ଘରେ ଥିଲା ପୂଜା : ପିରିୟଡସ୍ ଅଟକାଇବା ପାଇଁ ଝିଅ ଖାଇଦେଲା ବଟିବା ,ଜୀବନ ନେଇଗଲା ମାସିକ ଋତୁସ୍ରାବ ବଟିକା

କନକ ବ୍ୟୁରୋ : ପ୍ରତିଟି ନାରୀ ଶରୀର ସୃଜନ ପାଇଁ ମାସିକ ଋତୁସ୍ରାବ ହେଉଛି ସାଧାରଣ କଥା । କିନ୍ତୁ ଭାରତରେ କାହିଁ କେଉଁ କାଳରୁ ଧାରଣା ରହିଆସିଛି ଯେ ମାସିକ ଋତୁସ୍ରାବ ସମୟରେ ନାରୀ ଅସ୍ବଚ୍ଛ ରହିଥାଏ । ଏହାର ଅନେକ ଧାର୍ମିକ ଏବଂ ବୈଜ୍ଞାନିକ କାରଣ ମଧ୍ୟ ରହିଛି । ବର୍ତ୍ତମାନର ଆଧୁନିକ ସମୟରେ ଅଧିକାଂଶ ଲୋକ ଏହାକୁ ପାଳନ କରୁନଥିବା ବେଳେ ଏବେବି କିଛି ପରିବାର ମାସିକ ଋତୁସ୍ରାବର ସମୟକୁ ଅସ୍ବଚ୍ଛ ମାନିଥା’ନ୍ତି । ପୂଜା,ପାର୍ବଣ କିମ୍ବା କେଉଁ ସ୍ଥାନକୁ ବୁଲିବାକୁ ଗଲେ ମହିଳା ପିରିୟଡସ୍ ରୋକିବା ପାଇଁ ବଟିକା ମଧ୍ୟ ନେଇଥା’ନ୍ତି । ଯାହା ପ୍ରତିଟି ନାରୀଙ୍କ କଥା କହିଲେ କିଛି ଭୁଲ୍ ହେବନି । କିନ୍ତୁ ଏହି ବଟିକା ଖାଇ ଜଣେ ଝିଅର ଜୀବନ ଚାଲିଯିବା ଘଟଣା ଏବେ ଚିନ୍ତାର ବିଷୟ ପାଲଟିଛି । 

ଜଣେ ୧୮ ବର୍ଷର ଝିଅ ଘରର ପୂଜାରେ ସାମିଲ ହେବା ପାଇଁ ମାସିକ ଋତୁସ୍ରାବ ବନ୍ଦର ବଟିକା ଖାଇଥିଲେ । କିନ୍ତୁ ଏହି ହର୍ମୋନାଲ୍ ଔଷଧ ଯୋଗୁ ତାଙ୍କୁ ଡିପ୍ ଭେନ୍ ଥ୍ରୋମ୍ବୋସିସ୍ ଆକ୍ରମଣ କଲା । ଯେହେତୁ ଘଟଣାଟି ସାଧାରଣ ଥିଲା ତେଣୁ ପରିବାର ଲୋକ କେବଳ ଝିଅକୁ ନେଇ ଡାକ୍ତରଙ୍କ ପାଖରେ ଚେକଅପ୍ କରାଇ ଦେଇଥିଲେ । ଡାକ୍ତର ଯୁବତୀଙ୍କ ଅବସ୍ଥାକୁ ଦେଖି ତତକ୍ଷଣାତ୍ ହସ୍ପିଟାଲରେ ଆଡମିଟ୍ କରିବା ପାଇଁ ପରିବାରକୁ କହିଥିଲେ । କିନ୍ତୁ ଡାକ୍ତର ଡରାଇ ଟଙ୍କା ଖସାଇବାକୁ ଚାହୁଛନ୍ତି ଭାବି ପରିବାର ଏହି ସମସ୍ୟାକୁ ହାଲକା ଭାବରେ ନେଇଥିଲେ । ଯାହାର ପରିଣାମ ତାଙ୍କୁ ବହୁତ ଜଟିଳ ପଡ଼ିଥିଲା । କିଛି ସମୟ ଭିତରେ ହିଁ ଝିଅଟିର ଜୀବନ ଚାଲିଯାଇଥିଲା । ୩ ଦିନ ମାସିକ ଋତୁସ୍ରାବ ରୋକିବା ପାଇଁ ହର୍ମୋନାଲ୍ ବଟିକା ଖାଇବା ପରେ ଯୁବତୀଙ୍କ ଆଣ୍ଠୁ ଏବଂ ଜଘଂରେ ଯନ୍ତ୍ରଣା ହୋଇଥିଲା । ଯାହାପରେ ସେ ଏକ କ୍ଲିନିକକୁ ଆସି ଚେକଅପ୍ କରାଇଥିଲେ । ଡାକ୍ତର ଚେକଅପ୍ ସମୟରେ ଝିଅକୁ ଡିପ୍ ଭେନ୍ ଥ୍ରୋମ୍ବୋସିସ୍ ଆଟାକ୍ କରିଥିବା ଜାଣିବାକୁ ପାଇଥିଲେ । ଯେଉଁଥିରେ ଜଘଂରୁ ନାଭି ପର୍ଯ୍ୟନ୍ତ ରକ୍ତ ଜମାଟ ବାନ୍ଧିଥାଏ । ଏଭଳି ସମସ୍ୟା ଜାଣିବା ପରେ ଡାକ୍ତର ପରିବାରକୁ ତୁରନ୍ତ ଚିକିତ୍ସା ପାଇଁ ପରାମର୍ଶ ଦେଇଥିଲେ । କିନ୍ତୁ ପରିବାରର ଅବହେଳା ଯୋଗୁ ଚିକିତ୍ସାରେ ବିଳମ୍ବ ହେଲା ଏବଂ ରାତିରେ ଝିଅଟି ଠିକରେ ନିଶ୍ବାସ ନେଇ ନପାରି ଭୋର ଭୋରରୁ ସବୁଦିନ ପାଇଁ ଆଖି ବୁଜି ଦେଇଥିଲା । 

ଡିପ୍ ଭେନ୍ ଥ୍ରୋମ୍ବୋସିସ୍ ହେଉଛି ଏପରି ଏକ ଅବସ୍ଥା ଯେଉଁଥିରେ ଶିରା ଭିତରେ ରକ୍ତ ଜମାଟ ବାନ୍ଧିଯାଏ , ଯାହା ସାଧାରଣତଃ ଗୋଡ଼ରେ ହୋଇଥାଏ । ଏହା ସେତେବେଳେ ବିପଜ୍ଜନକ ହୁଏ ଯେତେବେଳେ ରକ୍ତ ଜମାଟ ରକ୍ତ ପ୍ରବାହକୁ ବାଧା ଦିଏ କିମ୍ବା ଶରୀରର ଅନ୍ୟ ଅଙ୍ଗକୁ ବ୍ୟାପିଯାଏ । ଏହା ଜୀବନ ପ୍ରତି ମଧ୍ୟ ବିପଦ ସୃଷ୍ଟି କରିପାରେ । ମାସିକ ଋତୁସ୍ରାବ ବନ୍ଦ କରିବା ପାଇଁ ନିଆଯାଇଥିବା ଔଷଧଗୁଡ଼ିକ ଯୋଗୁଁ ଏହା ହୋଇଥିଲା, ଯେଉଁଥିରେ ପିରିୟଡ଼ର ପ୍ରବାହ ବନ୍ଦ ହୋଇଯାଇଥାଏ ଏବଂ ରକ୍ତ ଜମାଟ ଶରୀରରେ ବ୍ୟାପିବା ଆରମ୍ଭ କରିଥାଏ । ଏହା ସେତେବେଳେ ମାରାତ୍ମକ ହୋଇଥାଏ ଯେତେବେଳେ ଯୁବତୀଙ୍କୁ ପଲମୋନାରୀ ଏମ୍ବୋଲିଜିମ୍ ହୋଇଥାଏ । ଯାହା ଫୁସଫୁସରେ ପହଞ୍ଚିଥାଏ, ଯେଉଁ କାରଣରୁ ଛାତିରେ ତୀବ୍ର ଯନ୍ତ୍ରଣା ଆରମ୍ଭ ହୋଇଯାଏ । ସାଧାରଣତଃ ଏଥିରେ ପୀଡିତ ମହିଳାଙ୍କ ଶିରାଗୁଡ଼ିକ କ୍ଷତିଗ୍ରସ୍ତ ହୋଇଥାଏ ଏବଂ ଦୀର୍ଘ ସମୟ ଧରି ଶରୀରରେ ଫୁଲା, ଯନ୍ତ୍ରଣା ଏବଂ ଘାଆ ସୃଷ୍ଟି ହେବା ଆରମ୍ଭ ହୋଇଥାଏ । ପ୍ରଥମ ଥର ପାଇଁ ହର୍ମୋନାଲ୍ ଗର୍ଭନିରୋଧକ ନେଉଥିବା ମହିଳାମାନଙ୍କ ମଧ୍ୟରେ ପ୍ରଥମ ବର୍ଷରେ ବିପଦ ଅଧିକ ଥାଏ । ମୋଟାପଣ, ଧୂମପାନ, ଲମ୍ବା ଯାତ୍ରା ଏବଂ ଅଧିକ ବିଶ୍ରାମ ନେଉଥିବା ପରିସ୍ଥିତିରେ ଏଭଳି ସମସ୍ୟା ସୃଷ୍ଟି ହୋଇଥାଏ । ଗର୍ଭାବସ୍ଥା ଏବଂ ପ୍ରସବ ପରବର୍ତ୍ତୀ ସମୟରେ ବିପଦ ଅଧିକ ଥାଏ । ପାରିବାରିକ ଇତିହାସରୁ ମଧ୍ୟ ଥ୍ରୋମ୍ବୋସିସର ଆଶଙ୍କା ରହିପାରେ । ଏହାର ଲକ୍ଷଣକୁ ଯଦି ଚିହ୍ନିବାକୁ ଚେଷ୍ଟା କରିବେ ତେବେ ଜଙ୍ଘ କିମ୍ବା ଗୋଡ଼ରେ ଫୁଲା, ଯନ୍ତ୍ରଣା, କିମ୍ବା ଗରମ ଲାଗିବା , ଫୁସଫୁସରେ ରକ୍ତ ଜମାଟ ବାନ୍ଧିବା, ଅଚାନକ ଛାତିରେ ଯନ୍ତ୍ରଣା ଏବଂ ନିଶ୍ୱାସ ନେବାରେ କଷ୍ଟ ହେବା କିମ୍ବା ଚେତାଶୂନ୍ୟ ହୋଇଯିବା ଭଳି ପରିସ୍ଥିତି ଉପୁଜିବା । 

ହର୍ମୋନାଲ୍ ଔଷଧଗୁଡ଼ିକୁ ପିରିୟଡ୍ସ ବନ୍ଦ କରିବା କିମ୍ବା ନିୟନ୍ତ୍ରଣ କରିବା ପାଇଁ ବ୍ୟବହାର କରାଯାଏ, କିନ୍ତୁ ଡାକ୍ତରଙ୍କ ପରାମର୍ଶ ବିନା ଏପରି କରିବା ଜୀବନ ପ୍ରତି ମଧ୍ୟ ବିପଦ ସୃଷ୍ଟି କରିପାରେ । ଏହି ଟାବଲେଟ୍ ଗୁଡ଼ିକର ସେବନ ଦ୍ୱାରା ଡିପ୍ ଭେନ୍ ଥ୍ରୋମ୍ବୋସିସ୍ ଭଳି ଗମ୍ଭୀର ସମସ୍ୟା ହୋଇପାରେ । ଜୀବନ ବହୁତ ମୂଲ୍ୟବାନ ତେଣୁ ଏଭଳି ସମ୍ବେଦନଶୀଳ ସମୟରେ ନିଜ ଝିଅ,ବୋହୂ,ମା’,ଭଉଣୀଙ୍କ ଭଲରେ ଯତ୍ନ ନିଅନ୍ତୁ । ସାଧାରଣ ଲାଗୁଥିଲେ ବି ଏଭଳି ସମୟରେ ମାସିକ ଋତୁସ୍ରାବ ବଟିକା ଖାଇବାରୁ ଦୂରେଇ ରୁହନ୍ତୁ ।