ମହଙ୍ଗା ପଡ଼ିଲା ‘ମୋ ଘର’ ଋଣ; କେମିତି ଶୁଝିବେ ରୁଣ ଚିନ୍ତାରେ ହିତାଧିକାରୀ

କନକ ବ୍ୟୁରୋ : ମୋ ଘର ଯୋଜନା କରି ବ୍ୟାଙ୍କ ଜରିଆର ଲୋକଙ୍କୁ ଟଙ୍କା ଦେଇଥିଲେ ପୂର୍ବ ସରକାର । କିନ୍ତୁ ଏହି ଯୋଜନା ଏବେ ମୋ ଘର ହିତାଧିକାରୀଙ୍କ ପାଇଁ ପାଲଟିଛି ଦୁର୍ବିସହ । ଟଙ୍କା ଶୁଝିବା ପାଇଁ ଘରେ ଆସି ଜୁଲମ କରୁଛନ୍ତି ବ୍ୟାଙ୍କ କର୍ମଚାରୀ ।

ରମେଶ ଥାଟୋଇ.. ଘର କେନ୍ଦ୍ରାପଡ଼ା ବ୍ଲକ କପାଳେଶ୍ୱର ପଞ୍ଚାୟତାର ହଳଦିଡିହ ଗାଁ । ମୋ ଘର ଯୋଜନାରେ ଟଙ୍କା ନେଇ ଘର କରିଛନ୍ତି । କିନ୍ତୁ ସବସିଡି ମିଳୁନି । ସେହି ଗାଁର ରମାକାନ୍ତ ନାୟକ । ଦୁଇଟି କିସ୍ତି ପାଇଛନ୍ତି । ଛାତ ପକାଇବାକୁ, ତୃତୀୟ କିସ୍ତି ଆଣିବାକୁ ଯିବାରୁ ପୋର୍ଟାଲ ବନ୍ଦ । ଘର ଅଧାପନ୍ତରିଆ । କିନ୍ତୁ ଋଣର ସୁଧ ସୁଝିବାକୁ ଏବେ ବ୍ୟାଙ୍କ କର୍ତ୍ତୁପକ୍ଷ ବ୍ୟସ୍ତ କରୁଛନ୍ତି ।

ଋଣ ନେବା ବେଳେ ପ୍ରଥମ ବର୍ଷ କୌଣସି ସୁଧ ଦେବାକୁ ପଡିବ ନାହିଁ ବୋଲି କୁହାଯାଇଥିଲା । କିନ୍ତୁ ସରକାର ବଦଳିଲା ପରେ ସ୍ଥିତି ବଦଳିଯାଇଛି । ଏହି ପୋର୍ଟାଲ ଆଉ ଖୋଲୁନି । ଅନ୍ୟପଟେ ଋଣ ନେବା ଦିନଠାରୁ ସୁଧ ହିସାବ କରୁଛନ୍ତି ବ୍ୟାଙ୍କ କର୍ତ୍ତୁପକ୍ଷ । ଯାହାକୁ ନେଇ ଚିନ୍ତାରେ ପଡ଼ିଛନ୍ତି ହିତାଧିକାରୀ । ତେବେ ଜିଲ୍ଲା ପାଳ କହିଛନ୍ତି ତଦନ୍ତ ହେବ । ଏପଟେ ପଞ୍ଚାୟତିରାଜ ମନ୍ତ୍ରୀ ପୂର୍ବ ସରକାର ସମୟର ତ୍ରୁଟିପୂର୍ଣ୍ଣ ନିଷ୍ପତ୍ତିକୁ ଦୋଷ ଦେଇଛନ୍ତି ।

ମୋ ଘର, ଏଭଳି ଏକ ସ୍କିମ ଯାହାକୁ ପୂର୍ବ ସରକାର ୨୦୨୪ ନିର୍ବାଚନ ପୂର୍ବରୁ ଆଣିଥିଲେ । ଏହି ଯୋଜନାରେ ଲୋକଙ୍କୁ ଏକ ଲକ୍ଷରୁ ତିନି ଲକ୍ଷ ପର୍ଯ୍ୟନ୍ତ ଋଣ ମିଳିବ ବୋଲି କୁହାଯାଇଥିଲା । ସରକାର ଯେଉଁମାନଙ୍କୁ ଚୟନ କରିଥିଲେ ବ୍ୟାଙ୍କରୁ ସେମାନଙ୍କୁ ଋଣ ମିଳିଥିଲା । କାର୍ଯ୍ୟ ଶେଷ ହେଲେ ତିନି ବର୍ଷରେ ସବସିଡି ଦେବେ ବୋଲି ଘୋଷଣା କରିଥିଲେ । କିନ୍ତୁ ସେହି ଋଣ ଏବେ ହିତାଧିକାରୀଙ୍କ ପାଇଁ ବୋଝ ପାଲଟିଛି ।