ହୋଇଛି । କେନ୍ଦ୍ର କ୍ୟାବିନେଟ ଆଜି ଏ ସଂପର୍କିତ ପ୍ରସ୍ତାବକୁ ଅନୁମୋଦନ ଦେବା ପରେ ଦେଶର କୋଟିକୋଟି ଚାଷୀ ଉପକୃତ ହେବେ ବୋଲି ଆଶା କରାଯାଉଛି ।  

ସେହିପରି ନୂଆବର୍ଷର ପ୍ରଥମ କ୍ୟାବିନେଟରେ ଚାଷୀଙ୍କ ଖୁସି କଲାଭଳି ଆଉଏକ ବଡ଼ ନିଷ୍ପତ୍ତି ହୋଇଛି । ଡିଏପି ସାର ଉପରେ ଅତିରିକ୍ତ ସବସିଡିକୁ ଆଜି ଅନୁମୋଦନ କରିଛି କେନ୍ଦ୍ର କ୍ୟାବିନେଟ୍‌ । ଫଳରେ ଡିଏପି ଉପରେ ମେଟ୍ରିକ ଟନ୍‌ ପିଛା ୩ ହଜାର ୫୦୦ ଟଙ୍କାର ସବସିଡି ଯୋଗାଇ ଦିଆଯିବ । ୧ ଜାନୁଆରୀ ୨୦୨୫ରୁ ଏହା ଅନ୍ୟାଦେଶ ପର୍ଯ୍ୟନ୍ତ ବଳବତ୍ତର ରହିବ । କେନ୍ଦ୍ର କ୍ୟାବିନେଟରେ ଏହି ପ୍ରସ୍ତାବକୁ ଅନୁମୋଦନ ପରେ ଚାଷୀମାନଙ୍କୁ ନିରନ୍ତର ଭାବେ ଡିଏପି ସାର ଉପଲବ୍ଧ ହୋଇପାରିବ । ଏଥିପାଇଁ ପାଖାପାଖି ୩ ହଜାର ୮୫୦ କୋଟି ଟଙ୍କା ବ୍ୟୟବରାଦ କରିବେ ମୋଦୀ ସରକାର । ନୂଆବର୍ଷର ପ୍ରଥମ କ୍ୟାବିନେଟ ବୈଠକରେ ଚାଷୀଙ୍କ ପାଇଁ ନିଆଯାଇଥିବା ନିଷ୍ପତ୍ତି ସଂପର୍କରେ ସୋସିଆଲ ମିଡିଆ ଏକ୍ସରେ ସୂଚନା ଦେଇଛନ୍ତି ପ୍ରଧାନମନ୍ତ୍ରୀ ମୋଦୀ । ଚାଷୀକୂଳର ଉନ୍ନତି ପାଇଁ କେନ୍ଦ୍ର ସରକାର ପ୍ରତିଶ୍ରୁତିବଦ୍ଧ ବୋଲି ମୋଦୀ ତାଙ୍କ ପୋଷ୍ଟରେ ଉଲ୍ଲେଖ କରିଛନ୍ତି ।