କନକ ବ୍ୟୁରୋ : "ସ୍ୱପ୍ନ ତାହା ନୁହେଁ ଯାହା ତୁମେ ଶୋଇବା ବେଳେ ଦେଖ, ସ୍ୱପ୍ନ ତାହା ଯାହା ତୁମକୁ ଶୋଇବାକୁ ଦିଏ ନାହିଁ ।" ଏହି ନୀତିବାଣୀ ହେଉଛି ଭାରତରତ୍ନ ତଥା ମହାନ ବୈଜ୍ଞାନିକ ଡକ୍ଟର ଏ ପି ଜେ ଅବଦୁଲ କଲାମଙ୍କର । ତାଙ୍କ ସରଳତା, ସଚ୍ଚୋଟତା ଆଉ କିଛି ନୂଆ କରିବାର ଜୋସ୍‌ ହିଁ ତାଙ୍କୁ ସମସ୍ତଙ୍କର ପ୍ରିୟ ପାତ୍ର କରିଥିଲା । 

Advertisment

ଭାରତର ଯୁବପିଢ଼ିଙ୍କୁ ସଫଳତାର ମନ୍ତ୍ର ଦେଇଥିବା ଭାରତର ପୂର୍ବତନ ରାଷ୍ଟ୍ରପତି, ଭାରତରତ୍ନ ଡ. ଏ.ପି.ଜେ. ଅବଦୁଲ କଲାମଙ୍କ ଆଜି ହେଉଛି ପୁଣ୍ୟତିଥି । ଏହି ଅବସରରେ ସାରା ଦେଶ ନିଜର ଏହି ମହାନ ସୁପୁତ୍ରଙ୍କୁ ଗଭୀର ଶ୍ରଦ୍ଧାଞ୍ଜଳି ଅର୍ପଣ କରୁଛି । ସେ କେବଳ ଜଣେ ବୈଜ୍ଞାନିକ କିମ୍ବା ରାଷ୍ଟ୍ରପତି ନଥିଲେ, ବରଂ କୋଟି କୋଟି ଭାରତୀୟଙ୍କ ପାଇଁ ସେ ଥିଲେ ଏକ ଅସରନ୍ତି ପ୍ରେରଣାର ଉତ୍ସ । କାମ କରିବାର ଜୁନୁନ୍‌ ହିଁ ତାଙ୍କୁ ଖବର କାଗଜ ହକରରୁ ମିସାଇଲ ମ୍ୟାନ୍‌ ଆଉ ଦେଶର ରାଷ୍ଟ୍ରପତି କରିଥିଲା । ଖାଲି ଦେଶ ନୁହେଁ ସାରା ବିଶ୍ୱରେ ସେ ସମସ୍ତଙ୍କ ପାଇଁ ପ୍ରେରଣା । ସେ ଭାରତର ‘ ମିସାଇଲ ମ୍ୟାନ୍‌ ’...ଏ ପି ଜେ ଅବଦୁଲ କଲାମ । 
ତାମିଲନାଡୁ ରାମେଶ୍ୱରମର ଏକ ସାଧାରଣ ପରିବାରରେ ଜନ୍ମ ହୋଇ ରାଷ୍ଟ୍ରପତି ଭବନ ପର୍ଯ୍ୟନ୍ତ ତାଙ୍କର ଯାତ୍ରା ଅତ୍ୟନ୍ତ ସଂଘର୍ଷପୂର୍ଣ୍ଣ ଓ ପ୍ରେରଣାଦାୟୀ ଥିଲା । ଭାରତୀୟ ପ୍ରତିରକ୍ଷା ଅନୁସନ୍ଧାନ ଓ ବିକାଶ ସଂଗଠନ ଏବଂ ଭାରତୀୟ ମହାକାଶ ଗବେଷଣା ସଂସ୍ଥାନରେ ଜଣେ ବୈଜ୍ଞାନିକ ଭାବରେ ସେ ଦେଶର ସୁରକ୍ଷା ଓ ମହାକାଶ କାର୍ଯ୍ୟକ୍ରମକୁ ଏକ ନୂଆ ଦିଗ ଦେଇଥିଲେ । 'ଅଗ୍ନି' ଓ 'ପୃଥ୍ବୀ' ଭଳି ମିସାଇଲ୍ କାର୍ଯ୍ୟକ୍ରମରେ ତାଙ୍କର ନେତୃତ୍ୱ ପାଇଁ ତାଙ୍କୁ 'ମିସାଇଲ ମ୍ୟାନ୍'ର ଆଖ୍ୟା ଦିଆଯାଇଥିଲା ।

୨୦୦୨ରୁ ୨୦୦୭ ପର୍ଯ୍ୟନ୍ତ ଭାରତର ୧୧ତମ ରାଷ୍ଟ୍ରପତି ଭାବରେ ସେ ରାଷ୍ଟ୍ରପତି ଭବନକୁ 'ଲୋକଙ୍କ ଭବନ'ରେ ପରିଣତ କରିଥିଲେ । ତାଙ୍କର ସରଳତା, ନମ୍ରତା ଏବଂ ସାଧାରଣ ଲୋକଙ୍କ ସହ, ବିଶେଷକରି ପିଲାମାନଙ୍କ ସହ ମିଶିବାର ଆଗ୍ରହ ତାଙ୍କୁ 'ଜନତାର ରାଷ୍ଟ୍ରପତି' ଭାବେ ପରିଚିତ କରାଇଥିଲା । ସେ ସବୁବେଳେ କହୁଥିଲେ ଯେ ଦେଶର ଭବିଷ୍ୟତ ଯୁବପିଢ଼ିଙ୍କ ହାତରେ ହିଁ ସୁରକ୍ଷିତ ।

୨୦୧୫ ମସିହା, ଜୁଲାଇ ୨୭ ତାରିଖରେ ସେ ନିଜର ସବୁଠାରୁ ପ୍ରିୟ କାର୍ଯ୍ୟ, ଅର୍ଥାତ୍ ଶିକ୍ଷାଦାନ କରୁଥିବା ସମୟରେ ଆଇ.ଆଇ.ଏମ୍. ଶିଲଙ୍ଗ୍‌ ଠାରେ ଶେଷ ନିଶ୍ୱାସ ତ୍ୟାଗ କରିଥିଲେ । ଡ. କଲାମ ଆଜି ଆମ ଗହଣରେ ନାହାନ୍ତି, କିନ୍ତୁ ତାଙ୍କର ବିଚାରଧାରା, 'ଅଗ୍ନିର ଡେଣା' ଭଳି ପୁସ୍ତକ ଏବଂ ତାଙ୍କର ସ୍ୱପ୍ନ ଦେଖିବାର ସାହସ ସର୍ବଦା ଭାରତୀୟମାନଙ୍କୁ, ବିଶେଷ କରି ଯୁବପିଢ଼ିଙ୍କୁ ପଥ ଦେଖାଉଥିବ । ସେ ଆଜି ନ ଥାଇ ବି ଆମ ଭିତରେ ଅଛନ୍ତି , ସେ ଅମର..ସେ ଅବିସ୍ମରଣୀୟ..ସେ ଯୁଗେ ଯୁଗେ ପୂଜନୀୟ...।