ମାୟାବତୀଙ୍କ ବଡ଼ ନିଷ୍ପତ୍ତି : ପୁତୁରା ଆକାଶ ଆନନ୍ଦ ସବୁ ପଦବୀରୁ ହଟିଲେ, କହିଲେ କିଏ ହେବ ତାଙ୍କ ଉତ୍ତରାଧିକାରୀ

କନକ ବ୍ୟୁରୋ: ବହୁଜନ ସମାଜ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷା ମାୟାବତୀ ନିଜ ପୁତୁରା ଆକାଶ ଆନନ୍ଦଙ୍କୁ ଦଳର ଜାତୀୟ ସଂଯୋଜକ ପଦରୁ ହଟାଇ ଦେଇଛନ୍ତି । ତାଙ୍କ ବଦଳରେ ମାୟାବତୀ ଆନନ୍ଦ କୁମାରଙ୍କୁ ଜାତୀୟ ସଂଯୋଜକ ଦାୟିତ୍ୱ ଦେଇଛନ୍ତି  । ଏହା ସହିତ  ରାଜ୍ୟସଭା ସାଂସଦ ରାମଜୀ ଗୌତମଙ୍କୁ ଅତିରିକ୍ତ ଦାୟିତ୍ୱ ଦେଇ ଯୁଗ୍ମ ଜାତୀୟ ସଂଯୋଜକ କରିଛନ୍ତି । ନିକଟରେ ମାୟାବତୀ ଆକାଶ ଆନନ୍ଦଙ୍କ ଶ୍ୱଶୁର ଅଶୋକ ସିଦ୍ଧାର୍ଥଙ୍କୁ ପଦରୁ ହଟାଇ ଦେଇଥିଲେ । ବିଏସପି ମୁଖ୍ୟ ଏକ ବୈଠକ ସମୟରେ ତାଙ୍କ ଉତ୍ତରାଧିକାରୀ ସମ୍ପର୍କରେ ସ୍ଥିତି ସ୍ପଷ୍ଟ କରି କହିଥିଲେ ଯେ, ମୋର ଶେଷ ନିଶ୍ୱାସ ପର୍ୟ୍ୟନ୍ତ କୌଣସି  ଉତ୍ତରାଧିକାରୀ ହେବେ ନାହିଁ । 

ମାୟାବତୀ ଏହା ମଧ୍ୟ କହିଛନ୍ତି ଯେ, ଏବେ ତାଙ୍କ ଭାଇ ଆନନ୍ଦଙ୍କ ପିଲାମାନେ ରାଜନୀତି ସହିତ ଜଡିତ ପରିବାରରେ ବିବାହ କରିବେ ନାହିଁ । ମାୟାବତୀ କହିଛନ୍ତି ଯେ ମୁଁ ଆନନ୍ଦ କୁମାରଙ୍କ ବିଷୟରେ ଏହା ମଧ୍ୟ ଜଣାଇବାକୁ ଚାହୁଁଛି ଯେ ବର୍ତ୍ତମାନର ପରିବର୍ତ୍ତିତ ପରିସ୍ଥିତିରେ, ଦଳ ଏବଂ ଆନ୍ଦୋଳନର ସ୍ୱାର୍ଥକୁ ଦୃଷ୍ଟିରେ ରଖି, ସେ ଏବେ ତାଙ୍କ ପିଲାମାନଙ୍କୁ ଏକ ଅଣରାଜନୈତିକ ପରିବାର ସହିତ ଯୋଡ଼ିବାକୁ ନିଷ୍ପତ୍ତି ନେଇଛନ୍ତି । ଯାହା ଦ୍ଵାରା ଅଶୋକ ସିଦ୍ଧାର୍ଥଙ୍କ ପରି ଲୋକଙ୍କ ପାଇଁ  ଦଳ ଭବିଷ୍ୟତରେ ଯେମିତି କୌଣସି କ୍ଷତିର ସମ୍ମୁଖୀନ ହେବନି ସେଥିପ୍ରତି ଦୃଷ୍ଟି ଦିଆଯିବ । 

ବିଏସପି ଦ୍ୱାରା ଜାରି କରାଯାଇଥିବା ପ୍ରେସ୍ ରିଲିଜରେ ମାୟାବତୀଙ୍କ କହିଛନ୍ତି, “ମୁଁ ନିଜେ ନିଷ୍ପତ୍ତି ନେଇଛି ଯେ ଯେପର୍ୟ୍ୟନ୍ତ ମୁଁ ଜୀବିତ ଅଛି କିମ୍ବା ମୋର ଶେଷ ନିଶ୍ୱାସ ପର୍ୟ୍ୟନ୍ତ, ଦଳରେ ମୋର କୌଣସି ଉତ୍ତରାଧିକାରୀ ରହିବ ନାହିଁ । ଏହି ନିଷ୍ପତ୍ତିକୁ ଦଳୀୟ ଲୋକମାନେ ହୃଦୟର ସହିତ ସ୍ୱାଗତ କରିବେ ବୋଲି ଆଶା ।“ 

‘ମୋ ପାଇଁ ପରିବାର ନୁହେଁ ବିଏସପି ପ୍ରଥମ‘ 
ପ୍ରେସ୍ ରିଲିଜରେ କୁହାଯାଇଛି ଯେ ବିଏସପି ମୁଖ୍ୟ ଆଜି ତାଙ୍କର ବକ୍ତବ୍ୟକୁ ଦୋହରାଇଛନ୍ତି ଯେ ମୋ ପାଇଁ ଦଳ ଏବଂ ଆନ୍ଦୋଳନ ପ୍ରଥମେ । ଭାଇ, ଭଉଣୀ, ସେମାନଙ୍କ ପିଲାମାନେ ଏବଂ ଅନ୍ୟାନ୍ୟ ସମ୍ପର୍କୀୟ ଇତ୍ୟାଦି ସମସ୍ତେ ପରେ ଆସନ୍ତି । ଏହି ପରିପ୍ରେକ୍ଷୀରେ, ସେ ଦଳୀୟ ଲୋକଙ୍କୁ ଆଶ୍ୱାସନା ଦେଇଛନ୍ତି ଯେ ଯେପର୍ୟ୍ୟନ୍ତ ମୁଁ ଜୀବିତ ଅଛି, ମୁଁ ମୋର ଶେଷ ନିଶ୍ୱାସ ପର୍ୟ୍ୟନ୍ତ ମୋର ପୂର୍ଣ୍ଣ ସଚ୍ଚୋଟତା ଏବଂ ନିଷ୍ଠାର ସହିତ ଦଳକୁ ଆଗକୁ ନେବା ପାଇଁ ଯଥାସମ୍ଭବ ପ୍ରୟାସ କରିବି । ବିଏସପି  ବିବୃତ୍ତି ଜାରି କରିଛି ଯେ ଆକାଶ ଆନନ୍ଦଙ୍କ ଶ୍ୱଶୁର ଅଶୋକ ସିଦ୍ଧାର୍ଥ ବିଏସପି ମୁଖ୍ୟଙ୍କ ନାମର ଅପବ୍ୟବହାର କରୁଛନ୍ତି ।