ଗୋମାଂସ ଚାଲାଣକୁ ନେଇ ଗଣ୍ଡଗୋଳ; ପିକଅପ ଭ୍ୟାନ ଜାଳିଦେଲେ ଉତ୍ତ୍ୟକ୍ତ ଲୋକେ

କନକ ବ୍ୟୁରୋ : ପୁରୀ ଗୋପ ଥାନା ବୋଇତ ଭଙ୍ଗା ସେତୁ ନିକଟରେ ପିକଅପ ଭ୍ୟାନ ଜାଳିଦେଲେ ଲୋକେ । ଗୋମାଂସ ଚାଲାଣକୁ ବିରୋଧ କରି ଅଞ୍ଚଳରେ ଦେଖାଦେଇଛି ଉତ୍ତେଜନା । ଆଜି ସକାଳେ ଗୋମାଂସ ନେଇ ଯାଉଥିବା ଏକ ପିକଅପ ଭ୍ୟାନ ଦୁର୍ଘଟଣାଗ୍ରସ୍ତ ହେବା ପରେ ସାମ୍ନାକୁ ଆସିଥିଲା ଘଟଣା । ଦୁର୍ଘଟଣା ପରେ ଗୋମାଂସ ଚାଲାଣକାରୀ ସହ ଗାଡ଼ିର ଡ୍ରାଇଭର ଫେରାର ହୋଇଯାଇଛନ୍ତି।

ତେବେ ରାସ୍ତାରେ ମାଂସ ପଡ଼ିଥିବା ଦେଖିବା ପରେ ଲୋକେ ଉତ୍ତ୍ୟକ୍ତ ହୋଇ ଗାଡ଼ିକୁ ଜାଳିଦେଇଛନ୍ତି । ପୂର୍ବରୁ ଏହି ଅଞ୍ଚଳରେ ଗୋମାଂସ ଚାଲାଣ ନେଇ ଅନେକ ଥର ଅଭିଯୋଗ କରାଯାଇଛି । କିନ୍ତୁ ପୁଲିସ କାର୍ଯ୍ୟାନୁଷ୍ଠାନ ନେଉ ନଥିବାରୁ ଲୋକଙ୍କ ମଧ୍ୟରେ ଆକ୍ରୋସ ବଢ଼ିଛି । ଗୋପ ଅଞ୍ଚଳରୁ ଜିଲ୍ଲା ତଥା ରାଜ୍ୟ ବାହାରକୁ ଗୋମାଂସ ଚାଲାଣ ହେଉଥିବା ଜଣାପଡ଼ିଛି । ପୁଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ନିୟନ୍ତ୍ରଣ କରିବା ସହ ଲୋକଙ୍କୁ ବୁଝାସୁଝା କରୁଛି ।