ନାବାଳକ ପୁଅକୁ କଳକୀ ଅବତାର ଘଟଣା : ମାମଲା ରୁଜୁ କଲେ ଶିଶୁ ଅଧିକାର ସୁରକ୍ଷା ଆୟୋଗ

କନକବ୍ୟୁରୋ : ଶିଶୁ ଅଧିକାର ସୁରକ୍ଷା ଆୟୋଗରେ ପହଞ୍ଚିଲା କଳ୍‌କୀ ମାମଲା  । ଭୁବନେଶ୍ବର ବୈକୁଣ୍ଠ ଧାମ ଆଶ୍ରମରେ ଛୋଟ ଶିଶୁକୁ କଳ୍‌କୀ ଅବତାର କହି, ବାବା କରି ପୂଜା କରିବା ପ୍ରସଙ୍ଗରେ ନିଜ ଆଡୁ ମାମଲା ରୁଜୁ କରିଛି ଶିଶୁ ଅଧିକାର ସୁରକ୍ଷା ଆୟୋଗ  । ପୂରା ଘଟଣା ସମ୍ପର୍କରେ ଭରତପୁର ଥାନାକୁ ରିପୋର୍ଟ ତଲବ କରିଛି ଆୟୋଗ । ଆସନ୍ତା ୧୫ ଦିନ ମଧ୍ୟରେ ରିପୋର୍ଟ ଦାଖଲ ପାଇଁ ନିର୍ଦ୍ଦେଶ ଦିଆଯାଇଛି । ସେହିପରି ଘଟଣାର ତଦନ୍ତ କରିବା ପାଇଁ ସିଡବ୍ଲୁସିକୁ ମଧ୍ୟ ନିର୍ଦ୍ଦେଶ ଦିଆଯାଇଛି ।

ସେପଟେ କୁଆଡ଼େ ଗଲେ ଆତ୍ମଘୋଷିତ ବାବା, ଏବେ ତାକୁ ନେଇ ପ୍ରଶ୍ନ ଉଠିଛି । ନାବାଳକ ପୁଅକୁ ଭଗବାନ ବୋଲି ପ୍ରଦର୍ଶିତ କରାଉଥିଲେ ଆତ୍ମଘୋଷିତ ବାବା କାଶୀନାଥ ମିଶ୍ର। ପାଦ ତଳେ ତୁଳସୀ ଓ ଗୀତା ଭାଗବତ ରଖି ପୂଜା କରାଉଥିଲେ। ଏହାର ଫଟୋ ଭାଇରାଲ ହେବା ପରେ କାଶିନାଥ ବାବାଙ୍କର ଦେଖା ମିଳୁନି । ଭୁବନେଶ୍ଵରର ବିବାଦୀୟ ବୈକୁଣ୍ଠ ଧାମ ଆଶ୍ରମ ଭିତରେ ପଡିଛି ତାଲା ।

କାହାକୁ ଭିତରକୁ ଛାଡୁ ନାହାନ୍ତି ଆଶ୍ରମର ଅନ୍ତେବାସୀ । ପାର୍ସଲ ଆସିଲେ ବି ନେବାକୁ ଆସୁନାହାନ୍ତି ଅନ୍ତେବାସୀ । ଆଶ୍ରମକୁ ଆସୁଥିବା ଭକ୍ତଙ୍କ ପାଇଁ ଖଣ୍ଡଗିରି ବାରୀ ଗାଁ ରହିଛି ଭଡା ଘର  । କ୍ୟାମେରା ଦେଖି ଲୁଚିଛନ୍ତି ଅନ୍ତେବାସୀ । ଭୁବନେଶ୍ୱର ଭରତପୁର ଥାନା କୋଳଥିଆରେ ଥିବା ବୈକୁଣ୍ଠ ଧାମ ଆଶ୍ରମର ମୁଖ୍ୟ ପ୍ରବଚକ କାଶୀନାଥ ମିଶ୍ର, ଧର୍ମ ନାମରେ ବ୍ୟବସାୟ କରୁଥିବା ଅଭିଯୋଗ କରିଛି ରାଜ୍ୟ ସମାଜସେବୀ ମହାସଂଘ ।