କନକ ବ୍ୟୁରୋ : ରାଜ୍ୟର ପୁରାତନ ତଥା ଦକ୍ଷିଣ ଓଡ଼ିଶାର ବଡ଼ ଡାକ୍ତରଖାନା ଏମ୍‌କେସିଜି । ପଡ଼ୋଶୀ ଜିଲ୍ଲା ଓ ରାଜ୍ୟବାସୀଙ୍କ ନିରନ୍ତର ରୋଗୀ ସେବା ଯୋଗାଇ ଆସୁଥିବା ଏହି ଡାକ୍ତରଖାନା ଏବେ ରୁଗ୍‌ଣ ଅବସ୍ଥାରେ । ରୋଗୀ ଓ ସମ୍ପର୍କୀୟଙ୍କୁ ନାହିନଥିବା ଅସୁବିଧାର ସମ୍ମୁଖୀନ ହେବାକୁ ପଡୁଥିବା ଅଭିଯୋଗ ହୋଇଛି । ଯାହାର ଚିତ୍ର କଏଦ ହୋଇଛି ଆମ କ୍ୟାମେରାରେ ।

Advertisment

କେଉଁଠି ଶିଶୁ ରୋଗ ବିଭାଗରୁ ଟିକା ଦେବା ପାଇଁ ଅସୁସ୍ଥ ଶିଶୁକୁ ନିଆଯାଉଛି । ଶରୀରରେ ଅକ୍ସିଜେନ ଓ ସିଲିଣ୍ଡର୍ ଲଗାଯାଇ ଚଲାଇ ଚଲାଇ ନେଉଛନ୍ତି ପରିବାର ଲୋକେ । ବିଡ଼ମ୍ବନାର କଥା ହେଉଛି ଶିଶୁଟି ଯେଉଁଭଳି ଅବସ୍ଥାରେ ଯାଉଛନ୍ତି ତାହା ମେଡିକାଲର ଅବ୍ୟବସ୍ଥାକୁ ପଦାରେ ପକାଇ ଦେଇଛି ।

ଆଉ କେଉଁଠି ମେଡିକାଲ ପରିସରର ଅସ୍ୱାସ୍ଥ୍ୟକର ପରିବେଶରେ ଅସ୍ଥାୟୀ ଭାବେ ଖାଦ୍ୟ ପରଷୁଥିବା ହୋଟେଲ ଗୁଡ଼ିକ ପାଇଁ ନାବାଳକ କିଭଳି ପରିସ୍ଥିତିରେ ପିଇବା ପାଣି ଯୋଗାଉଛନ୍ତି । ଯଦି ଏହି ପାଣି ରୋଗୀ ପିଇବେ ତାହେଲେ ସ୍ଥିତି କ’ଣ ହେବ, ତାହା ଆପଣ ଅନୁମାନ କରିପାରୁଥିବେ ।

ଆଉ ଗୋଟିଏ ସମସ୍ୟା କହିଲେ ବହୁତଳ କୋଠା ବିଶିଷ୍ଟ ବିଭିନ୍ନ ବିଭାଗରେ ଥିବା ଅର୍ଦ୍ଧାଧିକ ଲିଫ୍ଟ ଅଚଳଥିବାରୁ ରୋଗୀ ଓ ସମ୍ପର୍କୀୟ ହନ୍ତସନ୍ତ । ସେଥିରୁ ରୋଗୀଙ୍କ ପାଇଁ ଉଦ୍ଦିଷ୍ଟ ସଚଳ ଲିଫ୍ଟରେ ବୁହାଯାଉଛି ସାମଗ୍ରୀ । ଯେଉଁଥିପାଇଁ ରୋଗୀକୁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଥିବା ଦେଖିବାକୁ ମିଳିଛି ।

କେବଳ ସେତିକି ନୁହେଁ, କାଜୁଆଲଟିରୁ ଇଣ୍ଡୋର ନେବା ଲାଗି ଦାୟିତ୍ବରେ ଥିବା ଘରୋଇ ସଂସ୍ଥାର ଅଣଦେଖା ଲାଗି ରୋଗୀ ବୋହିବା ଗାଡ଼ି ଗୁଡ଼ିକ ରୋଗାକ୍ରାନ୍ତ ହୋଇପଡ଼ିଛି । ଫଳରେ ରୋଗୀଙ୍କୁ ପରିବାର ଓ ସମ୍ପର୍କୀୟମାନେ ବୋହି ନେଉଥିବା ଦେଖିବାକୁ ମିଳିଛି । ସହରରେ ଗଢ଼ି ଉଠିଥିବା ମାଳମାଳ ଘରୋଇ କ୍ଲିନିକ୍ ଗୁଡ଼ିକୁ ମାଲାମାଲ କରିବା ଚକ୍ରାନ୍ତରେ ଏମକେସିଜିର ଏଭଳି ସମସ୍ୟା ପ୍ରତି ଜାଣିଶୁଣି ଅବହେଳା କରାଯାଉଥିବା ଅଭିଯୋଗ ହୋଇଛି । ମେଡିକାଲ କର୍ତ୍ତୃପକ୍ଷ କହିଛନ୍ତି ସମସ୍ୟା ନଜରକୁ ଆସିଲେ ତୁରନ୍ତ ସମାଧାନ କରାଯିବ । କୋଟି କୋଟି ଟଙ୍କା ଖର୍ଚ୍ଚ ହେଉଛି ତଥାପି ରକ୍ଷଣାବେକ୍ଷଣ ଅଭାବରୁ ସ୍ବାସ୍ଥ୍ୟ ସେବା ଭଳି ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ସାଧାରଣ ଲୋକେ । କାହିଁକି ଏତେ ହତାଦର କେବେ ସମସ୍ୟା ମୁକ୍ତ ହେବ ଏମକେସିଜି, ତାହା ଏବେ ସାଧାରଣରେ ପ୍ରଶ୍ନ ସୃଷ୍ଟି କରୁଛି ।