ବାଂଲାଦେଶ ବିମାନ ଦୁର୍ଘଟଣା ଘଟଣା, ଆହତଙ୍କୁ ଚିକିତ୍ସା ପାଇଁ ସୋସିଆଲ ମିଡିଆରେ ଭିକ ମାଗିଲେ ୟୁନୁସ

କନକ ବ୍ୟୁରୋ: ବାଂଲାଦେଶ ବିମାନ ଦୁର୍ଘଟଣା ପରେ ମହମ୍ମଦ ୟୁନୁସଙ୍କ ଚାନ୍ଦା ମାଗିବା ଘଟଣା ଏବେ ଚର୍ଚ୍ଚାରେ । ସୋସିଆଲ ମିଡିଆରେ ତୀବ୍ର ସମାଲୋଚନାର ଶିକାର ହୋଇଛନ୍ତି  ୟୁନୁସ ।  ତେବେ କଣ ଏହି ଚାନ୍ଦା ମାଗିବା ଘଟଣା ଆସନ୍ତୁ ଜାଣିବା । ନୋବେଲ ଶାନ୍ତି ପୁରସ୍କାର ବିଜେତା ତଥା ବାଂଲାଦେଶର ଅନ୍ତରୀଣ ସରକାରର ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସ୍, ଏକ ବିମାନ ଦୁର୍ଘଟଣା ପରେ ସୋସିଆଲ ମିଡିଆରେ ଏକ ପୋଷ୍ଟ କରିଥିଲେ । ଏହି ପୋଷ୍ଟରେ ବିମାନ ଦୁର୍ଘଟଣାରେ ଆହତ ହୋଇଥିବା  ଯାତ୍ରୀଙ୍କ ପାଇଁ  ଚାନ୍ଦା ବା ସହାୟତା ମାଗିଥିଲେ । ସୋସିଆଏ ମିଡିଆରରେ ଏପରି ଚାନ୍ଦା ମାଗିବାକୁ ନେଇ  ଲୋକଙ୍କ ଆକ୍ରୋଶ ଏତେ ବଢ଼ିଯାଇଥିଲା ଯେ ୟୁନୁସ  ନିଜ ପୋଷ୍ଟକୁ ଡିଲିଟ୍ କରିବାକୁ  ବାଧ୍ୟ ହୋଇଥିଲେ ।  ପୋଷ୍ଟରେ ଲୋକେ କମେଣ୍ଟ ଦେଇଥିଲେ ଯେ, ସରକାରଙ୍କ ପାଖରେ ଟଙ୍କା ନାହିଁ ଗୁରୁତର ମାନଙ୍କୁ ଚିକିତ୍ସା କରିବା ପାଇଁ । ଆଉ ଜଣେ କହିଥିଲେ ଦେଶ ଚଳାଇବା ପାଇଁ ଭିକ ମାଗିବାକୁ ପଡୁଛି ।  

ସୂଚନାମୁତାକ, ଗତ ସୋମବାର ଦିନ ବାଂଲାଦେଶର ସେନାର ଏକ ଟ୍ରେନି ଜେଟ୍‌  ମାଇଲ୍‌ଷ୍ଟୋନ୍‌  ସ୍କୁଲ ଉପରେ ପଡିଯାଇଥିଲା ।  ଏହି ଘଟଣାରେ ଏପର୍ଯ୍ୟନ୍ତ ୩୨ ଜଣଙ୍କ ମୃତ୍ୟୁ ହୋଇଥିବାବେଳେ ଅନେକ ଗୁରୁତର  ହୋଇଛନ୍ତି ।  ଏହି ଦୁର୍ଘଟଣାର କିଛି ସମୟ ପରେ, ମହମ୍ମଦ ୟୁନୁସଙ୍କ ଅଫିସିଆଲ୍ ଫେସବୁକ୍ ପେଜରୁ ଏକ ପୋଷ୍ଟ କରାଯାଇଥିଲା । ସେଥିରେ ଦୁର୍ଘଟଣାଗ୍ରସ୍ତ ବିମାନର ଫଟୋ ସହିତ ଆହତଙ୍କ ଚିକିତ୍ସା ଏବଂ ପୀଡ଼ିତ ପରିବାରକୁ ସହାୟତା ପାଇଁ ଏକ ବ୍ୟାଙ୍କ ଆକାଉଣ୍ଟରେ ଅର୍ଥ ଦାନ କରିବାକୁ ଜନସାଧାରଣଙ୍କୁ ନିବେଦନ କରାଯାଇଥିଲା ।  ପୋଷ୍ଟ ମାଧ୍ୟମରେ ଲୋକଙ୍କୁ "ମୁଖ୍ୟ ପରାମର୍ଶଦାତାଙ୍କ ରିଲିଫ୍ ଓ କଲ୍ୟାଣ ପାଣ୍ଠି" ରେ ଦାନ କରିବାକୁ ଅପିଲ୍ କରିଥିଲେ ।  

ତେବେ, ଏକ ବେସରକାରୀ ଏୟାରଲାଇନ୍ସର ଦୁର୍ଘଟଣା ପାଇଁ ସରକାରୀ ପାଣ୍ଠିରେ ଚାନ୍ଦା ମାଗିବାକୁ ନେଇ ସୋସିଆଲ ମିଡିଆରେ ତୀବ୍ର ବିରୋଧ କରାଯାଇଥିଲା । ଲୋକମାନେ ପ୍ରଶ୍ନ କରିଥିଲେ ଯେ ବିମାନ କମ୍ପାନୀର ବୀମା ଥାଉ ଥାଉ ସରକାର କାହିଁକି ଜନତାଙ୍କଠାରୁ ଅର୍ଥ ସଂଗ୍ରହ କରୁଛନ୍ତି । ଏହି ସମାଲୋଚନା ପରେ ୟୁନୁସ୍ ସେଣ୍ଟର ପକ୍ଷରୁ ପୋଷ୍ଟଟିକୁ ହଟାଇ ଦିଆଯାଇଥିଲା ଏବଂ ଏକ ସ୍ପଷ୍ଟୀକରଣ ଜାରି କରି କୁହାଯାଇଥିଲା ଯେ ଏହି ପୋଷ୍ଟଟି ୟୁନୁସଙ୍କ ବିନା ଅନୁମତିରେ ଜଣେ କର୍ମଚାରୀଙ୍କ ଦ୍ୱାରା ଭାବପ୍ରବଣତାର ସହ କରାଯାଇଥିଲା ।