କନକ ବ୍ୟୁରୋ: ଅଷ୍ଟ୍ରେଲିଆର ପୂର୍ବତନ କ୍ରିକେଟର୍‌ ତଥା ଅଧିନାୟକ ମାଇକେଲ୍ କ୍ଲାର୍କ ପୁଣି ଥରେ ଚର୍ମ କର୍କଟର ଶିକାର ହୋଇଛନ୍ତି । ଚର୍ମ କର୍କଟ ଯୋଗୁଁ ସେ ନିକଟରେ ତାଙ୍କ ନାକରେ ଆଉ ଏକ ଅସ୍ତ୍ରୋପଚାର କରାଯାଇଛି ।  ମାଇକେଲ୍ କ୍ଲାର୍କ ଖରାରେ ଘଣ୍ଟା ଘଣ୍ଟା ଧରି କ୍ରିକେଟ୍ ଖେଳିବା ଯୋଗୁଁ ଏହି ସମସ୍ୟାର ସମ୍ମୁଖୀନ ହୋଇଥିବା ଆଲୋଚନା ହେଉଛି  । ଏଭଳି ପରିସ୍ଥିତିରେ ପ୍ରଶ୍ନ ଉଠୁଛି ଯେ ସତରେ କଣ ଅଧିକ ସମୟ ଖରାରେ ରହିବା ଦ୍ୱାରା ଚର୍ମ କର୍କଟ ହୁଏ କି ଏବଂ ଏହି ରୋଗ କେତେ ବିପଜ୍ଜନକ ? ଏହାର ଲକ୍ଷଣ, ପରୀକ୍ଷା ଏବଂ ପ୍ରତିରୋଧର ଉପାୟ ବିଷୟରେ ନିମ୍ନରେ ଜାଣନ୍ତୁ ।

ମାଇକେଲ୍ କ୍ଲାର୍କଙ୍କ ପୋଷ୍ଟ

Advertisment

ମାଇକେଲ୍ କ୍ଲାର୍କ ଗତକାଲି(ଗୁରୁବାର) ଇନ୍‌ଷ୍ଟାଗ୍ରାମରେ ଏକ ପୋଷ୍ଟ ସେୟାର କରିଛନ୍ତି । ପୋଷ୍ଟରେ ସେ କହିଛନ୍ତି ଯେ ଚର୍ମ କର୍କଟ ଯୋଗୁଁ ତାଙ୍କ ନାକର ଷଷ୍ଠ ଥର ପାଇଁ ଅସ୍ତ୍ରୋପଚାର କରିଛନ୍ତି । ସେ ଲେଖିଛନ୍ତି ଯେ ଅଷ୍ଟ୍ରେଲିଆରେ ଚର୍ମ କର୍କଟ ମାମଲା ଅତ୍ୟନ୍ତ ସାଧାରଣ । ଆଜି ମୁଁ ମୋ ନାକରୁ ଆଉ ଏକ ଛୋଟ ଅଂଶ କାଢ଼ିଲି । ସମସ୍ତଙ୍କୁ ନିବେଦନ କରୁଛି ନିଜ ଚର୍ମର ଯାଞ୍ଚ କରୁଥାଅ ।  ୨୦୦୬ ମସିହାରେ ମାଇକେଲ୍ କ୍ଲାର୍କଙ୍କୁ ପ୍ରଥମ ଥର ପାଇଁ ଏହି ରୋଗ ବିଷୟରେ ଜଣାପଡ଼ିଥିଲା । କ୍ରିକେଟ୍ ମୈଦାନରେ ଘଣ୍ଟା ଘଣ୍ଟା ଧରି ଖରାରେ ଖେଳିବା ଯୋଗୁଁ ତାଙ୍କୁ ଏହି ସମସ୍ୟା ହୋଇଥିଲା । ବର୍ତ୍ତମାନ ୪୪ ବର୍ଷ ବୟସରେ କ୍ଲାର୍କ ପୁଣି ଥରେ ଏହି ରୋଗ ସହ ଲଢ଼ୁଛନ୍ତି ।

ଅଷ୍ଟ୍ରେଲିଆରେ ଅଧିକ କାହିଁକି ହୁଏ ଚର୍ମ କର୍କଟ ?

ମାଇକେଲ୍ କ୍ଲାର୍କଙ୍କ ଭଳି କ୍ରିକେଟରମାନଙ୍କୁ ମ୍ୟାଚ୍ ସମୟରେ ଘଣ୍ଟା ଘଣ୍ଟା ଧରି ସୂର୍ଯ୍ୟାଲୋକରେ ରହିବାକୁ ପଡ଼େ । ଡାକ୍ତରଙ୍କ ଅନୁଯାୟୀ, ଏହି କାରଣରୁ କ୍ଲାର୍କଙ୍କୁ ଚର୍ମ କର୍କଟ ହୋଇଛି । ୨୦୧୯ ମସିହାରେ ତାଙ୍କ କପାଳରୁ ତିନୋଟି ସ୍ଥାନରେ ଅସ୍ତ୍ରୋପଚାର କରାଯାଇଥିଲା ।  ଏସବୁ ଚର୍ମର ଅଂଶ ଗୋଟିଏ ଗୋଟିଏ ଗୁଳା ସଦୃଶ, ଯାହା ନନ୍-ମେଲାନୋମା ଚର୍ମ କର୍କଟ ଥିଲା । ବର୍ତ୍ତମାନ ନାକରେ ଅସ୍ତ୍ରୋପଚାର ହୋଇଛି । କ୍ଲାର୍କ କହିଛନ୍ତି ଯେ ଅଷ୍ଟ୍ରେଲିଆରେ ସୂର୍ଯ୍ୟ କିରଣ ଅତ୍ୟନ୍ତ ତୀବ୍ର, ତେଣୁ ଏଠାରେ ଚର୍ମ କର୍କଟର ସର୍ବାଧିକ ମାମଲା ଦେଖାଯାଏ ।

କାହିଁକି ହୁଏ ଚର୍ମ କର୍କଟ ?

ଚର୍ମ କର୍କଟ ଚର୍ମ କୋଷରେ ଅସାଧାରଣ ବୃଦ୍ଧି ଯୋଗୁଁ ହୋଇଥାଏ । ଏହାର ସବୁଠାରୁ ବଡ଼ କାରଣ ହେଉଛି ସୂର୍ଯ୍ୟର ଅଲ୍ଟ୍ରାଭାଓଲେଟ୍ ବା ଅତିବାଇଗଣୀ (ୟୁଭି) ରଶ୍ମି । ଯେତେବେଳେ ଆମେ ଅଧିକ ସମୟ ଖରାରେ ରହୁ, ସେତେବେଳେ ଏହି ରଶ୍ମି ଚର୍ମର ଡିଏନ୍ଏକୁ କ୍ଷତି ପହଞ୍ଚାଏ । ଏହାଦ୍ୱାରା କୋଷଗୁଡ଼ିକ ନିୟନ୍ତ୍ରଣ ବାହାରକୁ ଯାଇ କର୍କଟରେ ପରିଣତ ହୁଅନ୍ତି । କ୍ଲାର୍କଙ୍କ ଭଳି ଯେଉଁମାନେ କ୍ରିକେଟ୍ ଖେଳୁଥିବା ସମୟରେ ଖରାରେ ରହୁଥିଲେ, ସେଭଳି ଲୋକଙ୍କୁ ଅଧିକ ବିପଦ ଥାଏ । ଅନ୍ୟ କାରଣଗୁଡ଼ିକ ମଧ୍ୟରେ ଗୋରା ଚର୍ମ, ପରିବାରରେ ପୂର୍ବରୁ କେହି କର୍କଟରେ ପୀଡ଼ିତ ହୋଇଥିଲେ, ଦୁର୍ବଳ ପ୍ରତିରୋଧକ ଶକ୍ତି ଏବଂ ଅନ୍ୟାନ୍ୟ ରାସାୟନିକ ପଦାର୍ଥ ସମ୍ପର୍କ ଚର୍ମ କର୍କଟର କାରଣ । ଟ୍ୟାନିଂ ବେଡ୍ କିମ୍ବା ଆର୍ଟିଫିସିଆଲ୍ ୟୁଭି ଲାଇଟ୍ ମଧ୍ୟ କର୍କଟର କାରଣ ହୋଇପାରେ । ଅଷ୍ଟ୍ରେଲିଆରେ ଓଜୋନ୍ ସ୍ତର ପତଳା ରହିଛି, ଯେଉଁଥିପାଇଁ ଏଠାରେ ୟୁଭି ରଶ୍ମିର ବିପଦ ଅଧିକ ଥାଏ । ଏହି କାରଣରୁ ଅଷ୍ଟ୍ରେଲିଆରେ ଚର୍ମ କର୍କଟର ମାମଲା ବହୁତ ଅଧିକ ।

କେତେ ପ୍ରକାରର ହୁଏ ଚର୍ମ କର୍କଟ ?

