ଏୟାରଲିଫ୍ଟ ଆଶା ମଉଳିଲା: ବାୟୁ ସ୍ୱାସ୍ଥ୍ୟସେବାରୁ ବଞ୍ଚିତ ଗୁରୁତର ରୋଗୀ

କନକ ବ୍ୟୁରୋ: ଦକ୍ଷିଣ ଓଡ଼ିଶାର ବଡ଼ ଡାକ୍ତରଖାନା ବ୍ରହ୍ମପୁର ଏମ୍‌କେସିଜି । ହେଲେ ଏଠୁ ଗୁରୁତର ରୋଗୀଙ୍କୁ କରାଯାଇପାରୁନି ଏୟାରଲିଫ୍ଟ । ହେଲିପ୍ୟାଡ୍‌ ନଥିବା କାରଣରୁ ଏ ସୁବିଧା ପାଉନାହାନ୍ତି ରୋଗୀ । ଜମି ଅଡ଼ୁଆ ତୁଟୁ ନଥିଲା ବେଳେ ମୁଖ୍ୟମନ୍ତ୍ରୀ ବାୟୁ ସ୍ୱାସ୍ଥ୍ୟସେବା ଯୋଜନା ବ୍ରହ୍ମପୁରରେ ଫେଲ୍‌ ମାରିଛି । 

କାମରେ ଲାଗୁନି ମୁଖ୍ୟମନ୍ତ୍ରୀ ବାୟୁ ସ୍ୱାସ୍ଥ୍ୟସେବା ଯୋଜନା । ଏୟାରଲିଫ୍ଟ ହୋଇପାରୁନାହାନ୍ତି ଗୁରୁତର ରୋଗୀ । ଦକ୍ଷିଣ ଓଡ଼ିଶାର ବଡ଼ ଡାକ୍ତରଖାନା ବ୍ରହ୍ମପୁର ଏମ୍‌କେସିଜିରୁ ଆସିଛି ଏଭଳି ସଙ୍ଗିନ ଅଭିଯୋଗ । ପ୍ରତିଦିନ ବିଭିନ୍ନ ଜିଲ୍ଲାରୁ ଏଠାକୁ ୫  ହଜାରରୁ ଅଧିକ ରୋଗୀ ଉନ୍ନତ ଚିକିତ୍ସା ସେବା ଲାଗି ଆସୁଛନ୍ତି । ହେଲେ ଅତି ସଂକଟାପନ୍ନ ରୋଗୀଙ୍କୁ ଅନ୍ୟ ସ୍ଥାନକୁ ଚିକିତ୍ସା ଲାଗି ପଠାଇବା ସମ୍ଭବ ହେଉନି । ଏଠାରୁ ଭୁବନେଶ୍ୱର କିମ୍ବା ବିଶାଖାପାଟଣା ପଠାଇବା ଲାଗି ଏୟାରଲିଫ୍ଟ ସୁବିଧା ନାହିଁ । ଫଳରେ ସଡ଼କପଥରେ ଆମ୍ବୁଲାନ୍ସରେ ଗଲା ବେଳେ ଅନେକ ରୋଗୀଙ୍କୁ ଆଖି ବୁଝିବାକୁ ପଡୁଛି ।

ଏମ୍‌କେସିଜିରେ ପହଞ୍ଚିବ ମୁଖ୍ୟମନ୍ତ୍ରୀ ବାୟୁ ସ୍ୱାସ୍ଥ୍ୟସେବା ଯୋଜନା। ସରକାର କିଣିବେ ନୂଆ ହେଲିକପ୍ଟର । ୨୦୨୪ ନିର୍ବାଚନ ପୂର୍ବରୁ ଏହା ଥିଲା ବିଜେଡି ସରକାରର ପ୍ରତିଶ୍ରୁତି । ୨୦୨୩ରେ ହେଲିକପ୍ଟର କିଣିବାକୁ ଟେଣ୍ଡର୍‌ ବି କରିଥିଲା ବାଣିଜ୍ୟ ଓ ପରିବହନ ବିଭାଗ। ହେଲେ ସରକାର ବଦଳିବା ପରେ ଏମ୍‌କେସିଜିରୁ ଏୟାରଲିଫ୍ଟ ଆଶା ମଉଳିଯାଇଛି। ଏମ୍‌କେସିଜି ପରିସରରେ ଥିବା ଖେଳ ପଡ଼ିଆରେ ହେଲିପ୍ୟାଡ୍‌ ହେବ ନା ଅସୁରକ୍ଷିତ କୋଠା ଭଙ୍ଗାଯାଇ ସେଠାରେ ହେଲିକପ୍ଟର ଓହ୍ଲାଇବ, ଅଡ଼ୁଆ ତୁଟୁନି। ଯାହାକୁ ନେଇ ଏହି ଯୋଜନା କାର୍ଯ୍ୟକାରୀ ହେବ କି ନାହିଁ ବୋଲି ଲୋକେ ସନ୍ଦେହରେ। ନିର୍ବାଚନ ପୂର୍ବରୁ ଅନେକ ଲଲିପପ୍‌ ଦେଖାନ୍ତି ସରକାର । ହେଲେ ନିର୍ବାଚନ ଫଳାଫଳ କେମିତି ଲୋକଙ୍କ ସ୍ବପ୍ନ ଭାଙ୍ଗିଦିଏ, ଏହା ତାର ସବୁଠୁ ବଡ଼ ଉଦାହରଣ ।…