ଚର୍ମ କର୍କଟ ତିନି ପ୍ରକାରର ହୋଇଥାଏ । ଏଥିମଧ୍ୟରୁ ବେସାଲ୍ ସେଲ୍ କାର୍ସିନୋମା ସବୁଠାରୁ ସାଧାରଣ, ଯାହା ଧୀରେଧୀରେ ବଢ଼ିଥାଏ । ଦ୍ୱିତୀୟ ସ୍ଥାନରେ ରହିଛି ସ୍କ୍ୱାମସ୍ ସେଲ୍ କାର୍ସିନୋମା, ଯାହା ଚର୍ମର ଉପର ସ୍ତରରେ ହୋଇଥାଏ । ସେହିପରି, ତୃତୀୟଟି ହେଉଛି ମେଲାନୋମା କର୍କଟ, ଯାହା ସବୁଠାରୁ ବିପଜ୍ଜନକ ଏବଂ ଦ୍ରୁତ ଗତିରେ ବ୍ୟାପିଥାଏ । କ୍ଲାର୍କଙ୍କୁ ଅଧିକାଂଶ ନନ୍-ମେଲାନୋମା ପ୍ରକାରର କର୍କଟ ହୋଇଛି, ଯାହା କମ୍ ବିପଜ୍ଜନକ, କିନ୍ତୁ ବାରମ୍ବାର ଆକ୍ରାନ୍ତ ହୋଇପାରେ ।

ଚର୍ମ କର୍କଟର ଲକ୍ଷଣ

ଚର୍ମ କର୍କଟର ଲକ୍ଷଣ ଆରମ୍ଭରୁ ଛୋଟ ଲାଗେ, କିନ୍ତୁ ଅଣଦେଖା କରିବା ଦ୍ୱାରା ଏକ ବଡ଼ ବିପଦରେ ପରିଣତ ହୋଇଥାଏ । ଯଦି ଚର୍ମ ଉପରେ ନୂଆ ଗୁଳା କିମ୍ବା ଦାଗ ବଢ଼ୁଛି, ତେବେ ଧ୍ୟାନ ଦେବା ଆବଶ୍ୟକ । ଏହା ବ୍ୟତୀତ ପୁରୁଣା ମାଛଳା ରଙ୍ଗର ଦାଗ, ଆକାର କିମ୍ବା ରୂପରେ ପରିବର୍ତ୍ତନ, ଘା' ଭଲ ନହେବା, କୁଣ୍ଡେଇ ହେଉଥିବା ଜାଗାରୁ ରକ୍ତ ବାହାରିବା ମଧ୍ୟ ଚର୍ମ କର୍କଟର ଲକ୍ଷଣ । ଯଦି ଏପରି ସଙ୍କେତ ଦେଖାଯାଏ, ତେବେ ଡାକ୍ତରଙ୍କୁ ଭେଟନ୍ତୁ, କର୍କଟର କାରଣ ଶୀଘ୍ର ଜଣାପଡ଼ିଲେ ୯୫ ପ୍ରତିଶତ ମାମଲା ଭଲ ହୋଇଯାଏ ।

ଏହି ଟେଷ୍ଟରୁ ଜଣାପଡ଼େ ଚର୍ମ କର୍କଟ

ଚର୍ମ କର୍କଟ ଚିହ୍ନଟ କରିବାର ସବୁଠାରୁ ସଠିକ୍ ଉପାୟ ହେଉଛି ନିୟମିତ ଚେକଅପ୍ । ଏଥିରେ ଭିଜୁଆଲ୍ ଏକ୍ସାମ, ଡର୍ମୋସ୍କୋପି, ବାୟୋପସି ଇତ୍ୟାଦି କରି ରୋଗର ଚିହ୍ନଟ କରାଯାଏ । ଯଦି ଆପଣ ଅଧିକ ସମୟ ଖରାରେ ବିତାଉଛନ୍ତି, ତେବେ ବର୍ଷକୁ ଅତି କମ୍‌ରେ ଥରେ ଚର୍ମ ଚେକଅପ୍ ନିଶ୍ଚୟ କରିବା ଉଚିତ୍ ।

କିପରି କରିବେ ପ୍ରତିରୋଧ?

ଯଦି ଚର୍ମ କର୍କଟରୁ ବଞ୍ଚିବାକୁ ଚାହୁଁଛନ୍ତି, ତେବେ ଖରାରେ କମ୍ ବାହାରକୁ ଯିବା ଉଚିତ୍ । ଯଦି ଖରାରେ ଯିବା ଜରୁରୀ, ତେବେ ସନସ୍କ୍ରିନ୍ ବ୍ୟବହାର କରନ୍ତୁ  । ଏହା ସହିତ ଖରାରେ କଟନ ପୋଷାକ, ଟୋପି ଏବଂ ଚଷମା ପିନ୍ଧିବା ଉଚିତ୍ । ଟ୍ୟାନିଂ ହେବା ଦ୍ୱାରା ଚର୍ମ କର୍କଟ ହେବାର ଆଶଙ୍କା ବଢ଼ିଯାଏ ।